ഇടുക്കി: നിയമസഭാ തിരഞ്ഞെടുപ്പ് 2021 നോടനുബന്ധിച്ച് “കരുത്തുറ്റ ജനാധിപത്യത്തിന് വിപുലമായ ജനപങ്കാളിത്തം” എന്ന മുദ്രാവാക്യം ഉയർത്തി സ്വീപിൻ്റെ ആഭിമുഖ്യത്തിൽ നടത്തിയ സൗഹൃദ ക്രിക്കറ്റ് മത്സരത്തിൽ ഇടുക്കി പ്രസ് ക്ലബ്ബ് ടീം വിജയിച്ചു. ഏപ്രിൽ 6 ന് നടക്കുന്ന നിയമസഭാ തിരഞ്ഞെടുപ്പിൽ പരമാവധി സമ്മതിദായകരെക്കൊണ്ട് വോട്ട് ചെയ്യിക്കുക എന്ന ലക്ഷ്യത്തോടെയാണ് മത്സരം സംഘടിപ്പിച്ചത്.

ജില്ലാ ഇലക്ഷൻ വിഭാഗത്തിൻ്റെ നേതൃത്വത്തിൽ നടത്തി വരുന്ന വോട്ടർ ബോധവത്കരണ പരിപാടിയോടനുബന്ധിച്ചുള്ള മത്സരം ഇടുക്കി അസി. കളക്ടർ സൂരജ് ഷാജി ഉദ്ഘാടനം ചെയ്തു. തൊടുപുഴ തെക്കുംഭാഗം സ്റ്റേഡിയത്തിൽ നടത്തിയ മത്സരത്തിൽ ഇടുക്കി പ്രസ് ക്ലബ് ടീമും റവന്യൂ ഇലവൻ ടീമുമാണ് ഏറ്റുമുട്ടിയത്. ആദ്യം ബാറ്റ് ചെയ്ത പ്രസ്സ് ക്ലബ്‌ ടീം 114 റൺസെടുത്തു. മറുപടി ബാറ്റിംഗിനിറങ്ങിയ റവന്യൂ ടിം 55 റൺസുമെടുത്തു. ജില്ലാ ഇൻഫർമേഷൻ ഓഫീസർ എൻ. സതീഷ് കുമാർ വിജയികൾക്കും റണ്ണേഴ്സ് അപ്പിനും ട്രോഫികൾ വിതരണം ചെയ്തു.