കോഴിക്കോട് മെന്റൽ ഹെൽത്ത് സെന്ററിൽ പ്രവർത്തിക്കുന്ന ഇൻസ്റ്റിറ്റ്യൂട്ട് ഓഫ് മെന്റൽ ഹെൽത്ത് ആൻഡ് ന്യൂറോസയൻസ് എന്ന സ്ഥാപനത്തിൽ  കേരള ആരോഗ്യ സർവകലാശാല അംഗീകരിച്ച 2023-24  വർഷത്തെ  രണ്ട് വർഷം ദൈർഘ്യമുള്ള സൈക്യാട്രിക് സോഷ്യൽ വർക്ക്, ക്ലിനിക്കൽ സൈക്കോളജി എന്നീ വിഷയങ്ങളിൽ എം.ഫിൽ പ്രോഗ്രാമുകളുടെ പ്രവേശനത്തിന് ഓൺലൈൻ മുഖേന  അപേക്ഷ ക്ഷണിച്ചു.  ഒക്‌ടോബർ  18 മുതൽ നവംബർ 9 വരെ ഫെഡറൽ  ബാങ്കിന്റെ കേരളത്തിലെ എല്ലാ  ശാഖകളിലും വെബ്‌സൈറ്റിൽ നിന്നും പ്രിന്റ് എടുത്ത ചെല്ലാൻ മുഖേന  അപേക്ഷാഫീസ് സ്വീകരിക്കും. അപേക്ഷാഫീസ് ഓൺലൈനായും അടയ്ക്കാം.  അപേക്ഷാഫീസ് പൊതുവിഭാഗത്തിന് 1,500 രൂപയും പട്ടികജാതി പട്ടികവർഗ്ഗ വിഭാഗത്തിന് 1,250 രൂപയുമാണ്.

പ്രോസ്‌പെക്ടസ് www.lbscentre.kerala.gov.in ൽ പ്രസിദ്ധീകരിച്ചിട്ടുണ്ട്. എം.ഫിൽ സൈക്യാട്രിക് സോഷ്യൽ വർക്ക് പ്രോഗ്രാമിന് രണ്ടു വർഷം ദൈർഘ്യമുള്ള എം.എ./എം.എസ്സ്.ഡബ്ലിയു (ഇൻ സോഷ്യൽ വർക്ക് മെഡിക്കൽ ആൻഡ് സൈക്യാട്രി സ്‌പെഷ്യലൈസേഷൻ) ഡിഗ്രി കോഴ്‌സ് മൊത്തത്തിൽ 55 ശതമാനം മാർക്കോടെ ജയിച്ചവർ പ്രവേശനത്തിന് അർഹരാണ്.  എം.ഫിൽ ക്ലിനിക്കൽ സൈക്കോളജി പ്രോഗ്രാമിന് റീഹാബിലിറ്റേഷൻ കൗൺസിൽ ഓഫ് ഇൻഡ്യ(RCI)  യുടെ മാനദണ്ഡ പ്രകാരം രണ്ടു വർഷം ദൈർഘ്യമുള്ള എം.എ./എം.എസ്.സി സൈക്കോളജി ഡിഗ്രി കോഴ്‌സ് മൊത്തത്തിൽ 55 ശതമാനം മാർക്കോടെ ജയിച്ചവർ പ്രവേശനത്തിന് അർഹരാണ്. എസ്.സി/എസ്.ടി അപേക്ഷകർക്ക് 50 ശതമാനം മാർക്ക് മതിയാകും.  കൂടുതൽ വിവരങ്ങൾക്ക്: 0471 2560361, 2560362, 2560363, 2560364, 2560365.