122 പേരെക്കൂടി പേരെ വീട്ടിലെ നിരീക്ഷണത്തില് നിന്നും ഒഴിവാക്കി
തിരുവനന്തപുരം: ലോകത്ത് 25 രാജ്യങ്ങളില് നോവല് കൊറോണ വൈറസ് രോഗം പടര്ന്നുപിടിക്കുന്ന സാഹചര്യത്തില് സംസ്ഥാനത്തെ വിവിധ ജില്ലകളിലായി 2397 പേര് നിരീക്ഷണത്തിലാണെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചു. ഇവരില് 2375 പേര് വീടുകളിലും 22 പേര് ആശുപത്രികളിലും നിരീക്ഷണത്തിലാണ്. സംശയാസ്പദമായവരുടെ 402 സാമ്പിളുകള് എന്.ഐ.വി.യില് പരിശോധനയ്ക്ക് അയച്ചിട്ടുണ്ട്. ഇതില് 363 സാമ്പിളുകളുടെ പരിശോധനാ ഫലം നെഗറ്റിവ് ആണ്. ബാക്കിയുള്ളവരുടെ ഫലം വരാനുണ്ട്. നിലവില് ആശുപത്രിയില് പ്രവേശിപ്പിക്കപ്പെട്ട ആരുടേയും ആരോഗ്യനിലയില് ആശങ്കയ്ക്ക് വകയില്ലെന്നും മന്ത്രി വ്യക്തമാക്കി.
രോഗം സ്ഥിരീകരിച്ച് ആലപ്പുഴ മെഡിക്കല് കോളേജ് ആശുപത്രിയില് ചികിത്സയിലായിരുന്ന വിദ്യാര്ത്ഥിയെ ആരോഗ്യനില തൃപ്തികരമായതിനെ തുടർന്ന് ഡിസ്ചാര്ജ് ചെയ്തു. ഇനി വീട്ടിലെ നിരീക്ഷണത്തില് തുടരുന്നതാണ്. 122 വ്യക്തികളെക്കൂടി പരിഷ്കരിച്ച മാര്ഗരേഖ പ്രകാരം വീട്ടിലെ നിരീക്ഷണത്തില് നിന്നും ഒഴിവാക്കി. കഴിഞ്ഞ ദിവസം 1040 വ്യക്തികളെ നിരീക്ഷണത്തില് നിന്നും ഒഴിവാക്കിയിരുന്നു. എങ്കിലും ആരോഗ്യ വകുപ്പിന്റെ ജാഗ്രത തുടരുകയാണ്. രോഗബാധിത പ്രദേശങ്ങളില് നിന്നും മടങ്ങിയെത്തിയവര് രോഗലക്ഷണങ്ങള് പ്രകടമല്ലെങ്കിലും ഇന്ത്യയിലെത്തി 28 ദിവസങ്ങള് കഴിയുന്നതുവരെ വീടുകളില്ത്തന്നെ തുടരേണ്ടതും പൊതു ഇടങ്ങള് സന്ദര്ശിക്കുന്നത് ഒഴിവാക്കേണ്ടതുമാണ്.