കാക്കനാട്: കൊച്ചി നഗരത്തിലെ വെള്ളക്കെട്ട് പരിഹരിക്കുന്നതിന് പ്രധാന കനാലുകൾ വൃത്തിയാക്കുന്നതടക്കമുള്ള ജോലികൾ ഉടൻ ആരംഭിക്കുമെന്ന് ജില്ലാ കളക്ടർ എസ്.സുഹാസ് ജില്ലാ വികസന സമിതി യോഗത്തിൽ അറിയിച്ചു. ജില്ലാ ദുരന്ത നിവാരണ അതോറിറ്റിയുടെ മേൽനോട്ടത്തിലായിരിക്കും പദ്ധതികൾ നടപ്പാക്കുക. ഇതിനായുള്ള നടപടിക്രമങ്ങളെല്ലാം പൂർത്തിയായതായും കളക്ടർ അറിയിച്ചു.

കനത്ത മഴയെ തുടർന്ന് പെട്ടെന്നുണ്ടാകുന്ന വെള്ളക്കെട്ട് പരിഹരിക്കാനുള്ള നടപടികളാണ് ആദ്യമുണ്ടാകുക. ഇതിനായി 10 കോടി രൂപയുടെ പദ്ധതി നടപ്പിലാക്കും. ഇതിൽ കെ.എം.ആർ.എലിന്റെ സഹകരണവുമുണ്ടാകും. കൂടുതൽ പഠനങ്ങൾക്കായി ജില്ലയിലെ ഭൂരിഭാഗം എഞ്ചിനീയർമാരെയും ഉൾപ്പെടുത്തി സാങ്കേതിക വിദഗ്ധരുടെ സംഘവും രൂപീകരിക്കും.

കുസാറ്റിന്റെ സാങ്കേതിക വിദഗ്ധർ ഇതിന്റെ മേൽനോട്ടം വഹിക്കും. റസിഡന്റ്സ് അസോസിയേഷനുകളുടെ സഹകരണത്തോടെ കാനകളിൽ ബ്ലോക്കുകളുള്ള പ്രദേശങ്ങൾ തിരിച്ചറിയും. ആർക്കൈവ്സ് വകുപ്പിന്റെ സഹകരണത്തോടെ നഗരത്തിലെ ഡ്രയിനേജ് സംവിധാനങ്ങൾ കണ്ടെത്തും. പേര ണ്ടൂർ, മുല്ലശ്ശേരി, ഇടപ്പള്ളി തുടങ്ങിയ പൊതു കനാലുകൾ ശുചീകരിക്കുന്നതിനുള്ള നടപടികളും ഇതോടൊപ്പം ഉണ്ടാകും.

തീരദേശ പരിപാലന നിയമത്തിന്റെ ലംഘനങ്ങൾക്കെതിരെ കർശന നടപടികൾ സ്വീകരിക്കുമെന്നും ജില്ലാ കളക്ടർ യോഗത്തിൽ അറിയിച്ചു. ഇത് കണ്ടു പിടിക്കുന്നതിനായുള്ള നടപടികൾ സ്വീകരിക്കും. കൊച്ചി സബ് കളക്ടറുടെ ഓഫീസ് കേന്ദ്രീകരിച്ചായിരിക്കും നടപടികൾ. ലംഘനം ശ്രദ്ധയിൽ പെട്ടാൽ നോട്ടീസ് അയക്കും. ഇതിനായുള്ള കമ്മിറ്റി രൂപീകരിച്ചു കഴിഞ്ഞതായും കളക്ടർ അറിയിച്ചു.

ജില്ലയിലെ മാലിന്യ സംസ്കരണം കൃത്യമായ രീതിയിൽ നടപ്പിലാക്കുന്നതിനായി നടപടികൾ സ്വീകരിച്ചതായും കളക്ടർ അറിയിച്ചു. ഏറ്റവും കൂടുതൽ മാലിന്യപ്രശ്നം നേരിടുന്ന കളമശേരി നഗരസഭക്ക് പ്രശ്ന പരിഹാരത്തിനായി മൂന്നു കോടി രൂപ അനുവദിച്ചിട്ടുണ്ട്.

റോഡുകളുടെ അറ്റകുറ്റപണികൾ വേഗത്തിൽ പൂർത്തിയാക്കണമെന്ന് എംഎൽഎ മാർ യോഗത്തിൽ ആവശ്യപ്പെട്ടു. മരട്കുടിവെള്ള പദ്ധതി നടപ്പിലാക്കുന്നതിനുള്ള കാലതാമസം ഒഴിവാക്കി പണികൾ പൂർത്തിയാക്കണമെന്ന് എം.സ്വരാജ് എം എൽ എ ആവശ്യപ്പെട്ടു.

2018-ലെ പ്രളയത്തിൽ വിളനാശം സംഭവിച്ച ഇൻഷ്വർ ചെയ്ത കർഷകർക്കുള്ള നഷ്ടപരിഹാരം ജില്ലയിൽ പൂർണമായും നൽകിയിട്ടുണ്ടെന്ന് പ്രിൻസിപ്പൽ അഗ്രികൾച്ചറൽ ഓഫീസർ അറിയിച്ചു. 2019 -20 വർഷം 1.55 കോടി രൂപ അനുവദിച്ചിട്ടുണ്ട്. 2018-19, 2019-20 വർഷങ്ങളിൽ വിള ഇൻഷ്വറൻസ് നഷ്ടപരിഹാരമായി 3,33,80,614 രൂപയും അനുവദിച്ചിട്ടുണ്ട്.

ജില്ലാ പ്ലാനിംഗ് ഓഫീസർ ലിറ്റി മാത്യു, എം എൽ എ മാരായ എൽദോസ് കുന്നപ്പിള്ളി, ആന്റണി ജോൺ, എം.സ്വരാജ് , വി.പി. സജീന്ദ്രൻ, പി.ടി.തോമസ്, ജില്ലാ പഞ്ചായത്ത് പ്രസിഡന്റ് ഡോളി കുര്യാക്കോസ് എന്നിവർ പങ്കെടുത്തു.