കൊച്ചി: നിക്ഷേപമുണ്ടാക്കുന്നതോടൊപ്പം തന്നെ ജനങ്ങൾക്ക് മികച്ച സേവനങ്ങൾ ഉറപ്പാക്കുവാനും സഹകരണ സംഘങ്ങൾ ശ്രദ്ധിക്കണമെന്ന് സഹകരണ വകുപ്പ് മന്ത്രി കടകംപള്ളി സുരേന്ദ്രൻ അഭിപ്രായപ്പെട്ടു. അന്തർദേശീയ സഹകരണ ദിനാചരണ ഉദ്ഘാടനവും സംസ്ഥാനത്തെ മികച്ച സഹകരണ സംഘങ്ങൾക്കുള്ള അവാർഡ് വിതരണവും നിർവഹിച്ച് സംസാരിക്കുകയായിരുന്നു മന്ത്രി. 115 വർഷത്തെ പഴക്കമുള്ളവയാണ് സംസ്ഥാനത്തെ സഹകരണ മേഖല. അത് കാലത്തിനനുസരിച്ച് മാറണം. ഈ ലക്ഷ്യത്തോടെയാണ് കേരള ബാങ്കിന്റെ രൂപീകരണം. വൻകിട ബാങ്കുകൾ ഇന്ന് സാധാരണക്കാർക്ക് അന്യമാകുകയാണ്. എസ്.ബി.റ്റി – എസ്.ബി.ഐ ലയനം തന്നെ ഇതിന് ഉദാഹരണമാണ്. ഇവിടെയാണ് സാധാരണക്കാർക്ക് ആശ്വാസമായി സഹകരണ സംഘങ്ങളുടെ പ്രസക്തി വർധിക്കുന്നത്. മരണാനന്തര കർമ്മങ്ങളിൽ മുതൽ ഐ.ടി വ്യവസായം വരെയുള്ള സർവ്വ മേഖലകളിലും സഹകരണ സംഘങ്ങളുടെ സ്വാധീനമുണ്ട്. സംസ്ഥാനത്താകെ വിവിധ മേഖലകളിലായി 15428 സഹകരണ സംഘങ്ങളുണ്ട്. ഇതിൽ പന്തീരായീരവും കാര്യക്ഷമമായി പ്രവർത്തിക്കുന്നവയാണ്. ഇവകളിൽ നിന്ന് ഒന്നേകാൽ ലക്ഷം പേർക്ക് നേരിട്ടും 12 ലക്ഷം പേർക്ക് പരോക്ഷമായും തൊഴിൽ ലഭിക്കുന്നുണ്ട്. സംസ്ഥാനത്തെ സഹകരണ മേഖല സ്വത്വബോധത്തോടെ പ്രവർത്തിച്ച മൂന്ന് വർഷങ്ങളാണ് കടന്ന് പോയത്. എല്ലാ വിഭാഗങ്ങളേയും ഉൾകൊണ്ട് പ്രവർത്തിക്കുക വഴി സമൂഹത്തിൽ താഴെ തട്ടിലുള്ളവർക്ക് ഏറെ ആശ്വാസമെത്തിക്കാൻ കഴിഞ്ഞു. കെയർ ഹോം അടക്കമുള്ള നിരവധി പദ്ധതികൾ ഇതിനുദാഹരണമാണെന്നും മന്ത്രി ചൂണ്ടിക്കാട്ടി. ചടങ്ങിൽ സഹകരണ വകുപ്പ് സെക്രട്ടറി മിനി ആന്റണി അധ്യക്ഷത വഹിച്ചു. ദേശീയ ക്ഷീര വികസന ബോർഡ് മുൻ ചെയർമാൻ ടി. നന്ദകുമാർ മുഖ്യ പ്രഭാഷണം നടത്തി. പി. എ.സി.എസ് അസോസിയേഷൻ ജില്ലാ പ്രസിഡന്റ് കെ.പി ബേബി, സെക്രട്ടറി ടി.കെ.വിൽസൺ, കണയന്നൂർ സർക്കിൾ സഹകരണ യൂണിയൻ ചെയർമാൻ ടി.എസ്.ഷൺമുഖദാസ്, ടി.ആർ.സുനിൽ, പി.ഡി പീറ്റർ, വി.കെ. ഡാർബി, പി.ജി. ഷിജു എന്നിവർ പ്രസംഗിച്ചു. സഹകരണ സംഘം രജിസ്ട്രർ ഡോ: പി.കെ.ജയശ്രീ സ്വാഗതവും ജോയിന്റ് രജിസ്ട്രാർ സുരേഷ് മാധവൻ നന്ദിയും പറഞ്ഞു. പരിപാടിയുടെ ഭാഗമായി കഴിഞ്ഞ വർഷത്തെ പ്രവർത്തനത്തിന്റെ അടിസ്ഥാനത്തിൽ 9 വിഭാഗങ്ങളിലായി 33 സഹകരണ സംഘങ്ങളെ സംസ്ഥാന തലത്തിൽ മികച്ച സഹകരണ സംഘങ്ങളായി തെരഞ്ഞെടുത്തിരുന്നു. വിവിധ വിഭാഗങ്ങളിൽ ഒന്നും രണ്ടും മൂന്നും സ്ഥാനങ്ങൾ നേടിയ കോഴിക്കോട് ജില്ലാ സഹകരണ ബാങ്ക്, ഇടുക്കി ജില്ലാ സഹകരണ ബാങ്ക്, പാലക്കാട് ജില്ലാ സഹകരണ ബാങ്ക് ( ജില്ലാ സഹകരണ ബാങ്ക് വിഭാഗം), മൂവാറ്റുപുഴ അർബൻ സഹകരണ ബാങ്ക്, പീപ്പിൾസ് അർബൻ ബാങ്ക് എറണാകുളം, പെരിന്തൽമണ്ണ അർബൻ ബാങ്ക്, ഒറ്റപ്പാലം കോ-ഓപ്പറേറ്റീവ് അർബൻ ബാങ്ക് ( അർബൻ ബാങ്ക് വിഭാഗം) പീരുമേട് താലൂക്ക് പി.സി.എ.ആർ.ഡി.ബി ലിമിറ്റഡ്, കുന്നത്തുനാട് താലൂക്ക് പി.സി.എ.ആർ.ഡി.ബി ലിമിറ്റഡ്, കാട്ടാക്കട പി.സി.എ.ആർ.ഡി.ബി ലിമിറ്റഡ്, പെരിന്തൽമണ്ണ പി.സി.എ.ആർ.ഡി.ബി ലിമിറ്റഡ് ( പ്രാഥമിക സഹകരണ കാർഷിക ഗ്രാമ വികസന ബാങ്ക് വിഭാഗം), കവളങ്ങാട് സർവീസ് സഹകരണ ബാങ്ക് കോതമംഗലം, ഒക്കൽ സർവീസ് സഹകരണ ബാങ്ക്, പാപ്പിനിവട്ടം സർവീസ് സഹകരണ ബാങ്ക് തൃശൂർ, കടയ്ക്കൽ സർവീസ് സഹകരണ ബാങ്ക്, ഏറാമല സർവീസ് സഹകരണ ബാങ്ക് കോഴിക്കോട്, കതിരൂർ സർവ്വീസ് സഹകരണ ബാങ്ക്, കണ്ണൂർ ( പ്രാഥമിക കാർഷിക വായ്പാ സഹകരണ സംഘങ്ങൾ ), തിരുവല്ല ഗവ.എംപ്ലോയീസ് കോ ഓപ്പറേറ്റീവ് സൊസൈറ്റി, നെടുമങ്ങാട് താലൂക്ക് ഗവൺമെൻറ് സർവന്റ്സ് സഹകരണ സംഘം, കൊച്ചിൻ നേവൽ ബേസ് സി വിലിയൻ എംപ്ലോയീസ് കോ ഓപ്പറേറ്റീവ് സൊസൈറ്റി, വടക്കാഞ്ചേരി ഗവൺമെന്റ് സർവ്വൻറ്സ് കോ-ഓപ്പറേറ്റീവ് സൊസൈറ്റി ( എംപ്ലോയീസ് സഹകരണ സംഘ വിഭാഗം) ഉദുമ വനിതാ കോ ഓപ്പറേറ്റീവ് സൊസൈറ്റി, ചക്കിട്ടപാറ വനിതാ സഹകരണ സംഘം, മമ്പാട് പഞ്ചായത്ത് വനിതാ സഹകരണ സംഘം (വനിതാ സഹകരണ സംഘ വിഭാഗം) വള്ളിച്ചിറ പട്ടികജാതി സർവീസ് സഹകരണ സംഘം, ഇളം കുന്നപ്പുഴ എസ്.സി/ എസ്.റ്റി കോ ഓപ്പറേറ്റീവ് സൊസൈറ്റി, ശ്രീകണ്ഠപുരം പട്ടിക ജാതി വികസന കോ ഓപ്പറേറ്റീവ് സൊസൈറ്റി ( പട്ടികജാതി/ പട്ടിക വർഗ്ഗ സഹകരണ സംഘ വിഭാഗം), ഇ.എം.എസ് മെമ്മോറിയൽ ആശുപത്രി & റിസർച്ച് സെന്റർ പെരിന്തൽമണ്ണ, തളിപ്പറമ്പ് എഡ്യൂക്കേഷണൽ സഹകരണ സംഘം, കൊല്ലം ജില്ലാ സഹകരണ ആശുപത്രി ( ആശുപത്രി / വിദ്യാഭ്യാസ സഹകരണ സംഘ വിഭാഗം), റീജ്യണൽ ഫ്രൂട്സ് & വെജിറ്റബിൾ പ്രൊഡ്യൂസേഴ്സ് മാർക്കറ്റിങ്ങ് കോ ഓപ്പറേറ്റീവ് സൊസൈറ്റി, കണ്ണൂർ, കരുവാരക്കുണ്ട് റൂറൽ സഹകരണ സംഘം, അമ്പലവയൽ വ്യാപാരി വ്യവസായി സഹകരണ സംഘം വയനാട് ( പലവക / ലേബർ കോൺട്രാക്ട് സഹകരണ സംഘം) എന്നിവയുടെ ഭാരവാഹികൾ മന്ത്രിയിൽ ഉപഹാരങ്ങൾ ഏറ്റുവാങ്ങി. രാവിലെ പരിപാടികൾക്ക് തുടക്കം കുറിച്ച് മന്ത്രി പതാക ഉയർത്തി.