ലൈഫ് വീടുകളുടെ താക്കോല് ദാനം ഇന്ന് (മേയ് 4ന്)
ജില്ലയില് നൂറ് ദിന കര്മ്മ പദ്ധതിയില് പൂര്ത്തികരിച്ച വീടുകളുടെ താക്കോല് ദാനം മേയ് 4ന് വ്യാഴം വൈകിട്ട് 4 മണിക്ക് ചെമ്പിലോട് ഗ്രാമപഞ്ചായത്തിലെ കണയ്യന്നൂരില് ജില്ലാ പഞ്ചായത്ത് പ്രസിഡണ്ട് പി പി ദിവ്യ നിര്വഹിക്കും.എടക്കാട് ബ്ലോക്ക് പഞ്ചായത്ത് പ്രസിഡണ്ട് പി കെ പ്രമീള അധ്യക്ഷത വഹിക്കും.
സംസ്ഥാന സര്ക്കാറിന്റെ നൂറ് ദിന കര്മ്മ പരിപാടിയിലൂടെ നിര്മാണം പൂര്ത്തികരിച്ച ഇരുപതിനായിരം ലൈഫ് വീടുകളുടെയും ലൈഫ് 2020 ലെ പുതിയ നാല്പതിനായിരം വീടുകളുടെ കരാര് വയ്ക്കലിന്റെയും സംസ്ഥാന തല ഉദ്ഘാടനം മുഖ്യമന്ത്രി പിണറായി വിജയന് കൊല്ലം ജില്ലയിലെ കൊറ്റങ്കര ഗ്രാമ പഞ്ചായത്തിലെ മേക്കോണില് മെയ് 4 വൈകീട്ട് അഞ്ചുമണിക്ക് നിര്വ്വഹിക്കും. സംസ്ഥാനതല പരിപാടിയുടെ ലൈവ് സ്ട്രീമിംഗും ജില്ലയിലെ മുഴുവന് തദ്ദേശ സ്വയംഭരണ സ്ഥാപനങ്ങളിലും നടത്തും.ജനപ്രതിനിധികള്, ഉദ്യോഗസ്ഥര് എന്നിവര് പങ്കെടുക്കും.
മാധ്യമ പുരസ്കാരം പ്രഖ്യാപിച്ചു.
കണ്ണൂർ ജില്ല അഗ്രി ഹോർട്ടികൾച്ചർ സൊസൈറ്റി സംഘടിപ്പിച്ച കണ്ണൂർ പുഷ്പോത്സവം 2023 നോട് അനുബന്ധിച്ചുള്ള മാധ്യമ പുരസ്കാരം പ്രഖ്യാപിച്ചു. അച്ചടി വിഭാഗത്തിൽ സമഗ്ര കവറേജിന് ദേശാഭിമാനിക്കാണ് ഒന്നാം സ്ഥാനം, രണ്ടാം സ്ഥാനം സുദിനം. ദൃശ്യമാധ്യമ വിഭാഗത്തിൽ കണ്ണൂർ വിഷനും ഓൺലൈൻ വിഭാഗത്തിൽ ന്യൂസ് വിങ്സും സമ്മാനം നേടി.
മികച്ച റിപ്പോർട്ടർ പി സുരേശൻ (ദേശാഭിമാനി ). രണ്ടാം സ്ഥാനം എം അബ്ദുൽ മുനീർ (സുദിനം) . മനോജ് മയിൽ (കണ്ണൂർ വിഷൻ) ,സാജു ഗംഗാധരൻ (ന്യൂസ് വിങ്സ് ), ബെൻസി ബെന്നി (പ്രൈം 21 ) എന്നിവരെ വിവിധ വിഭാഗങ്ങളിലെ മികച്ച റിപ്പോർട്ടർമാരായും മികച്ച ഫോട്ടോഗ്രാഫറായി മിഥുൻ അനില മിത്രൻ (ദേശാഭിമാനി) യെയും തെരഞ്ഞെടുത്തു . മെയ് 5 നു വൈകുന്നേരം നാലുമണിക്ക് കണ്ണൂർ റബ്കോ മിനി ഓഡിറ്റോറിയത്തിൽ കേരള നിയമസഭ സ്പീക്കർ അഡ്വ. എ എൻ ഷംസീർ പുരസ്കാരം സമ്മാനിക്കും. ജില്ലാ പഞ്ചായത്ത് പ്രസിഡണ്ട് പി പി ദിവ്യ മുഖ്യാതിഥിയാകും .ക്യാഷ് പ്രൈസ്, മൊമെന്റോ, സർട്ടിഫിക്കറ്റ് എന്നിവയാണ് പുരസ്കാരമായി നൽകുന്നത്. കാർഷിക ഫോട്ടോഗ്രാഫി മത്സര വിജയികൾക്കുള്ള സമ്മാനങ്ങളും ചടങ്ങിൽ വിതരണം ചെയ്യും.
അതിഥി അധ്യാപക ഒഴിവ്
ഉദുമ ഗവ ആര്ട്സ് ആന്റ് സയന്സ് കോളേജില് ഹിസ്റ്ററി, ഇംഗ്ലീഷ്, കോമേഴ്സ്, ആന്ത്രോപോളജി, മലയാളം, ഹിന്ദി, പൊളിറ്റിക്കല് സയന്സ്, ഇക്കണോമിക്സ്, സ്റ്റാറ്റിറ്റിക്സ് എന്നീ വിഷയങ്ങളില് അതിഥി അധ്യാപക ഒഴിവുണ്ട്.
ബിരുദാനന്തര ബിരുദത്തില് 55 ശതമാനത്തില് കുറയാതെ മാര്ക്കുള്ള ഉദ്യോഗാര്ഥികള്ക്ക് അപേക്ഷിക്കാം. നെറ്റ്, പി എച്ച് ഡി എന്നീ യോഗ്യതയുള്ളവര്ക്ക് മുന്ഗണന. യോഗ്യരായ ഉദ്യോഗാര്ഥികള് കോഴിക്കോട് ഡെപ്യൂട്ടി ഡയറക്ടറേറ്റ് ഓഫ് കോളേജിയേറ്റ് എഡ്യൂക്കേഷനിലെ ഗസ്റ്റ് പാനലില് രജിസ്റ്റര് ചെയ്ത രജിസ്ട്രേഷന് നമ്പരും അസ്സല് യോഗ്യത സര്ട്ടിഫിക്കറ്റുകളും സഹിതം പ്രിന്സിപ്പല് മുമ്പാകെ അഭിമുഖത്തിന് ഹാജരാകണം.
മെയ് 16 ന് രാവിലെ 10 മണിക്ക് ഹിസ്റ്ററിയിലും 11 മണിക്ക് പൊളിറ്റിക്കല് സയന്സ്, ഇക്കണോമിക്സ് എന്നീ വിഷയങ്ങളിലും 17ന് രാവിലെ 10 ന് കോമേഴ്സിലും 11 മണിക്ക് മലയാളം, ഹിന്ദി എന്നീ വിഷയങ്ങളിലും 18ന് രാവിലെ 10ന് ഇംഗ്ലീഷിലും 11 മണിക്ക് ആന്ത്രോപോളജി, സ്റ്റാറ്റിറ്റിക്സ് എന്നീ വിഷയങ്ങളിലേക്കുമാണ് അഭിമുഖം നടക്കുക. ഫോണ്: 9495827783.
താലൂക്ക് വികസന സമിതി
തലശ്ശേരി താലൂക്ക് വികസന സമിതി യോഗം മെയ് ആറിന് രാവിലെ 10.30ന് താലൂക്ക് ഓഫീസ് കോണ്ഫറന്സ് ഹാളില് ചേരും. യോഗത്തില് എല്ലാ വികസന സമിതി അംഗങ്ങളും ഉദ്യോഗസ്ഥരും പങ്കെടുക്കണമെന്ന് തഹസില്ദാര് അറിയിച്ചു.
കുടുംബശ്രീ സി ഡി എസ്സുകള്ക്ക് മൈക്രോ ക്രെഡിറ്റ് വായ്പ
കണ്ണൂര്, തളിപ്പറമ്പ്, പയ്യന്നൂര് താലൂക്കുകളിലെ കുടുംബശ്രീ സി ഡി എസ്സുകള്ക്ക് മൂന്ന് കോടി രൂപവരെ വായ്പ അനുവദിക്കുന്നു. അയല്ക്കൂട്ടം മുഖേനയാണ് അംഗങ്ങള്ക്ക് അപേക്ഷിക്കാം. കുടുംബശ്രീ അംഗങ്ങള്ക്ക് ഒരു ലക്ഷം രൂപ വരെ സ്വയം തൊഴില് പദ്ധതികള്ക്കായി മൂന്ന് മുതല് അഞ്ച് ശതമാനം നിരക്കില് മഹിളാ സമൃദ്ധി യോജന/ മൈക്രോ ക്രെഡിറ്റ് വായ്പ ലഭിക്കും.
പ്രാഥമിക അപേക്ഷയും പദ്ധതിയുടെ വിശദ വിവരങ്ങളും www.ksbcdc.com ല് ലഭിക്കും. പ്രാഥമിക അപേക്ഷ സംസ്ഥാന പിന്നോക്ക വിഭാഗ വികസന കോര്പ്പറേഷന്റെ പാറക്കണ്ടിയിലുള്ള ഓഫീസില് മെയ് 20നകം സമര്പ്പിക്കണം. പ്രാഥമിക അപേക്ഷ പരിശോധിച്ച് അര്ഹരാണെന്ന് കണ്ടെത്തുന്ന സി ഡി എസ്സുകള് വിശദമായ അപേക്ഷ ഓണ്ലൈനായി സമര്പ്പിക്കണം. ഫോണ്: 0497 2706197.
ചുരുക്കപ്പട്ടിക പ്രസിദ്ധീകരിച്ചു
ജില്ലയില് പൊതു വിദ്യാഭ്യാസ വകുപ്പില് ഹൈസ്കൂള് ടീച്ചര് (സോഷ്യല് സയന്സ്, 203/21) തസ്തികയിലേക്ക് പി എസ് സി 2022 മാര്ച്ച് 27ന് നടത്തിയ ഒ എം ആര് ടെസ്റ്റിന്റെ അടിസ്ഥാനത്തില് തയ്യാറാക്കിയ ചുരുക്കപ്പട്ടിക പ്രസിദ്ധീകരിച്ചതായി ജില്ലാ പി എസ് സി ഓഫീസര് അറിയിച്ചു.
ക്വട്ടേഷന്
കണ്ണൂര് ഗവ.എഞ്ചിനീയറിങ് കോളേജിലെ ഇ ഇ ഇ വകുപ്പിലെ ഇലക്ട്രിക്കല് മെറ്റീരിയല് ലാബില് ബ്രിഡ്ജസ് ആന്റ് ട്രെയിനര് കിറ്റുകള് വിതരണം ചെയ്യുന്നതിനും മെക്കാനിക്കല് എഞ്ചിനീയറിങ് വിഭാഗത്തിലെ തെര്മല് എഞ്ചിനീയറിങ് ലാബിലെ എക്സ്പെരിമെന്റല് ടെസ്റ്റ് അപ്പറാറ്റ്സ് എന്ന ഉപകരണത്തിന്റെ അറ്റകുറ്റപ്പണികള് ചെയ്യുന്നതിനും ഇലക്ട്രിക്കല് ആന്റ് ഇലക്ട്രോണിക്സ് എഞ്ചിനീയറിങ് ഡിപ്പാര്ട്ട്മെന്റിലെ ലാബ് ബ്ലോക്കില് പഴയ ഡിബിക്ക് പകരം എം സി ബി ടൈപ്പ് ഡി ബി സ്ഥാപിക്കുന്നതിനും ക്വട്ടേഷന് ക്ഷണിച്ചു. മെയ് 12ന് ഉച്ചക്ക് 12.30 വരെ ക്വട്ടേഷന് സ്വീകരിക്കും. ഫോണ്: 0497 2780226.
അപേക്ഷ ക്ഷണിച്ചു
മോട്ടോര് തൊഴിലാളി ക്ഷേമനിധി പദ്ധതിയില് സജീവ അംഗങ്ങളായ തൊഴിലാളികളുടെ മക്കള്ക്ക് ലാപ്ടോപ്പ് വിതരണം ചെയ്യുന്നു. 2021 – 22, 2022-23 അധ്യയന വര്ഷങ്ങളില് എഞ്ചിനീയറിങ്, എം ബി ബി എസ്, ബി എസ് സി അഗ്രികള്ച്ചര്, വെറ്ററിനറി സയന്സ്, ബി എ എം എസ്, ബി എച്ച് എം എസ്, എം സി എ, എം ബി എ, ബി എസ് സി നഴ്സിങ്, എം എസ് സി നഴ്സിങ് എന്നീ പ്രൊഫഷണല് കോഴ്സുകള്ക്ക് ദേശീയ, സംസ്ഥാന തലത്തില് നടത്തുന്ന പൊതു പ്രവേശന പരീക്ഷയുടെ അടിസ്ഥാനത്തില് മെറിറ്റില് പ്രവേശനം ലഭിച്ച് പഠിച്ചുകൊണ്ടിരിക്കുന്ന വിദ്യാര്ഥികള്ക്ക് അപേക്ഷിക്കാം.
അതോടൊപ്പം കേരള മോട്ടോര് തൊഴിലാളി ക്ഷേമനിധി പദ്ധതിയില് സജീവ അംഗങ്ങളായ തൊഴിലാളികളുടെ സര്ക്കാര്, സര്ക്കാര് എയ്ഡഡ് സ്കൂളുകളില് 2023-24 അധ്യയന വര്ഷത്തില് ഒന്നു മുതല് ഏഴ് വരെ ക്ലാസുകളില് പഠിക്കുന്ന കുട്ടികള്ക്ക് സൗജന്യ പഠനകിറ്റ് വിതരണം ചെയ്യുന്നതിനും അപേക്ഷ ക്ഷണിച്ചു. അപേക്ഷ സമര്പ്പിക്കേണ്ട അവസാന തീയതി മെയ് ആറ്. അപേക്ഷയും മറ്റ് വിശദ വിവരങ്ങളും എല്ലാ ജില്ലാ ഓഫീസുകളിലും ബോര്ഡിന്റെ kmtwwfb.org യിലും ലഭിക്കും.
തീയതി നീട്ടി
കേരള ഓട്ടോമൊബൈല് വര്ക്ക്ഷോപ്പ് തൊഴിലാളി ക്ഷേമനിധി പദ്ധതി, മോട്ടോര് തൊഴിലാളി ക്ഷേമനിധി എന്നിവയില് അംഗങ്ങളായ തൊഴിലാളികള്ക്ക് കുടിശ്ശിക ഒടുക്കുന്നതിനുള്ള കാലാവധി മെയ് 31വരെ നീട്ടിയതായി ജില്ലാ എക്സിക്യൂട്ടീവ് ഓഫീസര് അറിയിച്ചു. അഞ്ച് വര്ഷത്തില് കൂടുതല് 10 വര്ഷം വരെയുള്ള കുടിശ്ശിക ഒടുക്കുവരുത്തുന്നതിനായി അപേക്ഷ സമപ്പിക്കുന്നവര് തൊഴില് ഉടമയുടെയും ട്രേഡ് യൂണിയന് പ്രതിനിധികളുടെയും സാക്ഷ്യപത്രം ലഭ്യമാക്കിയതിനുശേഷം ബോര്ഡിന്റെ അനുമതിയോടെ കുടിശ്ശിക ഒടുക്കാം. ഫോണ്: 0497 2705197.
വൈദ്യുതി മുടങ്ങും
വളപട്ടണം ഇലക്ട്രിക്കല് സെക്ഷനിലെ നല്ലാനി മുക്ക്, നല്ലാനി പറമ്പ്, കുന്നാവ് എന്നീ ഭാഗങ്ങളില് മെയ് നാല് വ്യാഴം രാവിലെ ഒമ്പത് മുതല് വൈകിട്ട് അഞ്ച് മണി വരെയും വളപട്ടണം കടവ് റോഡ്, വളവട്ടണം പാലത്തിനു സമീപം എന്നീ ഭാഗങ്ങളില് രാവിലെ 10 മുതല് ഉച്ചക്ക് ഒരു മണി വരെയും വൈദ്യുതി മുടങ്ങും.
ശ്രീകണ്ഠാപുരം ഇലക്ട്രിക്കല് സെക്ഷനിലെ തവറൂല്, പന്നിയോട്ട് മൂല, പഞ്ചാംമൂല, നോബിള് എന്നീ ഭാഗങ്ങളില് മെയ് നാല് വ്യാഴം രാവിലെ ഒമ്പത് മുതല് വൈകിട്ട് അഞ്ച് മണി വരെ വൈദ്യുതി മുടങ്ങും.
തയ്യില് ഇലക്ട്രിക്കല് സെക്ഷനിലെ മരക്കാര്ക്കണ്ടി, വെത്തിലപ്പള്ളി, ഗോപാലന്കട, പൂത്തട്ടക്കാവ്, ജന്നത് നഗര്, പൊഞ്ഞാങ്കണ്ടി റോഡ് എന്നീ ട്രാന്സ്ഫോര്മര് പരിധിയില് മെയ് നാല് വ്യാഴം രാവിലെ 9.30 മുതല് ഉച്ചക്ക് 2.30 വരെയും ആസാദ് റോഡ് ട്രാന്സ്ഫോര്മര് പരിധിയില് രാവിലെ 9. 30 വൈകിട്ട് 5.30 വരെയും വൈദ്യുതി മുടങ്ങും.
ചൊവ്വ ഇലക്ട്രിക്കല് സെക്ഷനിലെ പാതിരിപ്പറമ്പ്, പെരിങ്ങോത്ത് അമ്പലം, കാനനൂർ ഹാൻഡ്ലൂം ഭാഗങ്ങളിൽ മെയ് നാല് വ്യാഴം രാവിലെ ഏഴ് മുതൽ ഉച്ച രണ്ട് മണിവരെയും എൻ എസ് പെട്രോമാർട്ട് , എടചൊവ്വ, പന്നിക്കുന്ന് ഭാഗങ്ങളിൽ രാവിലെ പതിനൊന്ന് മുതൽ വൈകിട്ട് മൂന്ന് വരെയും വൈദ്യുതി മുടങ്ങും.