ജില്ലയില്‍ 45 വയസ്സിനു മേല്‍ പ്രായമുള്ളവര്‍ക്കുള്ള കൊവിഡ് വാക്്‌സിന്‍ വിതരണം ഏപ്രില്‍ 1 ആരംഭിക്കും. ജില്ലയില്‍ പ്രതിദിനം 20,000 പേര്‍ക്ക് വാക്‌സിന്‍ നല്‍കുകയാണ് ലക്ഷ്യം. സര്‍ക്കാര്‍ ആശുപത്രികള്‍, തെരഞ്ഞെടുത്ത സ്വകാര്യ ആശുപത്രികള്‍ എന്നിവ കൂടാതെ കൂടുതല്‍ പൊതു കെട്ടിടങ്ങളും വാക്‌സിനേഷന്‍ കേന്ദ്രങ്ങളാക്കും. തെരഞ്ഞെടുപ്പ്, ഉത്സവം, പൊതുപരിപാടികള്‍ തുടങ്ങിയവ വരുന്ന സാഹചര്യത്തില്‍ വാക്‌സിന്‍ സ്വീകരിച്ച് സുരക്ഷിതരാകേണ്ടത് അത്യാവശ്യമാണ്.

45 വയസ്സ് കഴിഞ്ഞവര്‍ക്ക് www.cowin.gov.in എന്ന പോര്‍ട്ടലില്‍ രജിസ്റ്റര്‍ ചെയ്‌തോ വാക്‌സിനേഷന്‍ കേന്ദ്രത്തില്‍ വച്ച് ആധാര്‍ കാര്‍ഡോ ഫോട്ടോ പതിച്ച തിരിച്ചറിയല്‍ കാര്‍ഡോ ഹാജരാക്കി സ്‌പോട്ട് രജിസ്‌ട്രേഷന്‍ നടത്തിയോ വാക്‌സിന്‍ സ്വീകരിക്കാം. 45 വയസ്സ് കഴിഞ്ഞു എന്ന രേഖയാണ് പോര്‍ട്ടലില്‍ അപ്‌ലോഡ് ചെയ്യേണ്ടത്.  45നു മുകളില്‍ പ്രായമുള്ള ഗുരുതര രോഗമുള്ളവര്‍ക്കായിരുന്നു ഇതുവരെ വാക്‌സിന്‍ നല്‍കിയിരുന്നത്. എന്നാല്‍ ഏപ്രില്‍ ഒന്ന് മുതല്‍ 45 വയസ്സ് കഴിഞ്ഞ എല്ലാവര്‍ക്കും വാക്‌സിന്‍ നല്‍കും.  ജില്ലയില്‍ ഈ വിഭാഗത്തില്‍പ്പെടുന്ന 917432 പേരാണുള്ളത്. ഇവര്‍ക്ക് 45 ദിവസത്തിനുള്ളില്‍ വാക്‌സിന്‍ നല്‍കാനാണ് ലക്ഷ്യമിടുന്നത്.