കെസ്റു
കേരള സ്റ്റേറ്റ് സെല്‍ഫ് എംപ്ലോയ്മെന്റ് സ്‌കീം ഫോര്‍ ദി രജിസ്റ്റേഡ് അണ്‍ എംപ്ലോയ്ഡ് 99(കെസ്റു 99) എന്ന പദ്ധതിയാണിത്. കേരളത്തിലെ ഏതെങ്കിലുമൊരു എംപ്ലോയ്മെന്റ് എക്സ്ചേഞ്ചില്‍ രജിസ്ട്രേഷന്‍ നിലവിലുള്ളതും വാര്‍ഷിക കുടുംബവരുമാനം ഒരു ലക്ഷം രൂപയില്‍ താഴെയുള്ളതും 21നും 50നും ഇടയില്‍ പ്രായമുള്ളതുമായ ഏതൊരാള്‍ക്കും ഈ പദ്ധതിയില്‍ അപേക്ഷിക്കാം. 25 വയസ്സ് കഴിഞ്ഞ, സാങ്കേതിക പരിജ്ഞാനമുള്ളവര്‍ക്കും (നാഷനല്‍ ട്രേഡ് സര്‍ട്ടിഫിക്കറ്റ്, നാഷനല്‍ അപ്രന്റീസ് സര്‍ട്ടിഫിക്കറ്റ്) ബിരുദധാരികളായ വനിതകള്‍ക്കും മുന്‍ഗണന. ഈ പദ്ധതിയില്‍ നല്‍കുന്ന പ്രൊജക്ടുകള്‍ക്ക് ധനകാര്യസ്ഥാപനങ്ങള്‍ വായ്പ അനുവദിക്കുന്ന തുകയുടെ 20 ശതമാനം (പരമാവധി 20000രൂപ) സബ്സിഡി ലഭിക്കും. പരമാവധി വായ്പ തുക ഒരു ലക്ഷം രൂപയാണ്. പദ്ധതി പ്രകാരം സ്വയംതൊഴിലിന് ധനസഹായം ലഭിക്കാനുള്ള അപേക്ഷ ഫോം എല്ലാ പ്രവൃത്തി ദിവസങ്ങളിലും അതത് എംപ്ലോയ്മെന്റ് എക്സ്ചേഞ്ചുകളില്‍ നിന്ന് വാങ്ങാം.
കേരളത്തിലെ ഏതെങ്കിലും എംപ്ലോയ്മെന്റ് എക്സ്ചേഞ്ചില്‍ രജിസ്റ്റര്‍ ചെയ്തിട്ടുള്ള തൊഴില്‍ രഹിതര്‍ക്കായി വകുപ്പ് നടത്തുന്ന വിവിധോദ്യേശ സേവന കേന്ദ്രങ്ങളും അവയുടെ കീഴില്‍ തൊഴില്‍ രഹിതര്‍ നടത്തുന്ന ജോബ് ക്ലബുകളുമാണ് പദ്ധതി കൊണ്ടുദ്ദേശിക്കുന്നത്. കേരളത്തിലെ ഏതെങ്കിലും എംപ്ലോയ്മെന്റ് എക്സ്ചേഞ്ചില്‍ രജിസ്ട്രേഷന്‍ നിലവിലുള്ളവരായിരിക്കണം അപേക്ഷകര്‍. എംപ്ലോയ്മെന്റ് പേര് രജിസ്റ്റര്‍ ചെയ്തിട്ടില്ലെങ്കിലും പ്രവൃത്തി കാര്യക്ഷത പരിശീലനം ലഭിച്ചവര്‍ക്കും ഈ പദ്ധതിയുടെ ഗുണഭോക്താക്കളാകാം. എന്നാല്‍ ഇത്തരക്കാര്‍ ആകെ ഗുണഭോക്താക്കളില്‍ 10 ശതമാനത്തില്‍ കവിയരുത്. വാര്‍ഷിക കുടുംബവരുമാനം ഒരു ലക്ഷം രൂപയില്‍ കൂടാന്‍ പാടില്ല. (കുടുംബവരുമാനം എന്ന് ഉദ്ദേശിക്കുന്നത് ഗുണഭോക്താവിന്റെ ഉള്‍പ്പെടെ റേഷന്‍ കാര്‍ഡില്‍ പേരുള്ള എല്ലാ അംഗങ്ങളുടെയും ആകെ വരുമാനമാണ്). 21നും 40 നുമിടയില്‍ പ്രായമുള്ളവരായിരിക്കണം അപേക്ഷകര്‍.
മറ്റുപിന്നാക്ക വിഭാഗക്കാര്‍ക്ക് മൂന്ന് വര്‍ഷവും പട്ടികജാതി- പട്ടികവര്‍ഗ വിഭാഗക്കാര്‍ക്ക് അഞ്ച് വര്‍ഷവും ഉയര്‍ന്ന പ്രായപരിധിയില്‍ ഇളവ് ലഭിക്കും. ഒരു ജോബ് ക്ലബില്‍ പുരുഷന്‍മാര്‍ക്കും സ്ത്രീകള്‍ക്കും അംഗങ്ങളാകാം. എന്നാല്‍ ഹോം നഴ്സ്, ഹോം മേഡ് എന്നീ ക്ലബുകളില്‍ വനിതകള്‍ക്ക് മാത്രമേ അപേക്ഷിക്കാനാകൂ. പ്രൊഫഷനല്‍/ സാങ്കേതിക യോഗ്യതയുള്ളവര്‍ക്കും തൊഴില്‍ രഹിത വേതനം വാങ്ങുന്നവര്‍ക്കും മുന്‍ഗണന ലഭിക്കും. കൂടാതെ സംസ്ഥാന വ്യവസായ പരിശീലന വകുപ്പ് പരമ്പരാഗത തൊഴിലാളികള്‍ക്ക് നല്‍കുന്ന പ്രവൃത്തികാര്യക്ഷമത സര്‍ട്ടിഫിക്കറ്റ് നേടിയവര്‍ക്കും സംസ്ഥാന ഐടിഐ, ഐടിസി, പോളിടെക്നിക്ക് എന്നിവയില്‍ ഏതിലെങ്കില്‍ നിന്നും ബിരുദ ട്രേഡുകളില്‍ പരിശീലനം നേടിയവര്‍ക്കും ജനശിക്ഷണ്‍ സന്‍സ്ഥാന്‍, റൂഡ് സെറ്റ് എന്നിവിടങ്ങളില്‍ നിന്നും തൊഴില്‍ പരിശീലനം നേടിയവര്‍ക്കും ബിരുദധാരികളായ വനിതകള്‍ക്കും മുന്‍ഗണന.
എല്ലാ പ്രവൃത്തി ദിവസങ്ങളിലും പദ്ധതി അപേക്ഷകള്‍ എംപ്ലോയ്മെന്റ് എക്സ്ചേഞ്ചില്‍ ലഭിക്കും. പൂരിപ്പിച്ച അപേക്ഷ എംപ്ലോയ്മെന്റ് എക്സ്ചേഞ്ചിലെ പരിശോധനയ്ക്ക് ശേഷം ജില്ലാതല സമിതിയ്ക്ക് കൈമാറും. അപേക്ഷകര്‍ അനുയോജ്യരാണോ, പ്രൊജക്ട് നടപ്പാക്കാന്‍ കഴിയുന്നതാണോ എന്നീ കാര്യങ്ങള്‍ ജില്ലാ തല സമിതി പരിശോധിച്ച് അംഗീകരിച്ച അപേക്ഷകള്‍ ധനകാര്യ സ്ഥാപനങ്ങല്‍ലേക്ക് ശുപാര്‍ശ ചെയ്യും. ഒരു ക്ലബിന് 10 ലക്ഷം രൂപ വരെ വായ്പ ലഭിക്കും. ഓരോ ക്ലബിനും വായ്പ തുകയുടെ 25 ശതമാനം സബ്സിഡി നല്‍കും. (പരമാവധി രണ്ട് ലക്ഷം രൂപ). പ്രൊജക്ട് നടത്തിപ്പില്‍ ഗുണഭോക്താക്കളുടെ പങ്കാളിത്തം ഉറപ്പുവരുത്താന്‍ വായ്പ തുകയുടെ 10 ശതമാനം ഓരോ അംഗവും തങ്ങളുടെ വിഹിതമായി ആദ്യം തന്നെ നിക്ഷേപിക്കണം.