യുവജനങ്ങളെ വഴിതെറ്റിക്കുന്ന ശക്തികൾക്കെതിരെ അവബോധമുണ്ടാക്കണമെന്ന് ഗവർണർ പി. സദാശിവം അഭിപ്രായപ്പെട്ടു. നെഹ്‌റു യുവ കേന്ദ്രയുടെ ആഭിമുഖ്യത്തിൽ സംഘടിപ്പിച്ച നോർത്ത് ഈസ്റ്റ് യൂത്ത് എക്‌സ്‌ചേഞ്ച് പ്രോഗ്രാമിന്റെ ഉദ്ഘാടനം കനകക്കുന്ന് കൊട്ടാരത്തിൽ നിർവഹിച്ചുസംസാരിക്കുകയായിരുന്നു അദ്ദേഹം.
യുവതയുടെ ശക്തിയും സാഹസികതയും വടക്കുകിഴക്കൻ സംസ്ഥാനങ്ങളിൽ ഉൾപ്പെടെ സമൂഹത്തിൽ പ്രശ്‌നങ്ങളുണ്ടാക്കുന്ന സംഘങ്ങൾ ചൂഷണം ചെയ്യുന്ന സാഹചര്യമുണ്ട്. യുവജനങ്ങളെ നിക്ഷിപ്തതാത്പര്യമുള്ളവർ വഴിതെറ്റിക്കുന്നതിൽ നിന്ന് രക്ഷിക്കാനുള്ള ഉത്തരവാദിത്തം നമ്മൾക്കുണ്ട്. ഇതിനുള്ള അവബോധവും രാഷ്ട്രനിർമാണത്തിനുള്ള ആവേശവും അവരിലുണ്ടാകാനുള്ള ശ്രമങ്ങൾ വേണം.
നമ്മുടെ പ്രഗത്ഭരായ നിരവധി ചിന്തകരെ യുവശക്തി ആവേശപ്പെടുത്തിയിട്ടുണ്ട്.
സാമൂഹ്യ പരിവർത്തനം യാഥാർഥ്യമാകണമെങ്കിൽ ദേശീയ വിഭവങ്ങളും, വികസനവും, അവസരങ്ങളും എല്ലാ ജനങ്ങളിലും, പ്രത്യേകിച്ച് യുവാക്കളിൽ എത്തണം.
മികച്ച വിദ്യാഭ്യാസവും സാമൂഹ്യപ്രവർത്തനങ്ങളിലുള്ള പങ്കാളിത്തവും ഗുണപരമായ ചിന്തകൾ യുവാക്കളിൽ വളർത്താനാകും. വിദ്യാഭ്യാസ സൗകര്യങ്ങൾ വർധിച്ചിട്ടുണ്ടെങ്കിലും തൊഴിൽ സാധ്യതകളിലൂന്നിയ സാങ്കേതികപഠനം ആവശ്യമാണ്. നൈപുണ്യവികസനത്തിലൂന്നിയ വിദ്യാഭ്യാസത്തിന് ഇതിന് സാധിക്കും.
പൗരന്റെ മൗലിക കടമകൾ കൂടി യൂത്ത് എക്‌സ്‌ചേഞ്ച് പദ്ധതിയുടെ ഭാഗമായി മനസിലാക്കാൻ അവസരമൊരുക്കുന്നത് അഭിനന്ദനാർഹമാണ്. ലോകവും സംസ്‌കാരവും മുന്നോട്ടുപോകാൻ യുവാക്കളുടെ ശക്തിയാണ് ആവശ്യം. ലോകപൗരനായി വളരാൻ നമുക്ക് ചുറ്റുമുള്ള സമൂഹത്തിന്റെ ജീവിതവും ആശയങ്ങളും അറിയണം. ഇത്തരം യ്ൂത്ത് എക്‌സ്‌ചേഞ്ച് പദ്ധതികളിലൂടെ അതിന് കഴിയും.
കേരളം എങ്ങനെയാണ് മറ്റ് സംസ്ഥാനങ്ങളിൽ നിന്നുള്ളവരോട് പെരുമാറുന്നതെന്ന് വടക്കുകിഴക്കൻ സംസ്ഥാനങ്ങളിൽ നിന്നുള്ള വിദ്യാർഥികൾ മനസിലാക്കണം. ഇവിടെ മറ്റു സംസ്ഥാനങ്ങളിൽനിന്നുള്ള തൊഴിലാളികളെ അതിഥി തൊഴിലാളികളായി കണക്കാക്കി അവരുടെ സേവനങ്ങൾക്ക് അംഗീകരിക്കുന്നുണ്ടെന്നും ഗവർണർ പറഞ്ഞു. മികച്ച യൂത്ത് ക്ലബ്ബുകൾക്കുള്ള പുരസ്‌കാരങ്ങളും ഗവർണർ വിതരണം ചെയ്തു. ചടങ്ങിൽ ഒ. രാജഗോപാൽ എം.എൽ.എ അധ്യക്ഷത വഹിച്ചു. ഐ.ബി. സതീഷ് എം.എൽ.എ മുഖ്യപ്രഭാഷണം നടത്തി. നാഷനൽ സർവീസ് സ്‌കീം റീജിയണൽ ഡയറക്ടർ ജി.പി. സതീഷ്ബാബു ആശംസയർപ്പിച്ചു. നെഹ്‌റു യുവ കേന്ദ്ര സംസ്ഥാന ഡയറക്ടർ കെ. കുഞ്ഞഹമ്മദ് സ്വാഗതവും ജില്ലാ യൂത്ത് കോ-ഓർഡിനേറ്റർ ബി. അലി സാബ്രിൻ നന്ദിയും പറഞ്ഞു.
