ഭൂതകാലത്തിന്റെ ചരിത്രവും നമ്മുടെ നാട് കടന്നുപോയ വഴികളുമൊക്കെ യഥാവിധി അറിഞ്ഞിരുന്നെങ്കിൽ ഇന്ന് കാണുന്ന ഭ്രാന്തമായ രൗദ്രഭാവങ്ങൾ സമൂഹത്തിൽ ഉണ്ടാവുമായിരുന്നില്ല എന്ന് പുരാരേഖ, പുരാവസ്തു മ്യൂസിയം രജിസ്ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പളളി പറഞ്ഞു. അന്താരാഷ്ട്ര ആർക്കൈവ്‌സ് ദിനാഘോഷത്തോടനുബന്ധിച്ച് സംസ്ഥാനപുരാരേഖ വകുപ്പ് തിരുവനന്തപുരം ആർക്കൈവ് ഡയറക്ടറേറ്റിൽ സംഘടിപ്പിച്ച ശിൽപശാല  ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

ഭൂതകാലത്തെ വിസ്മരിച്ചുകൊണ്ട് ഒരു രാജ്യത്തിനും സമൂഹത്തിനും മുന്നോട്ട് പോകാനാവില്ല. നമ്മുടെ ചരിത്രത്തെയും ചരിത്രത്തിലെ നായകന്മാരെയും ദർശനങ്ങളെയും ഒക്കെ വിസ്മരിപ്പിക്കാനുള്ള ശ്രമങ്ങൾ നടക്കുന്ന പശ്ചാത്തലത്തിൽ ചരിത്ര രേഖകളുടെ സംരക്ഷണവും സൂക്ഷിപ്പും വളരെ പ്രധാനമാണ്. ഭൂതകാലത്തിന്റെ ഹൃദയധ്വനിയായ പുരാരേഖകൾ നമ്മുടെ സംസ്ഥാനത്തെ അമൂല്യനിധികളാണ്. പക്ഷേ പ്രബുദ്ധത കൊണ്ട് വീർപ്പുമുട്ടുന്ന കേരളത്തിലെ അധിപേർക്കും അത്യപൂർവ്വമായ താളിയോലകളും വിലമതിക്കാനാകാത്ത ചരിത്രരേഖകളും ശാസ്ത്രീയ സംരക്ഷണം നടത്തി ഭാവി തലമുറക്ക് വേണ്ടി സൂക്ഷിക്കുന്ന ഈ സർക്കാർ സ്ഥാപനത്തെക്കുറിച്ച് അറിയില്ല. പുരാരേഖ, പുരാവസ്തു, മ്യൂസിയം വകുപ്പുകൾ നിർവഹിക്കുന്ന അമൂല്യ സാമൂഹിക ധർമ്മത്തെക്കുറിച്ചും അവർ ബോധവാന്മാരല്ല.

കേരളത്തിന്റെ സാമൂഹിക, സാസ്‌കാരിക, വൈജ്ഞാനിക നവോത്ഥാനത്തിന്റെ കേന്ദ്ര സ്ഥാപനമായി ഈ മൂന്ന് വകുപ്പുകളും മാറണമെന്നും അതിനാവശ്യമായ വിപുലമായ പ്രചാരണപരിപാടികൾ സംഘടിപ്പിക്കണമെന്നും മന്ത്രി പറഞ്ഞു. കാലാവസ്ഥ വ്യതിയാനവും പ്രകൃതി ദുരന്തങ്ങളും കൂടുതൽ വ്യാപകമാകുന്ന പശ്ചാത്തലത്തിൽ കാലവർഷക്കെടുതിയിൽ നിന്നും വിലപ്പെട്ട ചരിത്രരേഖകളെ എങ്ങിനെ സംരക്ഷിക്കാം എന്ന വിഷയത്തിൽ വകുപ്പ് ശിൽപശാല സംഘടിപ്പിച്ചത് ഉചിതമായെന്നും മന്ത്രി പറഞ്ഞു.

ആർക്കൈവ്‌സുകളുടെ പ്രാധാന്യം പൊതുജനങ്ങളിലേയ്ക്ക് എത്തിക്കുന്നതിന്റെ ഭാഗമായാണ് ജൂൺ 9  ആർക്കൈവ്സ് ദിനമായി യുനെസ്‌കോയുടെ ആഭിമുഖ്യത്തിൽ ലോകമെമ്പാടും ആചരിക്കുന്നത്.

 ഉദ്ഘാടന ചടങ്ങിൽ തിരുവനന്തപുരം നഗരസഭ നികുതി അപ്പീൽകാര്യ സ്റ്റാന്റിംഗ് കമ്മിറ്റി ചെയർമാൻ പാളയം രാജൻ അധ്യക്ഷത വഹിച്ചു. സംസ്ഥാന പുരാവസ്തുവകുപ്പ് ഡയറക്ടർ ഇ.ദിനേശേൻ, മ്യൂസിയം മൃഗശാലവകുപ്പ് ഡയറക്ടർ ഇൻ ചാർജ് പി.എസ്. മഞ്ജുളാദേവി, കേരളമ്യൂസിയം എക്സിക്യൂട്ടീവ് ഡയറക്ടർ ആർ. ചന്ദ്രൻപിളള എന്നിവർ ആശംസകൾ അർപ്പിച്ചു. ആർക്കൈവ്സ് വകുപ്പ് ഡയറക്ടർ ഇൻ ചാർജ് പാർവതി. എസ് സ്വാഗതവും ആർക്കൈവ്സ് ഡയറക്ടറേറ്റ് ആർക്കിവിസ്റ്റ് അശോക് കുമാർ. ആർ നന്ദിയും പറഞ്ഞു.

‘കാലവർഷകെടുതിയും രേഖാസംരക്ഷണവും’ എന്ന വിഷയത്തിൽ സംഘടിപ്പിച്ച ശിൽപശാലയിൽ ബാംഗളുരു ട്രാൻസ് ഡിസിപ്ലിനറി യൂണിവേഴ്‌സിറ്റി എമരിറ്റസ് പ്രൊഫസർ ഡോ. ബി.വേണുഗോപാൽ, ആർക്കിടെക്ചറൽ കൺസൾട്ടന്റ് ആര്യ നരേന്ദ്രൻ എന്നിവർ വിഷയാവതരണം നടത്തി.