കോട്ടയം: കോവിഡ് ബാധിച്ച് ഗുരുതരാവസ്ഥയിലാകുന്നവരുടെ ചികിത്സയ്ക്ക് നെസ്‌ലെ ഇന്ത്യ ഗ്രൂപ്പിന്റെ സഹകരണത്തോടെ നാലുകോടി, കോട്ടയം റോയല്‍സ് ജെ.സി.ഐകള്‍ ജില്ലാ ദുരന്തനിവാരണ അതോറിറ്റിക്ക് ചികിത്സാ സാമഗ്രികള്‍ കൈമാറി. 80 ലക്ഷം രൂപ ചിലവിട്ട് ലഭ്യമാക്കിയ 20 ഹൈ ഫ്‌ളോ നേസല്‍ കാനുലയും അനുബന്ധ സാമഗ്രികളും ജില്ലാ കളക്ടര്‍ എം. അഞ്ജന നെസ് ലെ ഇന്ത്യ റീജിയണല്‍ മാനേജര്‍ ജോയി സഖറിയാസില്‍നിന്ന് ഏറ്റുവാങ്ങി.
കോട്ടയം, ചങ്ങനാശേരി ജനറല്‍ ആശുപത്രികള്‍, പാമ്പാടി താലൂക്ക് ആശുപത്രി, മുണ്ടക്കയം സാമൂഹികാരോഗ്യ കേന്ദ്രം എന്നിവിടങ്ങളിലാണ് ഇവ ഉപയോഗിക്കുക. പ്രത്യേക ചികിത്സാ സഹായ പദ്ധതിയുടെ ലോഗോ ജെ.സി.ഐ ഇന്ത്യ പ്രസിഡന്റ് അനീഷ് സി. മാത്യു പ്രകാശനം ചെയ്തു.
എ.ഡി.എം അനില്‍ ഉമ്മന്‍, കോട്ടയം ജനറല്‍ ആശുപത്രിയിലെ ആര്‍. എം.ഒ. ഡോ. ഭാഗ്യശ്രീ, ജെ.സി.ഐ മേഖലാ അധ്യക്ഷന്‍ ജെയിംസ് കെ. ജെയിംസ്, ജെസിഐ നാലുകോടി പ്രസിഡന്റ് വിജയ് മംഗലം, ശ്രീജിത്ത് എം എസ്, ഷൈന്‍ പി. ജോസഫ്, രഞ്ജു ക്രിസ്റ്റ്‌സ് തുടങ്ങിയവര്‍ പങ്കെടുത്തു.