ആസാദി കാ അമൃത് മഹോത്സവത്തിന്റെയും ഗാന്ധി ജയന്തി വാരാഘോഷത്തിന്റെയും ജില്ലാതല പരിപാടികള്‍ക്ക് തിരുന്നാവായയില്‍ തുടക്കം
മഹാത്മാഗാന്ധിയുടെ അഹിംസ, സ്ത്രീ ശാക്തീകരണം തുടങ്ങിയ ആശയങ്ങള്‍ ഇന്നും കാലിക പ്രസക്തമായവയെന്ന് ജില്ലാ വികസന കമ്മീഷണര്‍ പ്രേം കൃഷ്ണന്‍. ഗാന്ധിജിയുടെ ചിതാഭസ്മം നിമജ്ജനം ചെയ്ത പ്രധാന സ്ഥലങ്ങളിലൊന്നായ തിരുന്നാവായയില്‍ ആസാദി കാ അമൃത് മഹോത്സവത്തിന്റെയും ഗാന്ധി ജയന്തി വാരാഘോഷത്തിന്റെയും ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. മലപ്പുറം ജില്ലാ ഇന്‍ഫര്‍മേഷന്‍ ഓഫീസ്, വിദ്യാഭ്യാസ വകുപ്പ്, സാംസ്‌കാരിക വകുപ്പ്, നെഹ്റു യുവ കേന്ദ്ര, റി എക്കൗ, കെ.എം.സി.ടി പോളിടെക്‌നിക് കോളജ് എന്‍.എസ്.എസ് യൂണിറ്റ് എന്നിവയുടെ ആഭിമുഖ്യത്തിലാണ് പരിപാടികള്‍ സംഘടിപ്പിച്ചത്.
വികസനം ആരംഭിക്കേണ്ടത് ഗ്രാമങ്ങളില്‍ നിന്നാണെന്ന മഹത്തായ ആശയം ഗാന്ധിജിയുടേതാണ്. അദ്ദേഹത്തിന്റെ സത്യാന്വേഷണ പരീക്ഷണങ്ങള്‍ എന്ന ആത്മകഥ ഓരോ കാലഘട്ടത്തിലും വായിക്കപ്പെടുമ്പോള്‍ പുതിയ ആശയങ്ങളും പാഠവുമാണ് തനിക്ക് പകര്‍ന്ന് തന്നിട്ടുള്ളതെന്ന് അദ്ദേഹം പറഞ്ഞു. ആസാദി കാ അമൃത് മഹോത്സവ് പരിപാടിയുടെ ഭാഗമായി എല്ലാ പഞ്ചായത്തുകളിലും ജലസ്രോതസ്സുകളുടെതുള്‍പ്പടെ ശുചീകരണ പ്രവര്‍ത്തനങ്ങള്‍ നടക്കുകയാണെന്നും അദ്ദേഹം കൂട്ടിച്ചേര്‍ത്തു.
രാവിലെ 10ന് തിരുന്നാവായ ഗാന്ധി സ്തൂപത്തില്‍ ജില്ലാ വികസന കമ്മീഷണര്‍ പ്രേം കൃഷ്ണന്റെ നേതൃത്വത്തില്‍ പുഷ്പാര്‍ച്ചന നടത്തിയാണ് ഗാന്ധി ജയന്തിദിനത്തിലെ പരിപാടികള്‍ക്ക് തുടക്കമായത്. തുടര്‍ന്ന് വിദ്യാര്‍ഥികള്‍, ഗാന്ധിമാര്‍ഗ പ്രവര്‍ത്തകര്‍, സാമൂഹിക-സാംസ്‌കാരിക പ്രവര്‍ത്തകര്‍ എന്നിവര്‍ പങ്കെടുത്ത ഗാന്ധി സമൃതി യാത്ര തിരുന്നാവായ ഗ്രാമ പഞ്ചായത്ത് പ്രസിഡന്റ് സുഹറാബി കൊട്ടാരത്തില്‍ ഫ്‌ളാഗ് ഓഫ് ചെയ്തു.
തിരുത്തി റോഡിലുള്ള എം.എം.ടി ഹാളിലെത്തിയ സ്മൃതി യാത്രയോടനുബന്ധിച്ച് നടന്ന സെമിനാര്‍ ഉള്‍പ്പടെ വിവിധ പരിപാടികള്‍ ജില്ലാ വികസന കമ്മീഷണര്‍ പ്രേം കൃഷ്ണന്‍ ഐ.എ.എസ് ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്റ് അഡ്വ. യു. സൈനുദ്ധീന്‍ മുഖ്യാതിഥിയായിരുന്നു. ശുചിത്വ മിഷന്‍ സ്റ്റേറ്റ് റിസോഴ്‌സ് പേഴ്സണ്‍ വി.സി ശങ്കരനാരായണന്‍ ‘മാലിന്യത്തില്‍ നിന്നും സ്വാതന്ത്ര്യം’ എന്ന വിഷയത്തില്‍ സെമിനാര്‍ അവതരിപ്പിച്ചു.
തിരുന്നാവായ ഗ്രാമ പഞ്ചായത്ത് പ്രസിഡന്റ് സുഹറാബി കൊട്ടാരത്തില്‍ അധ്യക്ഷയായ പരിപാടിയില്‍ ആരോഗ്യ സ്റ്റാന്റിംഗ് കമ്മിറ്റി ചെയര്‍പേഴ്സണ്‍ മാമ്പറ്റ ദേവയാനി, വാര്‍ഡ് അംഗങ്ങളായ സി.വി അനീഷ ടീച്ചര്‍, ഇ.പി മൊയ്തീന്‍കുട്ടി, ബാവ ഹാജി, ജില്ലാ ഇന്‍ഫര്‍മേഷന്‍ ഓഫീസര്‍ പി. റഷീദ് ബാബു, അസിസ്റ്റന്റ് എഡിറ്റര്‍ ഐ.ആര്‍ പ്രസാദ്, സര്‍വോദയ കമ്മിറ്റി അംഗം മുഹമ്മദലി മുളക്കല്‍, കെ.എം.സി.ടി പോളിടെക്‌നിക് കോളജ് എന്‍.എസ്.എസ് കോര്‍ഡിനേറ്റര്‍ ടി.പി ജാസിര്‍, മാമാങ്കം സ്മാരകം കെയര്‍ ടേക്കര്‍ ചിറക്കല്‍ ഉമ്മര്‍, റി എക്കൗ പ്രസിഡന്റ് സി. ഖിളര്‍, സെക്രട്ടറി സതീഷന്‍ കളിച്ചാത്ത്, സല്‍മാന്‍ കരിമ്പനക്കല്‍, റി എക്കൗ അഡൈ്വസറി ബോര്‍ഡ് അംഗം കെ.പി അലവി, റി എക്കൗ അംഗങ്ങളായ കെ.ഹനീഫ, അബ്ദുല്‍ വാഹിദ് പല്ലാര്‍, പാമ്പലത്ത് ഫസല്‍, കെ.എം.സി.ടി പോളിടെക്‌നിക് കോളജ് വിദ്യാര്‍ത്ഥികള്‍ തുടങ്ങിയവര്‍ പങ്കെടുത്തു.