ഇടുക്കി: ജില്ലയിലെ വിവിധ സര്‍ക്കാര്‍ ഓഫീസുകളില്‍ കെട്ടിക്കിടക്കുന്ന പൊതുജനങ്ങളുടെ പരാതികള്‍/അപേക്ഷകള്‍ തീര്‍പ്പാക്കുക എന്നീ വിഷയങ്ങള്‍ക്ക് ഊന്നല്‍ നല്‍കിക്കൊണ്ട് ജില്ലാ കളക്ടര്‍ അഞ്ചു താലൂക്കുകളിലുമായി സംഘടിപ്പിക്കുന്ന ഓണ്‍ലൈന്‍ പൊതുജന പരാതി പരിഹാര അദാലത്തിന്റെ നാലാം ഘട്ടത്തില്‍ പീരുമേട് താലൂക്കിന്റെ അദാലത്ത് ജനുവരി 22 നും ദേവികുളം താലൂക്കിന്റെ അദാലത്ത് ജനുവരി 29നും രാവിലെ 10 മുതല്‍ നടത്തും. മുഖ്യമന്ത്രിയുടെ ദുരിതാശ്വാസ നിധി, പ്രകൃതിക്ഷോഭം, റേഷന്‍ കാര്‍ഡ് ബിപിഎല്‍ ആക്കുന്നത് എന്നിവ ഒഴികെയുള്ള വിഷയങ്ങളില്‍ പരാതികള്‍/ അപേക്ഷകള്‍ https://edistrict.kerala.gov.in എന്ന വെബ്‌സൈറ്റ് മുഖേന പൊതുജനങ്ങള്‍ക്ക് നേരിട്ടോ അക്ഷയ സെന്ററുകള്‍ മുഖേനയോ ജില്ലാ കളക്ടര്‍ക്ക് സമര്‍പ്പിക്കാം. അപേക്ഷകര്‍ക്ക് അദാലത്ത് ദിവസം താലൂക്ക് ഓഫീസ്/ വില്ലേജ് ഓഫീസ് എന്നിവിടങ്ങളിലെ വീഡിയോ കോണ്‍ഫറന്‍സ് സംവിധാനം മുഖാന്തരം കോവിഡ്-19 സുരക്ഷാമാനദണ്ഡങ്ങള്‍ പാലിച്ച് അദാലത്തില്‍ പങ്കെടുക്കാവുന്നതും ജില്ലാ കളക്ടര്‍ പരാതികള്‍ക്ക് തീര്‍പ്പു കല്‍പ്പിക്കുന്നതുമാണ.് പീരുമേട് താലൂക്ക് അപേക്ഷ സമര്‍പ്പിക്കുന്നതിനുളള അവസാന തീയതി ജനുവരി 17 ഉം, ദേവികുളം താലൂക്കിന്റേത് ജനുവരി 24 ഉം ആണ്.