* സംസ്ഥാനതല ഉദ്ഘാടനം നെയ്യാറ്റിൻകരയിൽ മന്ത്രി കെ.കെ. ശൈലജ നിർവഹിച്ചു
തിരുവനന്തപുരം: സായംപ്രഭ പദ്ധതിയില്‍ ഉള്‍പ്പെടുത്തി 14 ജില്ലകളിലും ആരംഭിക്കുന്ന മാതൃകാ സായംപ്രഭ ഹോമുകളുടെ (മള്‍ട്ടി ഡേ കെയര്‍ സെന്ററുകള്‍) സംസ്ഥാനതല ഉദ്ഘാടനവും നെയ്യാറ്റിന്‍കര നഗരസഭ പണികഴിപ്പിച്ച പകല്‍വീടിന്റെ പ്രവര്‍ത്തനോദ്ഘാടനവും ആരോഗ്യ സാമൂഹ്യനീതി വകുപ്പ് മന്ത്രി കെ.കെ.ശൈലജ ടീച്ചര്‍ നിര്‍വ്വഹിച്ചു.
ആരോഗ്യ രംഗമെന്നപോലെ തന്നെ സാമൂഹ്യനീതി രംഗവും വളരെ ശ്രദ്ധയോടെയാണ് കൈകാര്യം ചെയ്യുന്നതെന്ന് മന്ത്രി കെ.കെ. ശൈലജ ടീച്ചര്‍ പറഞ്ഞു. വയോജനങ്ങള്‍, ഭിന്നശേഷിക്കാര്‍, ട്രാന്‍സ്‌ജെന്‍ഡര്‍മാര്‍ എന്നിവരുടെ ക്ഷേമത്തിനായി നിരവധി പദ്ധതികളാണ് സര്‍ക്കാര്‍ ആവിഷ്‌ക്കരിച്ച് വരുന്നത്. കേരളത്തില്‍ 13 ശതമാനത്തോളം വരുന്ന വയോജനങ്ങളുടെ ക്ഷേമത്തിനായി പ്രത്യേക പരിഗണനയാണ് സര്‍ക്കാര്‍ നല്‍കുന്നത്.
വയോജനങ്ങളുടെ സമഗ്രക്ഷേമം മുന്‍നിറുത്തി സര്‍ക്കാര്‍ ആവിഷ്‌കരിച്ച് നടപ്പാക്കുന്ന പദ്ധതിയാണ് സായംപ്രഭ. വയോജനങ്ങള്‍ നേരിടുന്ന ഒറ്റപ്പെടല്‍, വിരസത, സുരക്ഷയില്ലായ്മ എന്നിവ മൂലമുണ്ടാകുന്ന മാനസികവും ശാരീരികവുമായ നിരവധി പ്രശ്‌നങ്ങള്‍ മുന്നില്‍ കണ്ട് വയോജനങ്ങള്‍ക്ക് പകല്‍ സമയം സംരക്ഷണവും പ്രത്യേക പരിരക്ഷയും സൗകര്യങ്ങളും നല്‍കുക എന്ന ലക്ഷ്യത്തോടെയാണ് മാതൃകാ സായംപ്രഭ ഹോമുകള്‍ സ്ഥാപിക്കുന്നത്. വയോജനങ്ങളുടെ ആരോഗ്യ സാമൂഹ്യ നിലവാരം കാലാനുസൃതമായി ഉയര്‍ത്തുന്നതിനായി ആധുനിക സൗകര്യങ്ങളാണ് അവിടെയൊരുക്കുന്നത്.
സംസ്ഥാനത്തെ എല്ലാ ജില്ലകളിലും മാതൃകാ സായംപ്രഭാ ഹോമുകള്‍ ആരംഭിക്കുന്നതിന്റെ ഭാഗമായി തിരുവനന്തപുരം ജില്ലയിലാണ് പൈലറ്റ് അടിസ്ഥാനത്തില്‍ പദ്ധതി ആരംഭിക്കുന്നത്. നെയ്യാറ്റിന്‍കര നഗരസഭയിലെ പുത്തനമ്പലം വാര്‍ഡില്‍ 2500 സ്‌ക്വയര്‍ഫിറ്റില്‍ നിര്‍മ്മിച്ച പകല്‍വീട് കെട്ടിടമാണ് വയോജനങ്ങള്‍ക്കായുള്ള മാതൃക സായംപ്രഭ ഹോമാക്കിയത്. ഹെല്‍പ്പേയ്ജ് ഇന്ത്യയുടെ സഹായത്തോടെയാണ് ഇത് സാധ്യമാക്കിയത്.
പകല്‍ വീടുകള്‍ അവര്‍ക്ക് നിറഞ്ഞ സന്തോഷം നല്‍കുന്നതാകണം. പ്രായം ചെന്നവരെ അവഗണിക്കാതെ സംസാരിക്കാനും ശ്രുശ്രൂക്ഷിക്കാനും കഴിയണം. കുടുംബത്തിലെന്ന പോലെ സന്തോഷം ഇവിടെയും അവര്‍ക്ക് ലഭിക്കണം. വയോജനങ്ങളുടെ മന്ദിരങ്ങള്‍ ശാസ്ത്രീയവും മനോഹരവുമായിരിക്കണമെന്നും മന്ത്രി പറഞ്ഞു.
പുത്തനമ്പലം പകല്‍വീട് അങ്കണത്തില്‍ വച്ച് നടന്ന ചടങ്ങില്‍ നെയ്യാറ്റിന്‍കര എം.എല്‍.എ. കെ. ആന്‍സലന്‍ അധ്യക്ഷത വഹിച്ചു. നഗരസഭ ചെയര്‍പേഴ്‌സണ്‍ ഡബ്ലിയു.ആര്‍. ഹീബ, സാമൂഹ്യനീതി വകുപ്പ് സ്‌പെഷ്യല്‍ സെക്രട്ടറി ബിജു പ്രഭാകര്‍, സാമൂഹ്യനീതി വകുപ്പ് ഡയറക്ടര്‍ ജാഫര്‍ മാലിക് , ഹെല്‍പ്പേജ് ഇന്ത്യ ഡയറക്ടര്‍ ബിജു മാത്യു, നഗരസഭ വൈസ് ചെയര്‍മാന്‍ കെ.കെ. ഷിബു, ക്ഷേമകാര്യ സ്റ്റാന്റിംഗ് കമ്മിറ്റി ചെയര്‍മാന്‍ കെ.പി. ശ്രീകണ്ഠന്‍നായര്‍, വികസനകാര്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ എന്‍.കെ. അനിതകുമാരി തുടങ്ങിയവര്‍ പങ്കെടുത്തു.