ഒളിമ്പിക്സ് ഹോക്കിയിൽ രണ്ടാം തവണയും വെങ്കലമെഡല് നേട്ടം കൈവരിച്ച പി.ആര്.ശ്രീജേഷിനായി സംസ്ഥാന സർക്കാർ സംഘടിപ്പിക്കുന്ന അനുമോദന ചടങ്ങിൽ സർക്കാർ പ്രഖ്യാപിച്ച രണ്ടു കോടി രൂപയുടെ പാരിതോഷികം മുഖ്യമന്ത്രി പിണറായി വിജയൻ സമ്മാനിക്കും. 30 ന് വൈകിട്ട് 4ന് വെള്ളയമ്പലം ജിമ്മി ജോര്ജ്ജ് ഇന്ഡോര് സ്റ്റേഡിയത്തിലാണ് ചടങ്ങ്.
ചടങ്ങിൽ കായികവകുപ്പ് മന്ത്രി വി.അബ്ദുറഹിമാന് അദ്ധ്യക്ഷത വഹിക്കും. ഏഷ്യന് ഗെയിംസ് മെഡല് ജേതാക്കളായ അഞ്ച് താരങ്ങളെ പൊതുവിദ്യാഭ്യാസ വകുപ്പില് അസിസ്റ്റൻ്റ് സ്പോര്ട്സ് ഓര്ഗനൈസറായി നിയമിച്ചുള്ള ഉത്തരവ് ചടങ്ങില് പൊതുവിദ്യാഭ്യാസ വകുപ്പ് മന്ത്രി വി.ശിവന്കുട്ടി വിതരണം ചെയ്യും.
വൈകിട്ട് മൂന്നരയോടെ മാനവീയം വീഥിയുടെ പരിസരത്തു നിന്നു ശ്രീജേഷിനെ സ്വീകരിച്ച് തുറന്ന ജീപ്പില് ജിമ്മി ജോര്ജ്ജ് ഇന്ഡോര് സ്റ്റേഡിയത്തിലേക്ക് ആനയിക്കും. 10 സ്കൂള് ബാന്റ് സംഘങ്ങളും ജി.വി.രാജ സ്പോര്ട്സ് സ്കൂൾ, സ്പോര്ട്സ് കൗണ്സില് ഹോസ്റ്റല്ലുകൾ, വിവിധ വിദ്യാഭ്യാസ സ്ഥാപനങ്ങള് എന്നിവിടങ്ങളിലെ കുട്ടികള് അകമ്പടിയേകും.
അന്താരാഷ്ട്ര, ദേശീയ കായികതാരങ്ങളും കായിക അസോസിയേഷന് പ്രതിനിധികളും ചടങ്ങില് പങ്കെടുക്കും.