ശബരിമല: മണ്ഡല മകരവിളക്ക് സീസണില്‍ സുഗമവും സുരക്ഷിതവുമായ തീര്‍ത്ഥാടനമൊരുക്കുക എന്ന ലക്ഷ്യവുമായി കേരള പോലീസ് വോഡഫോണുമായി ചേര്‍ന്ന് പുതിയ പദ്ധതിയ്ക്ക് തുടക്കമിട്ടു. 14 വയസ്സിനു താഴെയുള്ള കുട്ടി തീര്‍ത്ഥാടകര്‍ക്ക് ആര്‍.എഫ്.ഐ.ഡി. (റേഡിയോ-ഫ്രീക്വന്‍സി ഐഡന്ററ്റിഫിക്കേഷന്‍) സുരക്ഷാ ടാഗ് നല്‍കുന്ന പദ്ധതിയാണിത്. പമ്പയില്‍ നിന്നും കഴുത്തിലണിയിക്കുന്ന ടാഗ്, സന്നിധാനത്ത് ദര്‍ശനം നടത്തി തിരിച്ച് പമ്പയില്‍ എത്തുന്നത് വരെ കുട്ടി തീര്‍ത്ഥാടകരുടെ ചലനങ്ങള്‍ ട്രാക്ക് ചെയ്യാന്‍ സഹായിക്കും. വലിയ തിരക്കിനിടെ കുട്ടികള്‍ കൂട്ടം തെറ്റുന്നത് ഒഴിവാക്കാനും പിന്നീട് ഇവരെ കണ്ടെത്താന്‍ പോലീസ് നടത്തുന്ന അത്യധ്വാനം ഒഴിവാക്കാനും വോഡഫോണ്‍ പദ്ധതി ഗുണകരമാകും.
പത്തനംതിട്ട ജില്ലാ പോലീസ് മേധാവി ഡോ. എസ്. സതീഷ് ബിനോ, സ്‌പെഷ്യല്‍ പമ്പ ഓഫീസര്‍ കറുപ്പസ്വാമി എന്നിവര്‍ ചേര്‍ന്ന് വോഡഫോണിന്റെ ആര്‍.എഫ്.ഐ.ഡി. ടാഗ് പദ്ധതി ഉല്‍ഘാടനം ചെയ്തു. വോഡഫോണ്‍ ഇന്ത്യ, കേരള ബിസിനസ് മേധാവി അജിത് ചതുര്‍വേദി ചടങ്ങില്‍ പങ്കെടുത്തു.
ശബരിമലയിലേക്ക് എത്തുന്ന 14 വയസിന് താഴെയുള്ള കുട്ടികളുടെ രക്ഷിതാക്കള്‍ക്ക് പമ്പയിലുള്ള കേരള പോലീസ് ഓഫീസില്‍ എത്തി പേര് വിവരങ്ങള്‍ രജിസ്റ്റര്‍ ചെയ്ത് സേവനം ലഭ്യമാക്കാം. രജിസ്റ്റര്‍ ചെയ്യുന്നവര്‍ക്ക് കുട്ടിയുടെ പേര്, രക്ഷിതാക്കളുടെ പേര്, ബന്ധപ്പെടാനുളള നമ്പര്‍, മറ്റ് വിവരങ്ങള്‍ എന്നിവയടങ്ങുന്ന ആര്‍.എഫ്.ഐ.ഡി. ടാഗ് ലഭിക്കും. ആര്‍.എഫ്.ഐ.ഡി. ടാഗ് ധരിച്ച കുട്ടി തീര്‍ത്ഥാടന പാതയില്‍ അലഞ്ഞുതിരിഞ്ഞ് നടക്കുന്നത് പോലീസിന്റെ ശ്രദ്ധയില്‍ പെടുമ്പോള്‍, കുട്ടിയെ ഉടന്‍ തന്നെ കണ്‍ട്രോള്‍റൂമില്‍ എത്തിക്കും. ആര്‍.എഫ്.ഐ.ഡി. ടാഗ് നീരീക്ഷണ സംവിധാനത്തിലൂടെ ആര്‍.എഫ്.ഐ.ഡി. ടാഗ് റീഡ് ചെയ്യുമ്പോള്‍ കുട്ടി എവിടെ ഉണ്ടെന്നുളള വിശദാംശങ്ങള്‍ ഞഎകഉ ടാഗില്‍ രേഖപ്പെടുത്തിയിരിക്കുന്ന രക്ഷിതാവിന്റെ നമ്പറിലേക്ക് എത്തും. രക്ഷിതാവില്‍ നിന്ന് കൂട്ടംതെറ്റിപ്പോയ കുട്ടി മാനസിക ആഘാതത്തിലും, ഒരുപക്ഷേ തന്നെകുറിച്ചോ, രക്ഷിതാവിനെകുറിച്ചോ, പോലീസ് ഉദ്യോഗന്ഥരോട് സംസാരിക്കാനുളള ഭാഷ അറിയണമെന്നില്ല. ആര്‍.എഫ്.ഐ.ഡി. ടാഗ് കൂട്ടം തെറ്റുന്ന കുട്ടിയെ ഉടന്‍ തന്നെ കണ്ടെത്താനും രക്ഷിതാക്കളുമായി ചേര്‍ക്കാനും ഇത് പോലീസിന് സഹായകരമാകും.
ഓരോ വര്‍ഷവും പമ്പയിലും സന്നിധാനത്തും കുട്ടികളെ കാണാതാകുന്നത് സംബന്ധിച്ച് നൂറു കണക്കിന് പരാതികളാണ് പോലീസിന് ലഭിക്കുന്നത്. ഇത് ആദ്യമായാണ് ആഗോള തലത്തില്‍ ഉപയോഗിക്കുന്ന ആര്‍.എഫ്.ഐ.ഡി. സാങ്കേതിക വിദ്യ വന്‍തോതില്‍ മനുഷ്യ സഞ്ചയം എത്തുന്ന ഒരു മേഖലയില്‍ ഉപയോഗിക്കുന്നത്.
മണ്ഡല മകര വിളക്ക് സീസണില്‍ ലക്ഷകണക്കിന് പേരാണ് ശബരിമലയിലെത്തുന്നത് അതിനാല്‍ തീര്‍ത്ഥാടകരുടെ ചലനം നിരീക്ഷിക്കുന്നതും കുട്ടികളെ കാണാതാകുന്നത് തടയുന്നതും ഏറെ വെല്ലുവിളികള്‍ നിറഞ്ഞതാണെന്ന് പോലീസ് അധികൃതര്‍ പറഞ്ഞു. വോഡഫോണിന്റെ ആര്‍.എഫ്.ഐ.ഡി. സാങ്കേതിക വിദ്യ ഈ ബുദ്ധിമുട്ട് പരിഹരിക്കുന്നതിനും മറ്റ് സുപ്രധാനമായ ചുമതലകളില്‍ ശ്രദ്ധ കേന്ദ്രീകരിക്കുന്നതിനും സഹായകരമാണെന്നും പത്തനംതിട്ട ജില്ലാ പോലീസ് മേധാവി ഡോ. എസ്. സതീഷ് ബിനോ പറഞ്ഞു.
വോഡഫോണ്‍ ആര്‍.എഫ്.ഐ.ഡി. ടാഗുകള്‍ മണ്ഡലകാല തീര്‍ത്ഥാടനം അവസാനിക്കന്നതുവരെ കുട്ടികള്‍ക്ക് വിതരണം ചെയ്യും.