വയനാട് ജില്ലാ സാമൂഹ്യനീതി ഓഫീസിന്റെ ആഭിമുഖ്യത്തിൽ അന്താരാഷ്ട്ര വയോജന ദിനാചരണം സംഘടിപ്പിച്ചു. കൽപ്പറ്റ ക്ലാരാഭവൻ ഓൾഡ് ഏജ് ഹോമിൽ സംഘടിപ്പിച്ച പരിപാടി ജില്ലാ പഞ്ചായത്ത് പ്രസിഡൻ്റ് സംഷാദ് മരക്കാർ ഉദ്ഘാടനം ചെയ്തു. സീനിയർ ഡിവിഷൻ സിവിൽ ജഡ്ജി കെ. അനീഷ് ചാക്കോ മുഖ്യാതിഥിയായി. സംസ്ഥാന സർക്കാരിന്റെ വയോസേവന അവാർഡ് കരസ്ഥമാക്കിയ മാനന്തവാടി ബ്ലോക്ക് പഞ്ചായത്തിനെയും സംസ്ഥാന അത്‍ലറ്റിക്സ് ചാമ്പ്യൻഷിപ്പിൽ 70 വയസ്സിന് മുകളിൽ പ്രായമുള്ള വിജയികളായ കായിക താരങ്ങളെയും ജില്ലയിലെ ഏറ്റവും മുതിർന്ന അംഗമായ 107കാരി മോഹയെയും ആദരിച്ചു.

മോട്ടിവേഷൻ സ്പീക്കർ വി.കെ സുരേഷ്‌ബാബു ക്ലാസ് നയിച്ചു. വിവിധ ഓൾഡ് എജ് ഹോമുകളിൽ നിന്നുള്ള താമസക്കാരുടെ കലാപരിപാടികളും അരങ്ങേറി. പരിപാടിയിൽ ജില്ലാ സാമൂഹ്യനീതി ഓഫീസർ എസ്. ഗിഫ്റ്റ്സൺ രാജ് അദ്ധ്യക്ഷത വഹിച്ചു. കൽപ്പറ്റ നഗരസഭാ കൗൺസിലർ സി. ഷരീഫ, വയോജന ജില്ലാ കമ്മിറ്റി അംഗങ്ങളായ സി.കെ.ഉണ്ണികൃഷ്ണൻ, അനിത, കെ.എസ്.എസ്.എം ജില്ലാ കോ ഓർഡിനേറ്റർ സിനോജ് കെ ജോർജ്, ജില്ലാസാമൂഹ്യനീതി ഓഫീസ് ജൂനിയർ സൂപ്രണ്ട് ഷീബ പനോളി എന്നിവർ സംസാരിച്ചു.