ആലപ്പുഴ: കോവിഡ് കാലത്തെ വെല്ലുവിളികൾ അതിജീവിച്ച് പൊതുവിതരണ രംഗത്ത് സപ്ലൈക്കോ നടത്തിയത് മാതൃകാപരമായ പ്രവർത്തനങ്ങളാണെന്ന് ഭക്ഷ്യ പൊതുവിതരണ വകുപ്പ് മന്ത്രി പി. തിലോത്തമൻ പറഞ്ഞു. ഹരിപ്പാട് ആരംഭിച്ച സപ്ലൈകോ സൂപ്പർ മാർക്കറ്റ് വീഡിയോ കോൺഫറൻസിലൂടെ ഉദ്ഘാടനം ചെയ്യുകയായിരുന്നു മന്ത്രി.
ഈ സർക്കാർ അധികാരത്തിൽ എത്തുമ്പോൾ പൊതുവിതരണ രംഗത്ത് നൽകിയ വാഗ്ദാനങ്ങൾ എല്ലാം തന്നെ നടപ്പാക്കാൻ കഴിഞ്ഞിട്ടുണ്ട്. സബ്‌സിഡി ഉത്പ്പന്നങ്ങളുടെ വില ഉയർത്തില്ലെന്ന വാഗ്ദാനം പാലിച്ചാണ് കഴിഞ്ഞ നാലര വർഷക്കാലമായി സർക്കാർ മുന്നോട്ട് പോകുന്നത്. പ്രതികൂല സാഹചര്യങ്ങൾ പലതും അഭിമുഖീകരിക്കേണ്ടി വന്നിട്ടും അരിയുടെ വില പിടിച്ചു നിർത്താൻ സർക്കാരിനായി. സപ്ലൈകോ ഔട്ട്ലെറ്റുകൾ വഴി ജനങ്ങൾക്ക് മെച്ചപ്പെട്ട സേവനങ്ങൾ ഉറപ്പ് വരുത്താൻ സാധിച്ചെന്നും മന്ത്രി പറഞ്ഞു.
ഹരിപ്പാട് റവന്യൂ ടവറിലാണ് സപ്ലൈക്കോയുടെ പുതിയ സൂപ്പർ മാർക്കറ്റ് ആരംഭിച്ചത്. ചടങ്ങിൽ പ്രതിപക്ഷ നേതാവ് രമേശ്‌ ചെന്നിത്തല അദ്ധ്യക്ഷത വഹിച്ചു. ഹരിപ്പാട് നഗരസഭ ചെയർപേഴ്സൺ വിജയമ്മ പുന്നൂർമഠം, സപ്ലൈകോ മാനേജിങ് ഡയറക്ടർ പി. എം അലി അസ്ഗർ പാഷാ, സപ്ലൈകോ എറണാകുളം മേഖല മാനേജർ എൽ. മിനി തുടങ്ങിയവർ പങ്കെടുത്തു.