കേരളം, കര്‍ണാടകം, തമിഴ്‌നാട് എന്നീ മൂന്ന് സംസ്ഥാനങ്ങളുടെ പരിധിയിലെ ക്രിമിനല്‍ കേസ് നടപടികള്‍ വേഗത്തിലാക്കുന്നതിനും ക്രിമിനല്‍ കേസ് പ്രതികളെ പിടികൂടുന്നതിനുമായി യോജിച്ച് പ്രവര്‍ത്തിക്കുന്നതിനുള്ള പദ്ധതി 15 ദിവസത്തിനകം ആരംഭിക്കുമെന്ന് സംസ്ഥാന പോലീസ് മേധാവി ലോക്‌നാഥ് ബെഹ്‌റ പറഞ്ഞു.
കാസര്‍കോട് കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ അദാലത്തിന് ശേഷം സംസാരിക്കുകയായിരുന്നു അദ്ദേഹം. സംസ്ഥാന അതിര്‍ത്തികള്‍ കടന്നുള്ള കുറ്റകൃത്യങ്ങളില്‍ നടപടികള്‍ വേഗത്തിലാക്കാന്‍ മൂന്ന് സംസ്ഥാനങ്ങളുടെ ഏകീകൃത സംവിധാനം സഹായകരമാവുമെന്നും വിദേശങ്ങളിലേക്ക് രക്ഷപ്പെടുന്നവരെ വലയിലാക്കാന്‍ ആവശ്യമാണെങ്കില്‍ ഇന്റര്‍പോളിന്റെ സഹായം തേടുമെന്നുംഅദ്ദേഹം പറഞ്ഞു.
ഏകീകൃത നിരീക്ഷണ സംവിധാനം നടപ്പാക്കും
സെന്‍ട്രലൈസ്ഡ് ഇന്‍ഡിവിജ്വല്‍ മോണിറ്ററിങ് സിസ്റ്റം (സി ഐ എം എസ്) സംസ്ഥാനത്ത് ഉടന്‍ നടപ്പാക്കും. വീടുകളിലും വ്യാപാര സ്ഥാപനങ്ങളിലുമുള്ള ഇന്റര്‍നെറ്റ് പ്രോട്ടോകോള്‍ അധിഷ്ഠിത ഡിജിറ്റല്‍ സിസിടിവി കളിലെ ദൃശ്യങ്ങള്‍ കേന്ദ്രീകൃതമായി നിരീക്ഷിക്കുന്ന സംവിധാനം തിരുവനന്തപുരത്ത് ആരംഭിക്കും. കുറ്റകൃത്യങ്ങള്‍ കണ്ടെത്തുന്നതിനും യഥാര്‍ത്ഥ പ്രതികളെ അറസ്റ്റ് ചെയ്യുന്നതിനും ഈ സംവിധാനം ഉപകരിക്കുമെന്ന് ഡി ജി പി പറഞ്ഞു.
ജില്ലയിലെ പോലീസ് അംഗബലം വര്‍ധിപ്പിക്കുന്നത് പരിഗണിക്കും
കാസര്‍കോട് ജില്ലയിലെ പോലീസ് സേനാംഗങളുടെ എണ്ണം കൂട്ടണം, ജില്ലയില്‍ സബ് ഡിവിഷന്‍ മൂന്നാക്കണം എന്നീ ആവശ്യങ്ങള്‍ വളരെ ഗൗരവത്തോടെ പരിഗണിക്കുമെന്ന് ഡി ജി പി പറഞ്ഞു. 2020, 2025, 2030 വരെ ജില്ലയില്‍ ആവശ്യമായി വരുന്ന പോലീസ് സേനയുടെ രൂപരേഖ തയ്യാറാക്കാന്‍ ഉത്തരമേഖല ഡിഐജിയുടെ നേതൃത്വത്തില്‍ സമിതി രൂപീകരിച്ച് നടപടി സ്വീകരിക്കാന്‍ നിര്‍ദ്ദേശം നല്‍കി.
കണ്ണൂര്‍, കാസര്‍കോട് ജില്ലാ പോലീസ് മേധാവികള്‍ സമിതിയില്‍ അംഗങ്ങളായിരിക്കും. ഉപ്പള പോലീസ് സ്റ്റേഷന്‍ അടുത്ത സാമ്പത്തിക വര്‍ഷം യാഥാത്ഥ്യമാക്കും. വാടകക്കെട്ടിടങ്ങളില്‍ പ്രവര്‍ത്തിക്കുന്ന പോലീസ് സ്റ്റേഷനുകള്‍ക്ക് ഭൂമി ലഭ്യമായാല്‍ ഉടന്‍ കെട്ടിടം നിര്‍മിക്കും.
ഭൂമി ലഭ്യമല്ലാത്തതിനാല്‍ നാല്‍പതോളം പോലീസ് സ്റ്റേഷനുകള്‍ സംസ്ഥാനത്ത് വാടകക്കെട്ടിടത്തിലാണ്. ഇതര സംസ്ഥാനങ്ങളുമായി അതിര്‍ത്തി പങ്കിടുന്ന ജില്ലകളില്‍ ക്രിമിനലുകള്‍ മറ്റു സംസ്ഥാനങ്ങളിലേക്ക് കടന്ന് രക്ഷപ്പെടുന്ന സാഹചര്യം നിലവിലുണ്ട്. കാസര്‍കോട്ടെ ക്രിമിനല്‍ പ്രവര്‍ത്തനങ്ങളില്‍ പലതും സംഘടിതമാണ്. കുറ്റകൃത്യം നടത്തുന്നവര്‍ക്കെതിരെ ശക്തമായ നടപടിയുണ്ടാകുമെന്ന് ഡി ജി പി പറഞ്ഞു.
സ്വര്‍ണ കള്ളക്കടത്ത് കേസില്‍ രണ്ടുപേരെ തട്ടികൊണ്ടുപോയ സംഭവത്തില്‍ പ്രതികളെ പിടികൂടാന്‍ ഇന്റര്‍പോളിന്റെ സഹായം തേടും. കാസര്‍കോട് ജില്ലയില്‍ പോലീസ് വാഹനങ്ങള്‍ കൂടുതല്‍ അനുവദിക്കുന്നതിന് നടപടിയുണ്ടാകുമെന്നും അദ്ദേഹം പറഞ്ഞു.
അദാലത്തില്‍ 64 പരാതികള്‍ പരിഗണിച്ചു
പോലീസ് വകുപ്പുമായി ബന്ധപ്പെട്ട് ജില്ലയിലെ പൊതുജനങ്ങള്‍ക്കുള്ള പരാതികള്‍ പരിഹരിക്കുന്നതിനായി സംസ്ഥാന പോലീസ് മേധാവി ലോക്‌നാഥ് ബെഹ്‌റ സിവില്‍സ്റ്റേഷനിലെ കോണ്‍ഫറന്‍സ് ഹാളില്‍ പരാതി പരിഹാര അദാലത്ത് നടത്തി. അദാലത്തില്‍ 64 പരാതികള്‍ പരിഗണിച്ചു.
81 പരാതികളായിരുന്നു അദാലത്തില്‍ രജിസ്റ്റര്‍ ചെയ്തത്. ജില്ലാ പോലീസ് മേധാവി ജെയിംസ് ജോസഫ് എ എസ് പി, ഡി ശില്‍പ അഡീഷണല്‍ എസ്പി പിബി പ്രശോഭ,് ഡിവൈഎസ്പിമാരായ പി കെ സുധാകരന്‍, പി.ബാലകൃഷ്ണന്‍ നായര്‍, എം. സുനില്‍കുമാര്‍, എം. അസിനാര്‍, ജയ്‌സണ്‍ എബ്രഹാം, എം. പ്രദീപ് കുമാര്‍ എന്നിവരും ഇന്‍സ്‌പെക്ടര്‍മാരും സബ് ഇന്‍സ്‌പെക്ടര്‍മാരും അദാലത്തില്‍ സംബന്ധിച്ചു. പരമാവധി പരാതികള്‍ തീര്‍പ്പാക്കി. ചിലത് കേസ് രജിസ്റ്റര്‍ ചെയ്യാന്‍ നിര്‍ദ്ദേശം നല്‍കി.
മഞ്ചേശ്വരം ചര്‍ച്ച് ആക്രമണം: ശക്തമായ നടപടി
മഞ്ചേശ്വരം കുണ്ടുകൊളക്കയിലെ ഒവര്‍ ലേഡി ഓഫ് മേഴ്‌സി ചര്‍ച്ചില്‍ ആക്രമണം നടത്തിയവര്‍ക്കെതിരേ അന്വേഷണം ഊര്‍ജിതമാക്കിയതായും കുറ്റക്കാര്‍ക്കെതിരേ ശക്തമായ നടപടിയെടുക്കുമെന്നും ഡിജിപി അറിയിച്ചു. ചര്‍ച്ചിനെ പ്രതിനിധീകരിച്ചെത്തിയ ഫാദര്‍ വിന്‍സെന്റിന്റെ നേതൃത്വത്തിലുള്ള സംഘം നല്‍കിയ പരാതി പരിഗണിക്കുകയായിരുന്നു പോലീസ് മേധാവി.
നാട്ടുകാരുടെ പൂര്‍ണമായ സഹകരണത്തോടെ നൂറു വര്‍ഷത്തോളമായി സമാധാനാന്തരീക്ഷത്തില്‍ പ്രവര്‍ത്തിക്കുന്ന ചര്‍ച്ച് ആക്രമിക്കപ്പെട്ടത് നിര്‍ഭാഗ്യകരമാണെന്നും പരമാവധി വേഗത്തില്‍ അന്വേഷണം പൂര്‍ത്തിയാക്കുമെന്ന് ഡിജിപി ഉറപ്പു നല്‍കിയതായും ഫാദര്‍ വിന്‍സെന്റ് പറഞ്ഞു.
എസ്പിസി: എയ്ഡഡ് സ്‌കൂളുകള്‍ക്ക് ഫണ്ട് അനുവദിക്കണമെന്ന് പരാതി
സ്റ്റുഡന്റ് പോലീസ് കേഡറ്റ് പദ്ധതി ഫലപ്രദമായി നടപ്പിലാക്കുന്ന എയ്ഡഡ് സ്‌കൂളുകള്‍ ഫണ്ട് അനുവദിക്കുന്നില്ലെന്ന് പെര്‍ഡാല നവജീവന്‍ ഹൈസ്‌കൂള്‍ അധികൃതര്‍ ഡിജിപിയ്ക്ക് അദാലത്തില്‍ പരാതി നല്‍കി. എസ്പിസിക്ക് വേണ്ടിയുള്ള ക്യാംപുകള്‍ക്കും പരിശീലനങ്ങള്‍ക്കും വേണ്ടി സര്‍ക്കാര്‍ സ്‌കൂളുകള്‍ക്ക് ഫണ്ട് അനുവദിക്കുമ്പോള്‍ എയ്ഡഡ് സ്‌കൂളുകള്‍ തഴയപ്പെടുകയാണെന്നും പരാതി പരിഗണിക്കാമെന്ന് ഡിജിപി
അറിയിച്ചതായും പ്രധാനാധ്യാപിക പി പി തങ്കമണി പറഞ്ഞു.
റിയാസ് മൗലവി വധമുള്‍പ്പെടെ കാസര്‍കോട് ചൂരി മേഖലകളില്‍ നടക്കുന്ന വര്‍ഗീയ സംഘര്‍ഷങ്ങളില്‍ കൊലയാളികള്‍ വരെ രക്ഷപ്പെടുന്ന സാഹചര്യമുണ്ടെന്നും പ്രദേശത്ത് സമാധാനാന്തരീക്ഷം നിലനിര്‍ത്താന്‍ പോലീസ് കാര്യക്ഷമമായി ഇടപെടണമെന്ന് ആവശ്യപ്പെട്ട് ചൂരി ഓള്‍ഡ് ജുമാ മസ്ജിദ് കമ്മിറ്റി ഭാരവാഹികള്‍ പരാതി നല്‍കി. പരാതിയില്‍ ആവശ്യമായ നടപടി സ്വീകരിക്കാന്‍ എ എസ് പിയെ ചുമതലപ്പെടുത്തി.
ബദിയടുക്ക പോലീസ് സ്റ്റേഷന്‍ കോമ്പൗണ്ടില്‍ സ്ഥിതിചെയ്യുന്ന 45 വര്‍ഷത്തോളം പഴക്കമുള്ള കെട്ടിടം പൊളിച്ചു മാറ്റി ജനമൈത്രി പോലീസ്, കുട്ടിപ്പോലീസ്, ബോധവല്‍ക്കരണം തുടങ്ങിയവയ്ക്ക് വേണ്ടി പുതിയ കെട്ടിടം നിര്‍മിക്കണമെന്നാവശ്യപ്പെട്ട് നീര്‍ച്ചാലിലെ പൊതുപ്രവര്‍ത്തകന്‍ എം എച്ച് ജനാര്‍ദ്ധന നല്‍കിയ പരാതി തുടര്‍ നടപടികള്‍ക്കായി എ എസ് പിക്ക് കൈമാറി.
നീലേശ്വരം സ്റ്റേഷന്‍ പരിധിയിലെ എരിക്കുളം പള്ളി ജനവരി 23ന് തീവെച്ച് നശിപ്പിച്ച സംഭവത്തില്‍ കുറ്റക്കാരെ ഇനിയും പിടികൂടിയില്ലെന്നാരോപിച്ച് കാഞ്ഞങ്ങാട് സംയുക്ത ജമാഅത്ത് ജനറല്‍ സെക്രട്ടറി ബഷീര്‍ വെള്ളിക്കോത്തിന്റെ നേതൃത്വത്തിലുള്ള സംഘം പരാതി നല്‍കി. പരാതി ജില്ലാ ക്രൈബ്രാഞ്ച് ഡിവൈഎസ്പിയുടെ നേതൃത്വത്തില്‍ പരിശോധിക്കാന്‍ പോലീസ് മേധാവി നിര്‍ദേശിച്ചു.
പൈവളികെ അട്ടഗോളിയില്‍ പഞ്ചായത്ത് റോഡ് സ്വകാര്യ വ്യക്തി കൈയേറി വഴി തടസ്സപ്പെടുത്തിയതില്‍ അധികൃതര്‍ നടപടി സ്വീകരിക്കുന്നില്ലെന്ന് ആരോപിച്ച് പ്രദേശത്തെ വീട്ടമ്മ സുലൈഖയും മകന്‍ പി ജി മുസ്തഫയും പരാതി നല്‍കി നേരത്തേ ബാബു പൂജാരിയെന്ന വ്യക്തി പഞ്ചായത്ത് റോഡിനായി വിട്ടു നല്‍കിയ സ്ഥലത്ത് മറ്റൊരാള്‍ കുഴി നിര്‍മിച്ച് മതില്‍ കെട്ടി വഴിമുടക്കിയെന്നാണ് പരാതി. മതില്‍ പൊളിച്ചു മാറ്റാന്‍ ഡിജിപി കളക്ടര്‍ക്ക് നിര്‍ദ്ദേശം നല്‍കി.