ഓഖി ചുഴലിക്കാറ്റില്‍ കാണാതായവരെക്കുറിച്ചുള്ള പരാതി അടുത്തുള്ള പോലീസ് സ്റ്റേഷനില്‍ ജനുവരി 15 ന് മുമ്പ് നല്‍കണമെന്ന് സംസ്ഥാന ദുരിതാശ്വാസ കമ്മീഷണര്‍ അറിയിച്ചു. കാണാതായ വ്യക്തിയുടെ അടുത്ത ബന്ധുക്കള്‍ പോലീസ് നിര്‍ദേശാനുസരണം തിരുവനന്തപുരം രാജീവ് ഗാന്ധി സെന്റര്‍ ഫോര്‍ ബയോടെക്‌നോളജിയില്‍ ഡി.എന്‍.എ ടെസ്റ്റ് നടത്തുന്നതിന് സഹകരിക്കണം.
ഇപ്പോള്‍ മോര്‍ച്ചറിയില്‍ സൂക്ഷിച്ചിട്ടുള്ള മൃതദേഹങ്ങളുടെ ഡി.എന്‍.എ സാമ്പിള്‍ രാജീവ് ഗാന്ധി സെന്റര്‍ ഫോര്‍ ബയോടെക്‌നോളജിയില്‍ ശേഖരിച്ചിട്ടുണ്ട്. കാണാതായ വ്യക്തികളുടെ ഡി.എന്‍.എ അടുത്ത ബന്ധുക്കളുടേതുമായി ഒത്തുനോക്കേണ്ടതുണ്ട്.
ജനുവരി 22 നകം ഡി.എന്‍.എ ഒത്തുനോക്കല്‍ പ്രക്രിയ പൂര്‍ത്തിയാകും. ഡി.എന്‍.എ ചേരുന്ന മൃതദേഹങ്ങള്‍ കുടുംബത്തിന് വിട്ടു നല്‍കും. ജനുവരി 22 ന് ശേഷം മൃതദേഹങ്ങള്‍ നിയമം അനുശാസിക്കുന്ന വിധം മറവു ചെയ്യുമെന്നും ദുരിതാശ്വാസ കമ്മീഷണര്‍ അറിയിച്ചു.
പി.എന്‍.എക്‌സ്.100/18
ഹയര്‍സെക്കണ്ടറി സേ പരീക്ഷയ്ക്ക് ഗള്‍ഫില്‍ പരീക്ഷാ കേന്ദ്രം
ഹയര്‍ സെക്കണ്ടറി രണ്ടാംവര്‍ഷ സേ ഇംപ്രൂവ്‌മെന്റ് പരീക്ഷ നടത്തുന്നതിന് ഗള്‍ഫ് മേഖലയില്‍ സര്‍ക്കാരിന് അധിക സാമ്പത്തിക ബാധ്യത ഇല്ലാത്തവിധത്തില്‍ ഒരു പരീക്ഷാകേന്ദ്രം അനുവദിച്ച് പൊതു വിദ്യാഭ്യാസവകുപ്പ് ഉത്തരവായി. ഈ പരീക്ഷാകേന്ദ്രത്തിലേക്ക് പരീക്ഷാ നടത്തിപ്പിന് സര്‍ക്കാര്‍/ഹയര്‍ സെക്കണ്ടറി ഡയറക്ടറേറ്റില്‍ നിന്ന് ഒരു ഉദ്യോഗസ്ഥനെ നിയോഗിക്കുന്നതിനും അനുമതി നല്‍കി ഉത്തരവായി