മലപ്പുറം ജില്ലയില് വ്യാഴാഴ്ച (2021 സെപ്തംബര് 23) 1,401 പേര്ക്ക് കോവിഡ് 19 സ്ഥിരീകരിച്ചതായി ജില്ലാ മെഡിക്കല് ഓഫീസര് ഡോ. കെ. സക്കീന അറിയിച്ചു. 1,591 പേര് വിദഗ്ധ പരിചരണത്തിനു ശേഷം വൈറസ് വിമുക്തരായിട്ടുണ്ട്. ഇതോടെ ജില്ലയില് 5,23,974 പേര് കോവിഡ് വിമുക്തരായി. 14.29 ശതമാനമാണ് വ്യാഴാഴ്ച ജില്ലയില് രേഖപ്പെടുത്തിയ കോവിഡ് ടെസ്റ്റ് പോസിറ്റീവിറ്റി നിരക്ക്.
രോഗികളുമായി സമ്പര്ക്കത്തിലേര്പ്പെട്ട് വൈറസ് ബാധിതരാകുന്നവര് വര്ധിക്കുന്ന സ്ഥിതിയ്ക്ക് മാറ്റമില്ല. രോഗബാധ സ്ഥിരീകരിച്ച 1,401 പേരില് 1,362 പേര്ക്കും ഇത്തരത്തിലാണ് രോഗബാധയുണ്ടായത്. 24 പേര്ക്ക് വൈറസ് ബാധയുണ്ടായതിന്റെ ഉറവിടം കണ്ടെത്താനായിട്ടില്ല. ആരോഗ്യ മേഖലയില് പ്രവര്ത്തിക്കുന്ന ഒരാള്ക്കും ഇതര സംസ്ഥാനങ്ങളില് നിന്ന് ജില്ലയില് തിരിച്ചെത്തിയ 14 പേര്ക്കും കോവിഡ് സ്ഥിരീകരിച്ചിട്ടുണ്ട്. 53,873 പേരാണ് ജില്ലയില് ഇപ്പോള് നിരീക്ഷണത്തില് കഴിയുന്നത്.
16,302 പേര് നിലവില് ചികിത്സയിലുണ്ട്. ഇവരില് 745 പേര് കോവിഡ് പ്രത്യേക ചികിത്സാ കേന്ദ്രങ്ങളായ ആശുപത്രികളിലും 260 പേര് കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററുകളിലും 98 പേര് കോവിഡ് സെക്കന്ഡ് ലൈന് ട്രീറ്റ്മെന്റ് സെന്ററുകളിലുമാണ്. തദ്ദേശഭരണ സ്ഥാപനങ്ങള്ക്കു കീഴിലുള്ള പ്രത്യേക താമസ കേന്ദ്രങ്ങളായ ഡൊമിസിലിയറി കെയര് സെന്ററുളില് 116 പേരും ശേഷിക്കുന്നവര് വീടുകളിലും മറ്റുമായും നിരീക്ഷണത്തില് കഴിയുന്നു.