പ്രളയാനന്തര നാടിനെ വീണ്ടെടുക്കാന്‍ സെപ്റ്റംബര്‍ 10 മുതല്‍ 15 വരെ വയനാട് ജില്ലയില്‍ വിഭവസമാഹരണ യജ്ഞം നടത്തുമെന്നു ജില്ലയുടെ ചുമതല വഹിക്കുന്ന തുറമുഖ-പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി പറഞ്ഞു. നവകേരള പുനര്‍നിര്‍മ്മാണവുമായി ബന്ധപ്പെട്ട് കളക്ടറേറ്റ് എ.പി.ജെ ഹാളില്‍ ജില്ലാതല ഉദ്യോഗസ്ഥരുടെ യോഗത്തില്‍ സംസാരിക്കുകയായിരുന്നു അദ്ദേഹം. വയനാടിന് താങ്ങാവുന്നതിലപ്പുറമാണ് കാലവര്‍ഷക്കെടുതി. എല്ലാ മേഖലകളിലും നാശനഷ്ടമുണ്ടായി. വിവിധ മേഖലകളില്‍ നിന്നു നിരവധി സഹായങ്ങള്‍ ലഭിക്കുന്നുണ്ടെങ്കിലും നാടിന്റെ പുനസൃഷ്ടിക്ക് സാമ്പത്തിക സമാഹരണം അത്യന്താപേക്ഷിതമാണ്. വിഭവ സമാഹരണ യജ്ഞത്തില്‍ ജനപ്രതിനിധികളും ഉദ്യോഗസ്ഥരും പങ്കാളികളാവണം. നടപടികള്‍ ഗ്രാമപഞ്ചായത്ത് തലത്തില്‍ വേണമെന്നും അദ്ദേഹം അഭിപ്രായപ്പെട്ടു. പഞ്ചായത്ത് തലത്തില്‍ കോര്‍ഡിനേഷന്‍ കമ്മിറ്റി രൂപീകരിച്ച് പ്രവര്‍ത്തിക്കാന്‍ യോഗത്തില്‍ തീരുമാനിച്ചു. ധനശേഖരണവുമായി ബന്ധപ്പെട്ട് മൂന്നു ദിവസത്തിനകം ജില്ലാ കളക്ടര്‍, ജില്ലാ പൊലിസ് മേധാവി എന്നിവരുടെ നേതൃത്വത്തില്‍ ആരാധനാലയങ്ങളുടെ ഭാരവാഹികള്‍, വ്യവസായികള്‍, റിസോര്‍ട്ട് ഉടമകള്‍ എന്നിവരുമായി ചര്‍ച്ച നടത്തും. ജില്ലാതല ഉദ്യോഗസ്ഥര്‍ ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കാനും തീരുമാനമായി. വിഭവ സമാഹരണത്തിന്റെ ഭാഗമായി സര്‍ക്കാര്‍ വകുപ്പുകളുടെ കീഴിലുള്ള ഉപയോഗശൂന്യമായ വാഹനങ്ങള്‍ ലേലം ചെയ്യുന്നത് പരിഗണിക്കും. കാലവര്‍ഷത്തില്‍ അടിഞ്ഞുകൂടിയ മണല്‍ ലേലം ചെയ്യാനുള്ള സാധ്യതയും പരിശോധിക്കും. ഒ.ആര്‍ കേളു എം.എല്‍.എ, എ.ഡി.എം കെ. അജീഷ്, സബ് കളക്ടര്‍ എന്‍.എസ്.കെ ഉമേഷ്, ജില്ലാതല ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.
