അക്കാദമിക് ബ്ലോക്കിന്റെ ശിലാസ്ഥാപനവും സെമിനാര്‍ ഹാളിന്റേയും കോമണ്‍ കമ്പ്യൂട്ടിംഗ് ഫെസിലിറ്റി സെന്ററിന്റെ പ്രവര്‍ത്തന ഉദ്ഘാടനവും മുഖ്യമന്ത്രി പിണറായി വിജയന്‍ നിര്‍വഹിച്ചു
ഇടുക്കി: മുട്ടം ഗവണ്‍മെന്റ് പോളിടെക്നിക്ക് കോളേജില്‍ പുതിയതായി നിര്‍മ്മിക്കുന്ന അക്കാദമിക് ബ്ലോക്കിന്റെ ശിലാസ്ഥാപനവും നിര്‍മ്മാണം പൂര്‍ത്തീകരിച്ച സെമിനാര്‍ ഹാളിന്റേയും കോമണ്‍ കമ്പ്യൂട്ടിംഗ് ഫെസിലിറ്റി സെന്ററിന്റെയും പ്രവര്‍ത്തന ഉദ്ഘാടനവും മുഖ്യമന്ത്രി പിണറായി വിജയന്‍ വീഡീയോ കോണ്‍ഫ്രന്‍സിലൂടെ നിര്‍വ്വഹിച്ചു. ഉന്നത വിദ്യാഭ്യാസ വകുപ്പ് മന്ത്രി ഡോ. കെ.ടി. ജലീല്‍ ചടങ്ങില്‍ അധ്യക്ഷത വഹിച്ചു. അഡ്വ. ഡീന്‍ കുര്യാക്കോസ് എം.പി, പി.ജെ. ജോസഫ് എംഎല്‍എ എന്നിവര്‍ മുഖ്യാതിഥികളായി. ഉന്നത വിദ്യാഭ്യാസ വകുപ്പ് അഡീഷണല്‍ ചീഫ് സെക്രട്ടറി ഡോ. വി.വേണു സ്വാഗതം പറഞ്ഞു.
ജില്ലാ പഞ്ചായത്ത് മെമ്പര്‍ സി.വി. സുനിത, തൊടുപുഴ ബ്ലോക്ക് പഞ്ചായത്ത് പ്രസിഡന്റ് ട്രീസ ജോസഫ്, തൊടുപുഴ ബ്ലോക്ക് പഞ്ചായത്ത് വൈസ് പ്രസിഡന്റ് എന്‍ കെ ബിജു, ഗ്രാമപഞ്ചായത്ത് പ്രസിഡന്റ് ഷൈജ ജോമോന്‍, വാര്‍ഡ് മെമ്പര്‍ ഡോളി രാജു, ബെന്നി പ്ലാക്കൂട്ടം, എം.പി. മുഹമ്മദ് കുട്ടി, അരുണ്‍ കുമാര്‍ എന്നിവര്‍ സംസാരിച്ചു. പൊതുമരാമത്ത് അസി. എഞ്ചിനീയര്‍ സമദ് സുലൈമാന്‍ റിപ്പോര്‍ട്ട് അവതരിപ്പിച്ചു. പ്രിന്‍സിപ്പാള്‍ ഗീതാ ദേവി കൃതജ്ഞത പറഞ്ഞു.
സംസ്ഥാന സര്‍ക്കാരിന്റെ പ്ലാന്‍ ഫണ്ടില്‍ നിന്നുള്ള 5.61 കോടി രൂപ ചിലവഴിച്ചാണ് പുതിയ സംവീധാനങ്ങള്‍ ഒരുക്കുന്നത്. നിര്‍മ്മാണം പൂര്‍ത്തീകരിച്ച സെമിനാര്‍ ഹാള്‍, കോമണ്‍ കമ്പ്യൂട്ടിംഗ് ഫെസിലിറ്റി സെന്റര്‍ എന്നിവ 67 ലക്ഷം രൂപാ ചിലവഴിച്ചാണ് പൂര്‍ത്തിയാക്കിയത്.
പുതുതായി നിര്‍മ്മിച്ച അഡീഷണല്‍ ബ്ലോക്കില്‍ നിരവധി ആധുനിക സൗകര്യങ്ങളാണ് ഏര്‍പ്പെടുത്തുന്നത്. നിര്‍മ്മാണത്തിനായി 4.94 കോടി രൂപായ്ക്ക് ഇതിനോടകം ഭരണാനുമതി ലഭിച്ചു. 31139 ചതുരശ്ര അടി വിസ്തീര്‍ണ്ണമുള്ള കെട്ടിടത്തിന്റെ ഒന്നാം ഘട്ടമായി 20431 ചതുരശ്ര അടിയാണ് നിര്‍മ്മിക്കുന്നത്. നാല് നിലകളിലായി രൂപകല്പന ചെയ്ത കെട്ടിടത്തില്‍ മൂന്ന് നിലകളുടെ നിര്‍മ്മാണ പ്രവര്‍ത്തനങ്ങളാണ് ഒന്നാംഘട്ടത്തില്‍ ഉള്‍പ്പെടുത്തിയിരിക്കുന്നത്. ടെക്‌നിക്കല്‍ ലൈബ്രററി, ലാബുകള്‍, ഡ്രോയിങ് ഹാള്‍, സെമിനാര്‍ ഹാള്‍, ക്ലാസ് റൂമുകള്‍, ആണ്‍കുട്ടികള്‍ക്കും പെണ്‍കുട്ടികള്‍ക്കുമുള്ള വിശ്രമ കേന്ദ്രം, ടോയ്ലെറ്റുകള്‍ എന്നിവ ഉള്‍ക്കൊള്ളുന്നതാണ് പുതിയ ബ്ലോക്ക്. കെട്ടിടത്തിലെ രൂപകല്പനയും നിര്‍മ്മാണവും പൂര്‍ണ്ണമായും പൊതുമരാമത്ത് വകുപ്പാണ് നിര്‍വഹിക്കുന്നത്.
1981 ലാണ് ഇടുക്കി ജില്ലയിലെ പ്രധാനപ്പെട്ട സാങ്കേതിക വിദ്യാഭ്യാസ സ്ഥാപനമായ മുട്ടം ഗവ. പോളിടെക്നിക് കോളേജ് പ്രവര്‍ത്തനം ആരംഭിച്ചത്. ആരംഭ ഘട്ടത്തില്‍ ശങ്കരപ്പള്ളിയില്‍ പ്രവര്‍ത്തിച്ചിരുന്ന പോളിടെക്നിക് പിന്നീട് ഇപ്പോഴത്തെ കെട്ടിടത്തിലേക്ക് മാറ്റുകയായിരുന്നു. പ്രൊഫഷണല്‍ വിദ്യാഭ്യാസ രംഗത്ത് ആയിരക്കണക്കിന് സാങ്കേതിക വിദഗ്ധരെ വാര്‍ത്തെടുക്കാന്‍ ഈ സ്ഥാപനത്തിനായിട്ടുണ്ട്. നിലവില്‍ മെക്കാനിക്കല്‍, സിവില്‍, ഇലക്ട്രിക്കല്‍, ഇലക്ട്രോണിക്സ്, കമ്പ്യൂട്ടര്‍ എന്നിങ്ങനെ അഞ്ച് ഡിപ്ലോമ കോഴ്സുകളിലായി 900 വിദ്യാര്‍ത്ഥികളാണ് ഇവിടെ പഠനം നടത്തുന്നത്. വിവിധ വിഭാഗങ്ങളിലായി നൂറോളം ജീവനക്കാരും ഇവിടെ ജോലി ചെയ്യുന്നുണ്ട്.