സമൂഹത്തിൽ മാറ്റി നിർത്തപ്പെടുന്നവരും പാർശ്വവൽക്കരിക്കപ്പെടുന്നവരുമായ യുവജന വിഭാഗത്തിന്റെ ശാക്തീകരണത്തിന് നേതൃത്വം നൽകുമെന്ന് സംസ്ഥാന യുവജന കമ്മീഷൻ ചെയർപേഴ്സൺ ചിന്താ ജെറോം പറഞ്ഞു. കേരള സ്റ്റേറ്റ് ലൈബ്രറി കൗൺസിലിന്റെയും സംസ്ഥാന യുവജന കമ്മീഷന്റെയും ആഭിമുഖ്യത്തിൽ കുമളി ഹോളിഡേ ഹോമിൽ  നടത്തിയ നിറവ് ഗോത്ര കലോത്സവവേദിയിൽ മുഖ്യ പ്രഭാഷണം നടത്തുകയായിരുന്നു അവർ. സംസ്ഥാന ഗവൺമെൻറിൻറെ നേതൃത്വത്തിൽ യുവജന ശാക്തീകരണത്തിന് വഴിവെക്കുന്ന വിപ്ലവകരമായ പ്രവർത്തനങ്ങളാണ് നടന്നുകൊണ്ടിരിക്കുന്നത്. യുവജന കമ്മീഷൻ സംസ്ഥാന ലൈബ്രറി കൗൺസിലുമായി സഹകരിച്ച് 60 ഓളം വരുന്ന ട്രൈബൽ ലൈബ്രറികൾ വഴി മാതൃകാപരമായ പ്രവർത്തനമാണ് നടത്തുന്നത്. നമ്മുടെ സമൂഹത്തിൽ അന്യമായിക്കൊണ്ടിരിക്കുന്ന തനതു കലാരൂപങ്ങൾ സംരക്ഷിക്കപ്പെടേണ്ടതുണ്ട്.  ഇത്തരത്തിൽ അന്യംനിന്നുപോകുന്ന വിവിധ കലാരൂപങ്ങളെയും  വൈവിധ്യങ്ങളെയും ജീവിതരീതികളും എല്ലാം സംരക്ഷിക്കുക എന്ന ഉദ്ദേശത്തോടുകൂടിയാണ് നിറവ് പോലുള്ള പരിപാടികൾ സംഘടിപ്പിക്കുന്നത് ഗോത്ര വിഭാഗങ്ങളിലെ യുവജനങ്ങളുടെ സമഗ്ര ഉന്നമനത്തിനായി യുവജന കമ്മീഷൻ ഇടപെടലുകൾ വ്യാപകമാക്കും .  നമ്മുടെ സമൂഹത്തിൽ വർദ്ധിച്ചുവരുന്ന ലഹരിവസ്തുക്കളുടെ ഉപയോഗത്തിനെതിരെ വിപുലമായ ബോധവൽക്കരണ പരിപാടികൾ ആണ്  യുവജന കമ്മീഷൻറെ നേതൃത്വത്തിൽ സംഘടിപ്പിച്ചു വരുന്നത്. നാടിന്റെ തനിമമുള്ള മണ്ണിന്റെ മണമുള്ള തൊഴിലാളികളുടെ വിയർപ്പിനെ , സാധാരണക്കാരുടെ ജീവിതത്തിന്റെ തുടിപ്പുള്ള  കലാരൂപങ്ങളാക്കി അവതരിപ്പിക്കുക വഴി അന്യമായികൊണ്ടിരിക്കുന്ന കലാരൂപങ്ങളെയും വൈവിധ്യങ്ങളെയും ജീവിതരീതികളെയും സംരക്ഷിക്കുന്ന പ്രവർത്തനങ്ങൾ തുടരും എന്ന് അവർ കൂട്ടിച്ചേർത്തു.