സംസ്ഥാനത്ത് നിക്ഷേപം നടത്താൻ തയ്യാറാകുന്ന സംരംഭകരുടെ സംശയ നിവാരണത്തിനും ആവശ്യമായ സഹായം നൽകുന്നതിനും ടോൾ ഫ്രീ സംവിധാനം തയ്യാറായതായി മുഖ്യമന്ത്രി പിണറായി വിജയൻ അറിയിച്ചു. 18008901030 ആണ് നമ്പർ. രാവിലെ എട്ട് മണി മുതൽ രാത്രി എട്ട് മണി വരെ ആഴ്ചയിൽ ആറു ദിവസം സേവനം ലഭിക്കും. മലയാളത്തിലും ഇംഗ്ളീഷിലും സംശയനിവാരണം നടത്താനാവും. കെ സ്വിഫ്റ്റ് 2.0 പതിപ്പും പുതിയ സംവിധാനങ്ങളും ഉദ്ഘാടനം ചെയ്യുകയായിരുന്നു അദ്ദേഹം.
പദ്ധതി ചെലവ് എത്രയായാലും മലിനീകരണ നിയന്ത്രണ ബോർഡിന്റെ റെഡ് കാറ്റഗറി വിഭാഗത്തിൽ പെടാത്ത സംരംഭങ്ങൾക്ക് ഏഴു ദിവസത്തിനുള്ളിൽ അനുമതി നൽകും. അഞ്ച് അംഗ സമിതി ഇതിനുള്ള അപേക്ഷ പരിഗണിക്കും. ഈ സമിതിയെ സഹായിക്കാൻ ഇൻവെസ്റ്റ്മെന്റ് ഫെസിലിറ്റേഷൻ സെൽ രൂപീകരിച്ചിട്ടുണ്ടെന്ന് മുഖ്യമന്ത്രി പറഞ്ഞു.
നിക്ഷേപകർക്ക് എല്ലാ സഹായവും പിന്തുണയും സർക്കാർ നൽകും. സർക്കാരിന്റെ നയപരമായ തീരുമാനങ്ങൾ, പുതിയ പദ്ധതികൾ തുടങ്ങിയ കാര്യങ്ങൾ ഉൾപ്പെടുത്തി ഇൻവെസ്റ്റ് കളക്റ്റ് എന്ന ഇ ന്യൂസ് ലെറ്റർ ആരംഭിച്ചിട്ടുണ്ട്. ഇത് എല്ലാ മാസവും പ്രസിദ്ധീകരിക്കും.
കെ സ്വിഫ്റ്റിന്റെ പരിഷ്‌കരിച്ച പതിപ്പ് വ്യാവസായിക വളർച്ചയ്ക്ക് സഹായിക്കും. സംരംഭങ്ങളുടെ ലൈസൻസും അനുമതിയും ഓൺലൈനിൽ പുതുക്കാനാവും. പ്രൊഫഷണൽ ടാക്സ് നൽകാനും ഓൺലൈൻ സംവിധാനമായിട്ടുണ്ട്. ഈസ് ഓഫ് ഡൂയിംഗ് ബിസിനസിന്റെ ഭാഗമായി ഏഴു നിയമങ്ങളും പത്ത് ചട്ടങ്ങളും ഭേദഗതി ചെയ്തു. നിക്ഷേപകരിൽ ആവേശം ഉളവാക്കിയ ഇടപെടലായിരുന്നു അത്.
കേരളം നിക്ഷേപ സൗഹൃദ സംസ്ഥാനമല്ലെന്ന പ്രതീതി മാറ്റാൻ കഴിഞ്ഞ നാലരവർഷത്തെ ഇടപെടലിലൂടെ കഴിഞ്ഞു. നോക്കുകൂലി പോലെയുള്ള ദുഷ്പ്രവണതയ്ക്കും അറുതി വരുത്താനായി. എങ്കിലും വളരെ അപൂർവമായി ഇത് ചിലയിടങ്ങളിൽ തുടരുന്നു. തെറ്റായ ഇത്തരം നടപടികൾക്ക് ആരുടെയും പിന്തുണയില്ല. നിയമവിരുദ്ധമായി പ്രവൃത്തിയാണിത്. തെറ്റായ ഇത്തരം നീക്കങ്ങൾ കണ്ടാൽ ഇടപെടേണ്ട ഏജൻസികൾ അറച്ചു നിൽക്കരുത്. തെറ്റുകണ്ടാൽ ശക്തമായി ഇടപെട്ട് കർശന നടപടി സ്വീകരിക്കണമെന്ന് മുഖ്യമന്ത്രി പറഞ്ഞു.
വ്യവസായ സൗഹൃദ കേരളം: യാഥാർഥ്യമാകുന്നത് നാല് പരിഷ്കാരങ്ങൾ
കേരളത്തെ കൂടുതല്‍ നിക്ഷേപ സൗഹൃദമാക്കുന്നതിന് പരിഷ്‌ക്കാര നടപടികള്‍ സര്‍ക്കാര്‍ പ്രഖ്യാപിച്ചു. നാലിന പ്രഖ്യാപനങ്ങള്‍ മുഖ്യമന്ത്രി പിണറായി വിജയന്‍ നടത്തി. സംരംഭകര്‍ക്ക് ആവശ്യമായ വിവരങ്ങള്‍ ലഭ്യമാക്കുന്നതിന് ടോള്‍ ഫ്രീ സംവിധാനം, ഏകജാലക സംവിധാനമായ കെ സ്വിഫ്റ്റിന്റെ പുതിയ പതിപ്പ്, ഇന്‍വെസ്റ്റ്‌മെന്റ് ഫെസിലിറ്റേഷന്‍ സെല്‍, ഇ-ന്യൂസ് ലെറ്ററായ ഇന്‍വെസ്റ്റ് കണക്റ്റ് എന്നിവയാണ് പരിഷ്‌കാര നടപടികള്‍.
ടോള്‍ ഫ്രീ നമ്പര്‍
സംരംഭകരുടെ സംശയങ്ങള്‍ക്ക് മറുപടി നല്‍കാനാണ് ടോള്‍ ഫ്രീ നമ്പര്‍ ഒരുക്കിയിട്ടുള്ളത്. 1800 890 1030 എന്നതാണ് നമ്പര്‍. സംരംഭം തുടങ്ങാന്‍ ഏതൊക്കെ അനുമതികള്‍ എവിടെ നിന്നെല്ലാം ലഭിക്കും , എവിടെ നിന്ന് ധന സഹായം ലഭ്യമാകും, എവിടെയെല്ലാം അടിസ്ഥാന സൗകര്യങ്ങള്‍ നിലവിലുണ്ട് തുടങ്ങി എല്ലാവിധ വിവരങ്ങളും ടോള്‍ ഫ്രീ നമ്പറില്‍ ലക്ഷ്യമാണ്. രാവിലെ എട്ടു മണി മുതല്‍ വൈകീട്ട് എട്ടുവരെ ആളുകള്‍ക്ക് വിളിക്കാം. മലയാളത്തിലും ഇംഗ്ലീഷിലും സേവനങ്ങള്‍ ലഭ്യമാണ്.
കെ.സ്വിഫ്റ്റ് 2.0
നിക്ഷേപം തുടങ്ങുന്നതിനുള്ള ലൈസന്‍സുകളും മറ്റ് അനുമതികളും വേഗത്തില്‍ ലഭ്യമാക്കാന്‍ ആരംഭിച്ച കെ.സ്വിഫ്റ്റ് സംവിധാനം പരിഷ്‌ക്കരിച്ചു. പുതിയ പതിപ്പായ കെ.സ്വിഫ്റ്റ് 2.0 വഴി ലൈസന്‍സുകളും അനുമതികളും പുതുക്കുന്നതിനും അവസരമുണ്ട്. എന്റര്‍പ്രണര്‍ സപ്പോര്‍ട്ട് സ്‌കീം വഴിയുള്ള ഇന്‍സെന്റീവ് ലഭിക്കുന്നതിനുള്ള ഓണ്‍ലൈന്‍ സംവിധാനം, പ്രൊഫഷണല്‍ ടാക്സ് അടയ്ക്കുന്നതിനുള്ള സംവിധാനം എന്നിവയും ഇനി കെ.സ്വിഫ്റ്റിന്റെ ഭാഗമാണ്.
ഇന്‍വെസ്റ്റ്‌മെന്റ് ഫെസിലിറ്റേഷന്‍ സെല്‍
സംരംഭക അനുമതിക്കുള്ള അപേക്ഷകള്‍ പരിഗണിക്കേണ്ട അഞ്ചംഗ സമിതിയെ സഹായിക്കാനാണ് ഇന്‍വെസ്റ്റ്‌മെന്റ് ഫെസിലിറ്റേഷന്‍ സെല്‍ രൂപീകരിക്കുന്നത്. കോള്‍ സെന്റര്‍ വഴി പരിഹരിക്കപ്പെടാത്ത സംശയങ്ങള്‍ക്ക് നിവാരണം ഉണ്ടാക്കാന്‍ സെല്‍ സഹായിക്കും.
ഇന്‍വെസ്റ്റ് കണക്ട് ഇ-ന്യൂസ് ലെറ്റർ
വ്യവസായ സംബന്ധമായ അറിയിപ്പുകള്‍ നല്‍കുന്നതിനുള്ള പ്രതിമാസ ഇ-ന്യൂസ് ലെറ്ററാണ് ഇന്‍വെസ്റ്റ് കണക്ട്. പുതിയ വ്യവസായ സംരംഭങ്ങള്‍, നയപരമായ തീരുമാനങ്ങള്‍, സര്‍ക്കാരിന്റെ പദ്ധതികള്‍ എന്നിവയെ കുറിച്ച് വിവരങ്ങള്‍ ന്യൂസ് ലെറ്ററില്‍ നല്‍കും.
ഈസ് ഓഫ് ഡൂയിംഗ് ബിസിനസിന്റെ ഭാഗമായി നടപ്പാക്കുന്ന നടപടികള്‍ക്ക് കരുത്തുപകരുന്നതാണ് പുതിയ പരിഷ്‌ക്കാരങ്ങള്‍.