കോട്ടയം: കൂരോപ്പട കൃഷിഭവന്റെ ‘ഞങ്ങളും കൃഷിയിലേക്ക് ‘ പദ്ധതിയുടെ ഭാഗമായി പച്ചക്കറി കൃഷിയുമായി ളാക്കാട്ടൂര്‍ എം.ജി.എം.എന്‍.എസ്.എസ്. ഹയര്‍ സെക്കന്‍ഡറി സ്‌കൂള്‍. സമ്പാദ്യശീലം പോത്സാഹിപ്പിക്കുക, കൃഷി അറിവുകള്‍ വളര്‍ത്തുക എന്നീ ലക്ഷ്യങ്ങളോടെയാണ് കുട്ടികൃഷി. സ്‌കൂളിലെ 30 സെന്റ് സ്ഥലത്ത് വെണ്ട, പയര്‍, മുളക്, വഴുതന എന്നീ പച്ചക്കറികളും ഇടയില്‍ ബന്ദിചെടികളുമാണു നട്ടിരിക്കുന്നത്.
ഓണം വിപണി ലക്ഷ്യമാക്കിയാണ് ബന്ദികൃഷി ആരംഭിച്ചത്. ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികളുടെയും എന്‍.എസ്.എസ്, എസ്.പി.സി, സ്‌കൗട്ട് ആന്‍ഡ് ഗൈഡ്‌സ് യൂണിറ്റുകളുടേയും നേതൃത്വത്തിലാണ് കൃഷി. വിളവുകള്‍ പഞ്ചായത്തിലെ ഇക്കോഷോപ്പ് വഴി കുട്ടിച്ചന്ത എന്ന പേരില്‍ വിറ്റഴിക്കുമെന്ന് കൃഷി ഓഫീസര്‍ ടി.ആര്‍. സൂര്യ മോള്‍ പറഞ്ഞു.
പച്ചക്കറി വിറ്റഴിക്കുന്നതിലൂടെ ലഭിക്കുന്ന തുക കുട്ടിച്ചന്ത എന്ന പേരില്‍ ബാങ്കില്‍ നിക്ഷേപിക്കും. തുടര്‍വര്‍ഷങ്ങളില്‍ സ്‌കൂളിലെ കൃഷി വിപൂലീകരിക്കാന്‍ ഇത് ഉപയോഗിക്കുമെന്നും കൃഷി ഓഫീസര്‍ പറഞ്ഞു. പാമ്പാടി ബ്ലോക്ക് നഴ്‌സറിയില്‍ നിന്നും സൗജന്യമായാണ് പച്ചക്കറി തൈകള്‍ നല്‍കിയത്.
