ന്യൂനപക്ഷ ക്ഷേമ വകുപ്പിന്റെ ആഭിമുഖ്യത്തില്‍ നാലു ദിവസം നീണ്ടു നില്‍ക്കുന്ന സൗജന്യ വിവാഹപൂര്‍വ കൗണ്‍സലിങ് കോഴ്‌സിന് മേല്‍മുറി സ്വലാത്ത് നഗര്‍ മഅദിന്‍ മൈനോറിറ്റി പി.എസ്.സി കോച്ചിങ് സെന്ററില്‍ തുടക്കമായി. വേങ്ങര ന്യൂനപക്ഷ യുവജന പരിശീലന കേന്ദ്രം പ്രിന്‍സിപ്പല്‍ പ്രൊഫ. പി. മമ്മദ് ഉദ്ഘാടനം ചെയ്തു. മഅദിന്‍ മാനേജര്‍ ദുല്‍ഫുവാറലി സഖാഫി അധ്യക്ഷനായി. വിവിധ സെഷനുകളില്‍ ഡോ.സി.പി അഷറഫ്, അഡ്വ. ഷംസുദ്ദീന്‍ എന്നിവര്‍ ക്ലാസുകളെടുത്തു. വിവാഹം അതിന്റെ സാമൂഹികത, വിവാഹത്തിന്റെ ധാര്‍മിക/ നൈതിക / മാനവിക/ മൂല്യങ്ങള്‍, ആരോഗ്യ കുടുംബജീവിതം, മാനുഷിക ബന്ധങ്ങള്‍, കുടുംബബന്ധങ്ങള്‍, ലൈംഗിക ആരോഗ്യം, പാരന്റിങ്, കുടുംബ ബഡ്ജറ്റ്, വിവാഹവും നിയമവശങ്ങളും എന്നീ വിഷയങ്ങളില്‍ നാലുദിവസത്തെ ക്ലാസുകളാണ് നടക്കുന്നത്. ലത്തീഫ് പൂവത്തിക്കല്‍, മുഹമ്മദ് അസറത്ത്, നിസാര്‍ സഖാഫി എന്നിവര്‍ പങ്കെടുത്തു.
