ഇടുക്കി: ജില്ലയില്‍ വൈദ്യുതി വകുപ്പ് മന്ത്രി എം എം മണി, റവന്യൂ, ഭവനനിര്‍മ്മാണ വകുപ്പ് മന്ത്രി ഇ ചന്ദ്രശേഖരന്‍, വിദ്യാഭ്യാസ വകുപ്പ് മന്ത്രി പ്രൊഫ. സി രവീന്ദ്രനാഥ് എന്നിവരുടെ നേതൃത്വത്തില്‍ ഫെബ്രുവരി 15, 16, 18 തീയതികളിലായി സാന്ത്വന സ്പർശം – പരാതി പരിഹാര അദാലത്തുകൾ നടത്തും. മന്ത്രിമാര്‍ പൊതുജനങ്ങളുടെ പരാതികള്‍ നേരിട്ട് കേട്ട് തീര്‍പ്പ് കല്‍പിക്കുo . പീരുമേട്, ഉടുമ്പന്‍ചോല താലൂക്കുകളുടെ അദാലത്ത് ഫെബ്രുവരി 15 ന് നെടുങ്കണ്ടം മിനി സിവില്‍ സ്റ്റേഷന്‍ ഹാളിലും, ദേവികുളം, തൊടുപുഴ താലൂക്കുകളുടെ അദാലത്ത് ഫെബ്രുവരി 16 ന് അടിമാലി ഗവ. ഹൈസ്കൂളിലും, ഇടുക്കി, തൊടുപുഴ താലൂക്കുകളുടെ അദാലത്ത് ഫെബ്രുവരി 18 ന് വാഴത്തോപ്പ് സെന്റ് ജോര്‍ജ് പാരീഷ് ഹാളിലും രാവിലെ 10 മുതല്‍ നടക്കും.

അദാലത്തിലേക്കുള്ള അപേക്ഷകള്‍ / പരാതികള്‍ ഓണ്‍ലൈന്‍ മുഖാന്തിരമാണ് സമര്‍പ്പിക്കേണ്ടത്. മുഖ്യമന്ത്രിയുടെ ദുരിതാശ്വാസനിധിയില്‍ നിന്നുള്ള ധനസഹായത്തിനായും അദാലത്തില്‍ അപേക്ഷിക്കാം. റേഷന്‍കാര്‍ഡ് ബി.പി.എല്‍ ആക്കുന്നത്, പ്രളയദുരിതാശ്വാസം എന്നിവയൊഴികെയുള്ള വിഷയങ്ങളില്‍ അപേക്ഷകള്‍ / പരാതികള്‍ www.cmo.kerala.gov.in എന്ന വെബ്സൈറ്റ് മുഖേന പൊതുജനങ്ങള്‍ക്ക് നേരിട്ടോ അക്ഷയ കേന്ദ്രങ്ങള്‍ മുഖേനയോ ഫെബ്രുവരി 03 ഉച്ചക്ക് 01:00 മുതല്‍ മുതല്‍ ഫെബ്രുവരി 09 രാത്രി 08:00 വരെ സമര്‍പ്പിക്കാവുന്നതാണ്. അക്ഷയ കേന്ദ്രങ്ങള്‍ മുഖേന അപേക്ഷ സമര്‍പ്പിക്കുന്നതിന് ഫീസ് ഈടാക്കുന്നതല്ല.