283 വീടുകളുടെ വാര്പ്പ് പൂര്ത്തിയായി
ഏല്സ്റ്റണ് എസ്റ്റേറ്റിലെ മാതൃക ടൗണ്ഷിപ്പിന്റെ നിര്മ്മാണ പ്രവര്ത്തനങ്ങള് പുരോഗമിക്കുന്നു. മുണ്ടക്കൈ-ചൂരല്മല ദുരന്ത ബാധിതര്ക്കായി ഉയരുന്ന ടൗണ്ഷിപ്പില് 283 വീടുകളുടെ വാര്പ്പ് പൂര്ത്തിയായി. അഞ്ച് സോണുകളിലായാണ് നിര്മ്മാണ പ്രവര്ത്തനങ്ങള് പുരോഗമിക്കുന്നത്. 1500 ലധികം തൊഴിലാളികളാണ് ദിവസേന ടൗണ്ഷിപ്പ് നിര്മ്മാണത്തിന്റെ ഭാഗമാവുന്നത്. ദിവസവും അഞ്ച് മുതല് പത്തു വരെ വീടുകളുടെ വാര്പ്പ് പൂര്ത്തീകരിക്കുന്നുണ്ട്. വാര്പ്പ് കഴിഞ്ഞ വീടുകളില് പ്ലംബിങ്, തേപ്പ്, ഫ്ലോറിങ് എന്നിവ അതിവേഗം പൂര്ത്തിയാകുന്നു.
വീടുകളുടെ എര്ത്ത് വര്ക്ക്, പ്ലെയിന് സിമന്റ് കോണ്ക്രീറ്റ് പ്രവൃത്തികള്, ഷിയര് വാള് പ്രവര്ത്തികളും പുരോഗമിക്കുകയാണ്.
ടൗണ്ഷിപ്പിലെ പ്രാധാന റോഡില് ഇലക്ട്രിക്കല് ഡക്ട് നിര്മ്മാണവും സൈഡ് ഡ്രെയിന് നിര്മ്മാണവും പുരോഗമിക്കുകയാണ്. ആകെ 11.423 കിലോമീറ്റര് റോഡുകളാണ് ടൗണ്ഷിപ്പില് നിര്മ്മിക്കുക. ഒന്പത് ലക്ഷം ലിറ്റര് ശേഷിയില് നിര്മ്മിക്കുന്ന കുടിവെള്ള സംഭരണി, സീവേജ് ട്രീറ്റ്മെന്റ് പ്ലാന്റ്, ഓവുച്ചാല് എന്നിവയുടെ നിര്മാണവും ഏല്സ്റ്റണില് പുരോഗമിക്കുകയാണ്.
നിര്മ്മാണ പ്രവൃത്തികളുടെ ഗുണനിലവാരം ഉറപ്പാക്കി ക്യൂ.സി ലാബ്
ടൗണ്ഷിപ്പിലെ വീട്, റോഡ് നിര്മ്മാണ പ്രവൃത്തികളുടെ ഗുണനിലവാരം ഉറപ്പാക്കി ക്യൂ.സി ലാബ്. ടൗണ്ഷിപ്പിലെ മണ്ണ് കുഴിക്കല്, നിരപ്പാക്കല്, മണ്ണിന്റെ ഉറപ്പ് പരിശോധന പൂര്ത്തിയാക്കിയതും സേഫ് ബിയറിങ് വാല്യൂ കപ്പാസിറ്റി നല്കി നിര്മ്മാണ വസ്തുക്കളുടെ ഗുണനിലവാരം ഉറപ്പാക്കിയതും ക്യൂ.സി ലാബ് മുഖേനയാണ്. നിര്മ്മാണത്തിന് ആവശ്യമായ സിമന്റ്, ഇരുമ്പ്, കല്ല്, മെറ്റല്, മണല് എന്നിവയുടെ ഗുണനിലവാരം ലാബിലെ പരിശോധനയിലൂടെ ഉറപ്പാക്കിയിട്ടുണ്ട്. നിര്മ്മാണ ഘട്ടത്തില് ആവശ്യമായ ടെസ്റ്റുകള് ക്യൂ.സി ലാബില് ഉറപ്പാക്കാന് കോണ്ക്രീറ്റ് ടെസ്റ്റ് ക്യൂബുകള് നിര്മ്മിക്കുന്നുണ്ട്. നിര്മ്മാണ വസ്തുക്കളുടെ ഗുണന്മേമ ഉറപ്പാക്കാന് കോണ്ക്രീറ്റ് ക്യൂബുകള് നിര്മ്മിച്ച് ഏഴ് മുതല് 28 ദിവസം വരെ വെള്ളത്തില് നിക്ഷേപിക്കുകയും കോണ്ക്രീറ്റിന്റെ സമ്മര്ദ്ദ പ്രതിരോധ ശേഷി പരിശോധിച്ച ശേഷമാണ് നിര്മ്മാണ പ്രവര്ത്തികള്ക്കായി സാമഗ്രികള് ഉപയോഗിക്കുന്നത്.