കാസർഗോഡ്: മികച്ച തൊഴിൽ അവസരങ്ങൾ സൃഷ്ടിക്കുന്ന മേഖലകളിലേക്ക് വിദ്യാർഥികളെ കൈപിടിച്ചുയർത്തി അസാപ്. കോവിഡ് കാലത്ത് നൂതന നൈപുണ്യ കോഴ്സുകൾ വീട്ടിലിരുന്നും പഠിക്കാൻ പഠിതാക്കൾക്ക് അവസരമൊരുക്കുകയാണ് അസാപ്. ഗ്രാഫിക് ഡിസൈനർ, സൈബർ സെക്യൂരിറ്റി, ഫുൾ സ്റ്റാക്ക് ഡെവലപ്പർ, അസാപ് ആമസോൺ വെബ് സർവീസ് അക്കാദമി – ക്‌ളൗഡ് കമ്പ്യൂട്ടിങ് കോഴ്സുകളിലേക്കാണ് അപേക്ഷ ക്ഷണിച്ചിട്ടുള്ളത്.
കോഴ്സ് വിജയകരമായി പൂർത്തിയാക്കുന്ന വിദ്യാർത്ഥികൾക്ക്, നബാർഡും മറ്റ് സർക്കാർ ഏജൻസികളും ചേർന്ന് ലഭ്യമാക്കുന്ന സബ്‌സിഡി ഉപയോഗിച്ച് അടച്ച ഫീസിന്റെ 50 ശതമാനം തിരികെ ലഭിക്കും. കോഴ്സ് വിജയകരമായി പൂർത്തിയാക്കുന്ന വിദ്യാർത്ഥികൾക്ക് ജോലിയും ഉറപ്പു നൽകുന്നു. അസാപിന്റെ വിവിധ കോഴ്സുകളുടെ വിവരങ്ങൾ ചുവടെ ചേർക്കുന്നു:
ഗ്രാഫിക് ഡിസൈനർ കോഴ്സ്
216 മണിക്കൂർ ദൈർഘ്യമുള്ള ഗ്രാഫിക് ഡിസൈനർ കോഴ്സിലേക്ക് അപേക്ഷിക്കാം. സർട്ടിഫിക്കേഷൻ ഉൾപ്പെടെ ഫീസ് 16000 രൂപ. 8000 രൂപയും ജി.എസ്.ടിയുമാണ് വിദ്യാർത്ഥികൾ ആദ്യം അടക്കേണ്ടത്. ഈ കോഴ്സ് വനിതകൾക്ക് വേണ്ടി മാത്രമാണ്. ഗ്രാഫിക് ഡിസൈനിംഗ്, ഇ-ലേണിംഗ് എന്നിവയിൽ താൽപര്യമുള്ള, ഗ്രാമങ്ങളിൽനിന്നുള്ള ബിരുദധാരികളായ വനിതകൾക്ക് കോഴ്‌സിൽ പങ്കെടുക്കാം. 50 സീറ്റ് മാത്രം. പ്രായപരിധി 26 വയസ്സ്. അഡോബ് ഫോട്ടോഷോപ്പ്, ഇല്ലസ്ട്രേറ്റർ, ഇൻഡിസൈൻ, ആഫ്റ്റർ എഫക്ട്, പ്രീമിയർ പ്രോ ആന്റ് ആർട്ടികുലേറ്റ് സ്റ്റോറിലൈൻ എന്നീ സോഫ്റ്റ് വെയറുകൾ വളരെ കുറഞ്ഞ നിരക്കിൽ പഠിക്കാനുള്ള അവസരമാണിത്.
ക്‌ളൗഡ് കമ്പ്യൂട്ടിങ് കോഴ്സ്
അസാപ്പ് എ.ഡബ്ല്യൂ.എസ് അക്കാദമി ക്‌ളൗഡ് കമ്പ്യൂട്ടിങ് കോഴ്സിലേക്ക് അപേക്ഷ ക്ഷണിച്ചു. 320 മണിക്കൂറാണ് കോഴ്സ് കാലാവധി. സർട്ടിഫിക്കേഷൻ ഉൾപ്പടെ 19,900 രൂപയാണ് ഫീസ്. 9950 രൂപയും ജി.എസ്.ടിയുമാണ് വിദ്യാർത്ഥികൾ ആദ്യം അടയ്‌ക്കേണ്ട തുക. എ.ഡബ്ല്യൂ.എസ് ഗ്ലോബൽ സർട്ടിഫിക്കേഷൻ നൽകുന്ന കോഴ്സിലേക്ക് ബി.ടെക് (ഇ.സി, ഇ.ഇ, സി.എസ്, ഐ.ടി), ബി.സി.എ, എം.സി.എ, എം.ടെക് യോഗ്യതയുള്ളവർക്ക് അപേക്ഷിക്കാം.
സൈബർ സെക്യൂരിറ്റി-സെക്യൂരിറ്റി ഓപ്പറേഷൻസ് സെന്റർ അനലിസ്റ്റ് കോഴ്സ്
320 മണിക്കൂർ കാലാവധിയുള്ള കോഴ്സിന്റെ ഫീസ് സർട്ടിഫിക്കേഷൻ ഉൾപ്പെടെ 19,900 രൂപയാണ്. 9950 രൂപയും ജി.എസ്.ടിയുമാണ് വിദ്യാർത്ഥികൾ ആദ്യം അടയ്‌ക്കേണ്ട തുക. ബി.ടെക് (ഇ.സി, ഇ.ഇ, സി.എസ്, ഐ.ടി), ബി.സി.എ, എം.സി.എ, എം.ടെക് യോഗ്യതയുള്ളവർക്ക് അപേക്ഷിക്കാം. സൈബർ സെക്യൂരിറ്റി സർട്ടിഫിക്കേഷനിലെ അന്താരാഷ്ട്ര കൗൺസിലായ ഇ.സി കൗൺസിലാണ് കോഴ്സ് വിജകയകരമായി പൂർത്തിയാക്കുന്നവർക്കുള്ള സർട്ടിഫിക്കറ്റ് നൽകുന്നത്.
100% പ്ലേസ്മെന്റ് സപ്പോർട്ട് നൽകുന്ന കോഴ്സ് വിജയകരമായി പൂർത്തിയാക്കുന്ന 70% വിദ്യാർത്ഥികൾക്കും ജോലി ലഭ്യമാക്കുന്നതാണ്.
ഫുൾ സ്റ്റാക്ക് ഡെവലപ്പർ കോഴ്സ്
320 മണിക്കൂർ കാലാവധിയുള്ള കോഴ്സിന് സർട്ടിഫിക്കേഷൻ ഉൾപ്പെടെ 19,900 രൂപയാണ് ഫീസ്. 9950 രൂപയും ജി.എസ്.ടിയുമാണ് വിദ്യാർത്ഥികൾ ആദ്യം അടക്കേണ്ടത്. കോഴ്സ് വിജയകരമായി പൂർത്തിയാക്കുന്ന വിദ്യാർത്ഥികൾക്ക് സെക്ടർ സ്‌കിൽ കൗൺസിൽ എൻ.എ.എസ്.സി.ഒ.എം.എം നൽകുന്ന സർട്ടിഫിക്കറ്റ് ലഭിക്കും.
ബി.ടെക് (ഇ.സി, ഇ.ഇ, സി.എസ്, ഐ.സി), ബി.സി.എ, എം.സി.എ, എം.ടെക് യോഗ്യതയുള്ളവർക്ക് അപേക്ഷിക്കാം.
ഓൺലൈനായും ഓഫ്‌ലൈനായും നടക്കുന്ന കോഴ്സുകളുടെ സെന്ററുകൾ തിരുവനന്തപുരവും എറണാകുളവും ആണ്. രജിസ്‌ട്രേഷനും കൂടുതൽ വിവരങ്ങൾക്കുമായി http://asapkerala.gov.in/?q=node/1241 സന്ദർശിക്കണം.