കാക്കനാട്: ജില്ലാ പഞ്ചായത്തിന് കീഴിലുള്ള സ്കൂളുകളിൽ എസ് .എസ്. എൽ. സി, ഹയർ സെക്കൻററി, വൊക്കേഷണൽ ഹയർ സെക്കന്ററി, ടെക്നിക്കൽ ഹൈസ്കൂൾ പരീക്ഷകളിൽ ഉന്നത വിജയം നേടിയ സ്കൂളുകൾക്കും വിദ്യാർത്ഥികൾക്കും മെറിറ്റ് അവാർഡ് നൽകി. ജില്ലാ പഞ്ചായത്ത് പ്രിയദർശിനി ഹാളിൽ നടന്ന അനുമോദന സമ്മേളനം ജില്ലാ കളക്ടർ എസ്.സു ഹാസ് ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്റ് ഡോളി കുര്യാക്കോസ് ചടങ്ങിൽ അദ്ധ്യക്ഷത വഹിച്ചു. 2019 സിവിൽ സർവ്വീസ് പരീക്ഷയിലെ റാങ്ക് ജേതാവ് ശ്രീലക്ഷ്മി ആർ ചടങ്ങിൽ മുഖ്യ അതിഥിയായി.

ജില്ലാ പഞ്ചായത്തിന്റെ കീഴിൽ 58 ഹൈസ്കൂളുകളും ,40 ഹയർ സെക്കന്ററി സ്കൂളുകളും ,13 വൊക്കേഷണൽ ഹയർ സെക്കൻററി സ്കൂളുകളും , 4 ടെക്നിക്കൽ ഹൈസ്കൂളുകളും പ്രവർത്തിച്ച് വരുന്നു. 45 സർക്കാർ ഹൈസ്കൂളുകൾ 100 % വിജയം നേടി. 93 കുട്ടികൾ എസ് എസ് എൽ സി പരീക്ഷയിൽ എല്ലാ വിഷയങ്ങൾക്കും A+ നേടി.

സർക്കാർ ഹയർ സെക്കന്ററി സ്കൂളുകളിലെ 51 കുട്ടികൾ പ്ലസ് ടു പരീക്ഷയിൽ മുഴുവൻ വിഷയങ്ങൾക്കും A+ നേടി. ചേരാനെല്ലൂർ ജി.എച്ച്.എസ്.എസ്, മുപ്പത്തടം ജി.എച്ച്.എസ്.എസ്. എന്നീ സ്കൂളുകൾ 100 % വിജയം നേടി.

നേര്യമംഗലം ജി.വി.എച്ച്.എസ്.എസ്, ഈസ്റ്റ് മാറാടി ജി.വി.എച്ച്.എസ്.എസ് എന്നീ സ്കൂളുകൾ വി.എച്ച്.എസ്.ഇ പരീക്ഷയിൽ 100 % വിജയം നേടി. മൂന്ന് കുട്ടികൾ എല്ലാ വിഷയങ്ങൾക്കും A+ നേടി.

മുളന്തുരുത്തി, ആയവന, ഇലഞ്ഞി, വാരപ്പെട്ടി ടെക്നിക്കൽ ഹയർ സെക്കൻററി സ്കൂളുകൾ 100 % വിജയം നേടി. 10 കുട്ടികൾ പരീക്ഷയിൽ എല്ലാ വിഷയങ്ങൾക്കും വിജയം നേടി.

ജില്ലാപഞ്ചായത്ത് വൈസ് പ്രസിഡന്റ് അഡ്വ.ബി.എ. അബ്ദുൽ മുത്തലിബ്, ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സൺ ജാൻസി ജോർജ്ജ്, വികസന കാര്യ സ്റ്റാന്റിങ് കമ്മിറ്റി ചെയർപേഴ്സൺ സരള മോഹൻ,
ജില്ലാ പഞ്ചായത്തംഗം ശാരദാ മോഹൻ, കെ.എൻ. സുഗതൻ തുടങ്ങിയവർ പങ്കെടുത്തു.

ഫോട്ടോ ക്യാപ്ഷൻ : ജില്ലാപഞ്ചായത്ത് പ്രിയദർശിനി ഹാളിൽ നടന്ന മെറിറ്റ് അവാർഡ് വിതരണോദ്ഘാടനം ജില്ലാ കലക്ടർ എസ്.സുഹാസ് നിർവഹിക്കുന്നു.