പി.എസ്.സി, യു.പി.എസ്.സി പരീക്ഷകൾക്ക് തയ്യാറെടുക്കുന്ന ന്യൂനപക്ഷ വിഭാഗത്തിൽപ്പെട്ട ഉദ്യോഗാർത്ഥികൾക്ക് സൗജന്യ പരിശീലനം നൽകുന്നതിന് ഏഴ് പുതിയ പരിശീലന കേന്ദ്രങ്ങൾ ന്യൂനപക്ഷക്ഷേമവകുപ്പിന് കീഴിൽ ആരംഭിക്കാൻ സർക്കാർ ഉത്തരവായി. നിലവിൽ സംസ്ഥാനത്ത് പതിനേഴ് പരിശീലനകേന്ദ്രങ്ങൾ പ്രവർത്തിക്കുന്നുണ്ട്. കൊല്ലം കണ്ണനല്ലൂർ, ആലപ്പുഴ കായംകുളം, എറണാകുളം മട്ടാഞ്ചേരി, പാലക്കാട് പട്ടാമ്പി, മലപ്പുറം വളാഞ്ചേരി, കോഴിക്കോട് പേരാമ്പ്ര, കണ്ണൂർ തലശ്ശേരി എന്നിവിടങ്ങളിലാണ് പുതിയ കേന്ദ്രങ്ങൾ തുടങ്ങുന്നത്. ഇതിനായി ഏഴു വീതം പ്രിൻസിപ്പൽ, ഡേറ്റാ എൻട്രി ഓപ്പറേറ്റർ, യു.ഡി ക്ലാർക്ക് എന്നിവരുടെ താത്ക്കാലിക തസ്തികകൾ പുതിയതായി സൃഷ്ടിച്ച് ഉത്തരവായി. മുസ്ലീം, ക്രിസ്ത്യൻ, ഈഴവ, പട്ടികജാതി, പട്ടികവർഗ വിഭാഗത്തിൽപ്പെട്ട ഉദ്യോഗാർത്ഥികൾക്ക് പരിശീലന കേന്ദ്രങ്ങളുടെ പ്രയോജനം ലഭിക്കും.
