ആലപ്പുഴ: സംസ്ഥാനത്തെ വനമേഖലയുടെ വിസ്തൃതി 33 ശതമാനമായി വർധിപ്പിക്കാനാണ് സർക്കാർ ലക്ഷ്യമിടുന്നതെന്ന് വനം-വന്യജീവി വകുപ്പ് മന്ത്രി എ.കെ. ശശീന്ദ്രൻ പറഞ്ഞു. സംസ്ഥാന വനം-വന്യജീവി വകുപ്പിന്റെ ആഭിമുഖ്യത്തിൽ തുറവൂർ തിരുമല ദേവസ്വം സ്‌കൂളിൽ നടപ്പാക്കുന്ന വിദ്യാവനം പദ്ധതി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി.

കഴിഞ്ഞ വർഷങ്ങളിൽ വനംവകുപ്പ് സ്വീകരിച്ച നടപടികളുടെ ഭാഗമായി സംസ്ഥാനത്തെ സംരക്ഷിത വനമേഖലയുടെ വിസ്തൃതി 29 ശതമാനമായി വർധിപ്പിക്കാൻ സാധിച്ചു. ഇനിയും കൂടുതൽ സ്ഥലങ്ങൾ കണ്ടെത്തി വനവത്ക്കരണ പദ്ധതികൾ വിപുലപ്പെടുത്താനുള്ള ശ്രമത്തിലാണ് സർക്കാർ. മരങ്ങൾ നടുന്നതിനൊപ്പം അതിന്റെ പരിപാലനവും ഉറപ്പാക്കണം. ഭൂമിയുടെ ഹരിത കവചം വിശാലമാക്കാനുള്ള ലക്ഷ്യം ഏവരിലേക്കും എത്തിക്കാനുള്ള പ്രവർത്തനങ്ങൾ നടപ്പാക്കും. മരങ്ങളും ചെടികളും നട്ടു പരിപാലിക്കുകയെന്ന പഴമയുടെ സംസ്‌കാരം യുവതലമുറയിലേക്കും എത്തിക്കാനാണ് വിദ്യാർഥികളുടെ നേതൃത്വത്തിൽ വിദ്യാവനം പോലുള്ള പദ്ധതികൾ നടപ്പാക്കുന്നത്. മലിനീകരണം കുറച്ച് ഭൂമിയെ സുരക്ഷിതമായി സംരക്ഷിക്കാനുള്ള ഉത്തരവാദിത്വം ഇത്തരം പദ്ധതികളിലൂടെ യുവ തലമുറയിലേക്ക് പകരുമെന്നും മന്ത്രി പറഞ്ഞു.

വിദ്യാലയങ്ങളിൽ അതിസാന്ദ്രതയിൽ നട്ടുവളർത്തിയെടുക്കുന്ന ചെറുവനങ്ങളാണ് വിദ്യാവനങ്ങൾ. ജലാഗിരണ ശേഷി വർധിപ്പിക്കുക, വൃക്ഷാവരണങ്ങളുടെ വിവിധ തട്ടുകളിൽ വരുന്ന തദ്ദേശീയ ഔഷധച്ചെടികൾ, കുറ്റിച്ചെടികൾ, വള്ളിച്ചെടികൾ, മരങ്ങൾ എന്നിവ അതിസാന്ദ്രതയിൽ നട്ടുപിടിപ്പിച്ച് പരിപാലിക്കുയാണ് ലക്ഷ്യം. തുറവൂർ തിരുമല ദേവസ്വം സ്‌കൂളിലെ ഫോറസ്ട്രി ക്ലബ്ബിന്റെ സഹകരണത്തോടെയാണ് സ്‌കൂൾ അങ്കണത്തിലെ ഏഴു സെന്റ് സ്ഥലത്ത് വിദ്യാവനം പദ്ധതി നടപ്പാക്കുന്നത്. സ്‌കൂളിൽ നിർമിച്ചിട്ടുള്ള വിദ്യാവനത്തിൽ 160 ഇനങ്ങളിലുള്ള നാനൂറിലേറെ തൈകളാണ് നട്ടു പിടിപ്പിച്ചിട്ടുള്ളത്. ജില്ലയിലെ ആല എസ്.എൻ. ട്രസ്റ്റ് സ്‌കൂളിൽ കഴിഞ്ഞ വർഷം നിർമിച്ച വിദ്യാവനം കുട്ടികളുടെ സഹകരണത്തോടെ പരിപാലിച്ചു വരുന്നുണ്ട്. ജില്ലയിൽ ഈ വർഷം തുറവൂർ തിരുമല ദേവസ്വം സ്‌കൂളിന് പുറമേ താമരക്കുളം ഡി.വി.എച്ച്.എസിലുമാണ് വിദ്യാവനം പദ്ധതി നടപ്പാക്കുന്നത്.

ചടങ്ങിൽ ദലീമ ജോജോ എം.എൽ.എ. ആധ്യക്ഷ്യം വഹിച്ചു. കുത്തിയതോട് ഗ്രാമപഞ്ചായത്ത് പ്രസിഡന്റ് പി. വത്സല, ഗ്രാമപഞ്ചായത്തംഗം കൃഷ്ണദാസ്, ഫോറസ്റ്റ് കൺസർവേറ്റർ ഐ. സിദ്ദിഖ്, സോഷ്യൽ ഫോറസ്ട്രി എ.പി.സി.സി.എഫ്. ഇ. പ്രദീപ്കുമാർ, തിരുമല ദേവസ്വം ഹയർ സെക്കൻഡറി സ്‌കൂൾ മാനേജർ എച്ച്. പ്രേംകുമാർ, സ്‌കൂൾ ഹെഡ്മാസ്റ്റർ എസ്. നന്ദകുമാർ, പി.ടി.എ. പ്രസിഡന്റ് സോജകുമാർ, ഫോറസ്ട്രി ക്ലബ് ഇൻചാർഡ് എസ്. ഗീത, ക്ലബ് അംഗം ശിൽപ ജനീഷ് എന്നിവർ സംസാരിച്ചു.