മാരാരിക്കുളം തെക്ക് പഞ്ചായത്തിലെ മുഴുവൻ വാർഡുകളും കണ്ടെയിന്‍മെന്റ് സോണിലാക്കി
ആലപ്പുഴ: അമ്പലപ്പുഴ താലൂക്കിൽ മാരാരിക്കുളം തെക്ക് പഞ്ചായത്തിലെ മുഴുവൻ വാർഡുകളും കൺടെയിൻമെൻറ് സോണായി പ്രഖ്യാപിച്ച് ജില്ല കളക്ടര്‍ ഉത്തരവായി. ഈ പ്രദേശങ്ങളിൽ കോവിഡ് 19 രോഗബാധ സ്ഥിരീകരിച്ചതിനെ തുടർന്ന് രോഗവ്യാപനം തടയുന്നതിനായി ഈ വാർഡുകൾ കൺടൈൻമെൻറ് സോൺ ആക്കണമെന്ന് ജില്ലാ മെഡിക്കൽ ഓഫീസർ ശുപാർശ നല്‍കിയിരുന്നു.
ചെങ്ങന്നൂർ താലൂക്കിലെ പുലിയൂർ ഗ്രാമപഞ്ചായത്തിലെ വാർഡ് 1, രോഗവ്യാപനം നിയന്ത്രണവിധേയമാണെന്ന് ജില്ലാ മെഡിക്കൽ ഓഫീസർ റിപ്പോർട്ട് ചെയ്തതിനെ തുടർന്ന് ഈ വാർഡിനെ കണ്ടൈൺമെൻറ് സോണിൽ നിന്ന് ഒഴിവാക്കുകയും ചെയ്തു
മാരാരിക്കുളം തെക്ക് പഞ്ചായത്തിലെ മുഴുവൻ വാർഡുകളിലെയും റോഡുകളിലൂടെയുള്ള വാഹന ഗതാഗതം നിരോധിച്ചു. അവശ്യ വസ്തുക്കളുടെ വിതരണത്തിനും അടിയന്തിര വൈദ്യ സഹായത്തിനുള്ള യാത്രയ്ക്കും നിയന്ത്രണങ്ങള്‍ക്ക് വിധേയമായി ഇളവുകള്‍ ഉണ്ടായിരിക്കും. അവശ്യ / ഭക്ഷ്യവസ്തുക്കള്‍ വിതരണം ചെയ്യുന്ന സ്ഥാപനങ്ങള്‍ക്ക് മാത്രം രാവിലെ 7് മണി മുതല്‍ ഉച്ചയ്ക്ക് 2 മണിവരെയും പൊതുവിതരണ സ്ഥാപനങ്ങള്‍ക്ക് (പി.ഡി.എസ്.) രാവിലെ 8 മണി മുതല്‍ ഉച്ചയ്ക്ക് 2 മണി വരെയും പ്രവര്‍ത്തിക്കാം. ഒരേ സമയം അഞ്ചിലധികം പേര്‍ എത്താന്‍ പാടില്ല. മറ്റ് സ്ഥാപനങ്ങള്‍ തുറക്കാന്‍ പാടില്ല. യാതൊരു കാരണവശാലും നാലിലധികം ആളുകള്‍ കൂട്ടം കൂടാന്‍ പാടില്ല. പ്രദേശങ്ങളില്‍ പോലീസ് നിരീക്ഷണവും തദ്ദേശ സ്വയംഭരണ വകുപ്പിന്റയും ആരോഗ്യ വിഭാഗത്തിന്റെയും നിരീക്ഷണവും ശക്തമാക്കേണ്ടതാണ്. ഈ വാര്‍ഡുകളില്‍ താമസിക്കുന്നവര്‍ക്ക് പുറത്തുനിന്ന് അവശ്യവസ്തുക്കള്‍ ആവശ്യമായി വരുന്നപക്ഷം പോലീസ്, വാര്‍ഡ് ആര്‍ ആര്‍.റ്റി കളുടെ സേവനം നേടാവുന്നതാണ് .
ഈ പ്രദേശങ്ങളിലെ ആരാധാനാലയങ്ങള്‍ തുറക്കാന്‍ പാടില്ല. വിവാഹം, മരണാനന്തര ചടങ്ങുകള്‍ എന്നിവയ്ക്ക് സുരക്ഷാമാനദണ്ഡങ്ങള്‍ പാലിച്ച് പരമാവധി 20 പേര്‍ക്ക് മാത്രം പങ്കെടുക്കാം. കോവിഡ് 19 രോഗനിര്‍വ്യാപന പ്രവര്‍ത്തനവുമായി നേരിട്ട് ബന്ധമുള്ള സര്‍ക്കാര്‍ ഓഫീസുകള്‍ മാത്രം അവശ്യജീവനക്കാരെ വച്ച് പ്രവര്‍ത്തിപ്പിക്കാം. പോലീസ്, ട്രഷറി, പെട്രോളിയം, എല്‍. പി. ജി. പോസ്റ്റോഫീസുകള്‍ എന്നിവയ്ക്കും നിയന്ത്രണമാന ദണ്ഡങ്ങള്‍ പാലിച്ച് പ്രവര്‍ത്തിക്കാം.
മുഴുവന്‍ വാര്‍ഡുതല ജാഗ്രതാ സമിതികളും അടിയന്തിരമായി കോവിഡ് 19 നിര്‍വ്യാപന/ നിരീക്ഷണ നടപടികള്‍ സ്വീകരിക്കണം.
ഈ ഉത്തരവുകള്‍ ലംഘിക്കുന്നവര്‍ക്കെതിരെ പകര്‍ച്ചവ്യാധി നിയന്ത്രണ നിയമപ്രകാരവും 2005 ദുരന്തനിവാരണ നിയമപ്രകാരവും ഐ.പി.സി. സെക്ഷന്‍ 188,269 പ്രകാരവും നിയമനടപടികള്‍ സ്വീകരിക്കുമെന്ന് ജില്ല കളക്ടര്‍ അറിയിച്ചിട്ടുണ്ട്.
കണ്ടൈൻമെന്റ് സോണിൽ നിന്നും ഒഴിവാക്കി
ചേർത്തല താലൂക്കിലെ തൈക്കാട്ടുശ്ശേരി, പെരുമ്പളം, കഞ്ഞിക്കുഴി, പാണാവള്ളി, തുടങ്ങിയ ഗ്രാമ പഞ്ചായത്തുകൾ പൂർണമായും, തണ്ണീർമുക്കം ഗ്രാമപഞ്ചായത്തിലെ 5, 21 ഒഴികെയുള്ള എല്ലാ വാർഡുകളും, മുഹമ്മ ഗ്രാമപഞ്ചായത്തിലെ 15 ഒഴികെയുള്ള എല്ലാ വാർഡുകളും,ചേന്നം പള്ളിപ്പുറം ഗ്രാമ പഞ്ചായത്തിലെ 14 ഒഴികെയുള്ള എല്ലാ വാർഡുകളും , വയലാർ ഗ്രാമ പഞ്ചായത്തിലെ 15 ആം വാർഡ്ഒഴികെയുള്ള എല്ലാ വാർഡുകളും കണ്ടൈൻമെന്റ് സോണിൽ നിന്ന് ഒഴിവാക്കി.
ഈ സ്ഥലങ്ങളിൽ രോഗവ്യാപനം നിയന്ത്രണവിധേയമായി എന്നുള്ള ജില്ല മെഡിക്കൽ ഓഫീസറുടെ റിപ്പോർട്ടിനെ തുടർന്നാണ് കണ്ടൈൻമെന്റ് സോണിൽ നിന്നും ഒഴിവാക്കിയത്. ചേർത്തല താലൂക്കിലെ ഈ പ്രദേശങ്ങളിൽ ഒഴിച്ച് ബാക്കി എല്ലാ ഗ്രാമപഞ്ചായത്തുകളിലും വാർഡുകളിലും നിയന്ത്രണങ്ങൾ ഇനിയൊരു ഉത്തരവുണ്ടാവുന്നതു വരെ തുടരുമെന്ന് കളക്ടർ അറിയിച്ചു.