കൊച്ചി: ജനകീയ സഹകരണത്തോടും സാധാരണ ജനങ്ങളെ കൂടി ഉൾപ്പെടുത്തിക്കൊണ്ടുള്ള ടൂറിസം പദ്ധതി സംസ്ഥാനത്ത് നടപ്പിലാക്കുമെന്ന് വിനോദ സഞ്ചാര സഹകരണ ദേവസ്വം വകുപ്പ് മന്ത്രി കടകംപള്ളി സുരേന്ദ്രൻ. കേരളത്തിൻറെ ഭാവി ടൂറിസത്തിൽ ആണ്. അതിനാൽ സാധാരണ ജനങ്ങൾക്ക് കൂടി പ്രയോജനപ്രദമാകുന്ന ടൂറിസം പദ്ധതിയാണ് സംസ്ഥാനത്ത് നടപ്പിലാക്കുന്നതെന്നും മന്ത്രി പറഞ്ഞു. കടമ്പ്രയാർ ഇക്കോടൂറിസം പദ്ധതിയിൽപ്പെട്ട മനയ്ക്കക്കാവ് തൂക്കുപാലത്തിന്റെ ഉദ്ഘാടനം നിർവഹിച്ചുകൊണ്ട് സംസാരിക്കുകയായിരുന്നു മന്ത്രി.

കടമ്പ്രയാർ എക്കോ ടൂറിസം പദ്ധതിയെ അത്യാധുനിക സൗകര്യങ്ങളോടെ കൂടുതൽ മെച്ചപ്പെടുത്തും. വിനോദസഞ്ചാരികളെ ആകർഷിക്കുന്ന രീതിയിൽ മെച്ചപ്പെട്ട ഇരിപ്പിടങ്ങളും ബാത്ത്റൂം സംവിധാനവും ലഭ്യമാക്കും. പ്രളയം ഏറ്റവും കൂടുതൽ ബാധിച്ചത് ടൂറിസം മേഖലയിലാണ്. കോടിക്കണക്കിന് രൂപ വരുമാനം ഉണ്ടായിരുന്ന ടൂറിസം മേഖലയെ പ്രളയാനന്തരം വളരെ വേഗത്തിൽ തിരിച്ചുപിടിക്കാൻ സാധിച്ചിട്ടുണ്ട്. സ്ഥലപരിധി ടൂറിസം മേഖലയിൽ വലിയ പ്രശ്നമായി കൊണ്ടിരിക്കുകയാണ്. കേരളത്തിലെ വ്യവസായിക വികസനത്തിന് പരിധി കൽപ്പിക്കപ്പെടുന്ന അവസ്ഥയാണിന്നുള്ളത്. ഈ സാഹചര്യത്തിൽ പുതിയ തൊഴിൽ അവസരങ്ങളും മേഖലകളും കണ്ടെത്താൻ സാധിക്കുന്നത് ടൂറിസത്തിലൂടെയാണെന്നും മന്ത്രി കൂട്ടിച്ചേർത്തു.

കൊച്ചി നഗരാതിർത്തിയിൽ കിഴക്കമ്പലം കുന്നത്തുനാട് പഞ്ചായത്തുകളിലാണ് കടമ്പ്രയാർ ടൂറിസം പദ്ധതി. പ്രകൃതിരമണീയമായ ഈ പ്രദേശം കേരളത്തിലെ എക്കോ ടൂറിസം മേഖലയ്ക്ക് പൊതു സാധ്യതകൾ തുറന്നു കൊടുക്കുന്നതാണ്. രണ്ടു പാലങ്ങളാണ് പദ്ധതിയുടെ ഭാഗമായി കടമ്പ്രയാർ നിർമ്മിച്ചിരിക്കുന്നത്. ഒന്നേകാൽ കോടി മുടക്കി 45 മീറ്റർ നീളത്തിലും 1.5 മീറ്റർ വീതിയിലും നിർമ്മാണം പൂർത്തീകരിച്ച മനയ്ക്കക്കടവ് പാലം, o.90 കോടി മുടക്കി 41 മീറ്റർ നീളത്തിലും 1.5 മീറ്റർ വീതിയിലും നിർമ്മിച്ച കടമ്പ്രയാർ പാലവും. ബോട്ടിങ്ങിനായി ഇരുപതോളം പെഡൽ ബോട്ടുകളും മോട്ടോർ ബോട്ടുകളും കുട്ടവഞ്ചികളും പദ്ധതിയുടെ ഭാഗമായി തയ്യാറായിട്ടുണ്ട്. പൊതുമേഖലാ സ്ഥാപനമായ കേരള ഇലക്ട്രിക്കൽ ആൻഡ് അലൈഡ് എൻജിനീയറിംഗ് കമ്പനിയാണ് നിർമ്മാണം പൂർത്തീകരിച്ചിരിക്കുന്നത്.

കുന്നത്തുനാട് എംഎൽഎ വി പി സജീന്ദ്രൻ അധ്യക്ഷത വഹിച്ച ചടങ്ങിൽ കെൽ മാനേജിംഗ് ഡയറക്ടർ ഷാജി എം വർഗീസ്, വടവുകോട് ബ്ലോക്ക് പഞ്ചായത്ത് പ്രസിഡൻറ് ഗൗരി വേലായുധൻ, വാഴക്കുളം ബ്ലോക്ക് പഞ്ചായത്ത് പ്രസിഡണ്ട് മുംതാസ് ടീച്ചർ, കുന്നത്തുനാട് ഗ്രാമപഞ്ചായത്ത് പ്രസിഡൻറ് ജിജോ വി തോമസ്, കിഴക്കമ്പലം ഗ്രാമപഞ്ചായത്ത് പ്രസിഡണ്ട് കെ വി ജേക്കബ്, വിനോദ സഞ്ചാരവകുപ്പ് ജോയിൻ ഡയറക്ടർ നന്ദകുമാർ കെ പി ജില്ലാ പഞ്ചായത്ത് മെമ്പർ സി കെ അയ്യപ്പൻകുട്ടി, ബ്ലോക്ക് പഞ്ചായത്ത് മെമ്പർ കെ കെ രമേശ് തുടങ്ങിയവർ പങ്കെടുത്തു.