കോട്ടയം: തദ്ദേശ സ്ഥാപന തിരഞ്ഞെടുപ്പിനായി ഇലക്ട്രോണിക് വോട്ടിംഗ് യന്ത്രങ്ങളില്‍ സ്ഥാനാര്‍ഥികളുടെ പേരുകളും ചിഹ്നവുമടങ്ങിയ ലേബലുകള്‍ ക്രമീകരിക്കുന്ന കാന്‍ഡിഡേറ്റ് സെറ്റിംഗ് ഡിസംബര്‍ ആറ്, ഏഴ് തീയതികളില്‍ നടക്കും. വിതരണ, സ്വീകരണ കേന്ദ്രങ്ങളില്‍ സ്ഥാനാര്‍ഥികളുടെ സാന്നിധ്യത്തിലാണ് കാന്‍ഡിഡേറ്റ് സെറ്റിംഗ് നടത്തുന്നത്. സ്ഥാനാര്‍ഥികളുടെ അഭാവത്തില്‍ ഏജന്റിന് പങ്കെടുക്കാം.
ഇതിനായുള്ള വോട്ടിംഗ് യന്ത്രങ്ങള്‍ ഡിസംബര്‍ നാല് , അഞ്ച് തീയതികളില്‍ അതത് റിട്ടേണിംഗ് ഓഫിസര്‍മാര്‍ക്കു വിതരണം ചെയ്യും. പഞ്ചായത്ത് മേഖലകളില്‍ ഗ്രാമപഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവിടങ്ങളിലേക്കായി മൂന്നു ബാലറ്റ് യൂണിറ്റുകളാണ് ഉപയോഗിക്കുന്നത്. ഗ്രാമ പഞ്ചായത്ത്, മുനിസിപ്പാലിറ്റി തിരഞ്ഞെടുപ്പുകള്‍ക്ക് വെള്ള ലേബലാണ് ഉപയോഗിക്കുന്നത്. ബ്ലോക്ക് പഞ്ചായത്തിലും ജില്ലാ പഞ്ചായത്തിലും യഥാക്രമം പിങ്ക്, ഇളം നീല ലേബലുകളാണുള്ളത്.
മത്സരിക്കുന്ന സ്ഥാനാര്‍ഥികളുടെ എണ്ണം 15-ല്‍ കൂടുതലാണെങ്കില്‍ അധികമായി ഒരു ബാലറ്റ് യൂണിറ്റ് കൂടി ഉപയോഗിക്കും. കാന്‍ഡിഡേറ്റ് സെറ്റിംഗിനു ശേഷം പ്രവര്‍ത്തനം കൃത്യമെന്ന് ഉറപ്പാക്കുന്നതിന് മോക് പോള്‍ നടത്തും.
കോവിഡ് പ്രോട്ടോക്കോള്‍ പൂര്‍ണമായും പാലിച്ചാണ് കാന്‍ഡിഡേറ്റ് സെറ്റിംഗ് നടത്തുന്നത്. ഇതിനുള്ള ഹാളുകള്‍ തലേന്ന് അണുവിമുക്തമാക്കും. സാമൂഹിക അകലം ഉറപ്പുവരുത്തി പരമാവധി 30 പേരെ മാത്രമേ ഹാളില്‍ പ്രവേശിപ്പിക്കൂ.
കാന്‍ഡിഡേറ്റ് സെറ്റിംഗ് പൂര്‍ത്തിയാക്കി വോട്ടിംഗ് യന്ത്രങ്ങള്‍ വരണാധികാരികളുടെ മേല്‍നോട്ടത്തില്‍ സ്‌ട്രോംഗ് റൂമുകളിലേക്ക് മാറ്റും. ഇവിടെനിന്നാണ് പോളിംഗ് സാമഗ്രികളുടെ വിതരണം നടത്തുക. ഡിസംബര്‍ ഒന്‍പതിനാണ് ജില്ലയില്‍ ഇലക്ട്രോണിക് വോട്ടിംഗ് യന്ത്രങ്ങളുടെയും മറ്റു പോളിംഗ് സാമഗ്രികളുടെയും വിതരണം.