ആലപ്പുഴ :കായംകുളം താലൂക്ക് ആശുപത്രിയുടെ പുതിയ 12 ഡയാലിസിസ് യൂണിറ്റുകളുടെ ഉദ്ഘാടനം നവംബർ 4ന്  ഉച്ചയ്ക്ക് 2 മണിക്ക് ആരോഗ്യ വകുപ്പ് മന്ത്രി കെ കെ ശൈലജ ടീച്ചർ വീഡിയോ കോൺഫറൻസിലൂടെ നിർവ്വഹിക്കും. അഡ്വ.യു പ്രതിഭ എം എൽ എ അധ്യക്ഷത വഹിക്കും. അഡ്വ എ എം ആരിഫ് എം പി മുഖ്യാതിഥിയാകും. നഗരസഭ ചെയർമാൻ അഡ്വ എൻ ശിവദാസൻ ചടങ്ങിൽ സ്വാഗതം ആശംസിക്കും. നിലവിലുള്ള നാല് യൂണിറ്റിൽ നിന്നും ആഴ്ചയിൽ 28 പേർക്കാണ് ഇപ്പോൾ ചികിത്സ ലഭിക്കുന്നത്. 12 പുതിയ യൂണിറ്റുകൾ കൂടി പ്രവർത്തനം ആരംഭിക്കുന്നതോടെ മൂന്ന് ഷിഫ്റ്റുകളിലായി ആഴ്ചയിൽ 200 മുതൽ 250 പേർക്ക് വരെ ചികിത്സ നൽകാൻ കഴിയും. സി റ്റി സ്ക്കാൻ,പവർ ലോൺട്രി എന്നിവയുടെ പ്രവർത്തനവും ഉടൻ ആരംഭിക്കും. 2.84 കോടി രൂപയാണ് ഈ പദ്ധതിയ്ക്ക് മാത്രമായി വിനിയോഗിക്കുന്നത്.ദേശീയ ആരോഗ്യ ദൗത്യത്തിൽ ഉൾപ്പെടുത്തി 3.5 കോടി രൂപ വിനിയോഗിച്ച് നിർമ്മിക്കുന്ന മാതൃ ശിശു സംരക്ഷണ കേന്ദ്രത്തിന്റെ നിർമ്മാണ പ്രവർത്തനങ്ങളും അവസാന ഘട്ടത്തിലാണ്. ലേബർ റൂം,മോഡുലാർ ഓപ്പറേഷൻ തീയേറ്റർ, നവജാത ശിശുക്കൾക്കായുളള ഐസിയൂ,ആന്റീനേറ്റൽ,പോസ്റ്റ്നേറ്റർ,വാർഡുകൾ, ഒരേ സമയം ഇരുപതോളം പേർക്ക് കയറാവുന്ന പാസഞ്ചർ ബെഡ് ലിഫ്റ്റ് എന്നിവയാണ് പദ്ധതിയിൽ ഉൾപ്പെടുത്തിയിട്ടുളളത്. മാവേലി മെഡിക്കൽ സ്റ്റോർ,ലാബ്,ഫാർമസി, വെയിറ്റിംഗ് ഏരിയ, ബ്ലഡ് സ്റ്റോറേജ് എന്നിവയ്ക്കായി എംഎൽഎയുടെ മണ്ഡല ആസ്തി വികസന ഫണ്ടിൽ നിന്നും 70 ലക്ഷം രൂപ വിനിയോഗിച്ച് നിർമ്മിക്കുന്ന ബഹുനില കെട്ടിടത്തിന്റെ നിർമ്മാണവും പുരോഗമിക്കുകയാണ്. കൂടുതെ താലൂക്ക് ആശുപത്രിയുടെ ഭൗതീക സാഹചര്യങ്ങൾ മെച്ചപ്പെടുത്തുന്നതിനായി കിഫ് ബി യിൽ നിന്നും 45കോടി രൂപയും അനുവദിച്ചിട്ടുണ്ട്.