ആലപ്പുഴ : കായംകുളം ദേശീയ പാതയോരത്തെ കെ.റ്റി.ഡി.സിയുടെ ഹോട്ടല് ആരാം ഇനി മുതല് ഹോട്ടല് ആഹാര്. കേരളത്തിലുടനീളം കെ ടി ഡി സി മോട്ടലുകളുടെയും റസ്റ്ററന്റുകളുടെ ബ്രാന്റിങ്ങിന്റെ ഭാഗമായിട്ടാണ് ആരാം ഹോട്ടല് പേരിലും രൂപത്തിലും മാറ്റം വരുത്തി ഹോട്ടല് അഹാര് എന്ന പേരില് നവീകരിച്ചത്.
നവീകരിച്ച ഹോട്ടലിന്റെ ഉദ്ഘാടനം കെ.റ്റി.ഡി.സി ചെയര്മാന് എം വിജയകുമാര് നിര്വ്വഹിച്ചു. കൊവിഡ് കാലത്തും സാമൂഹിക പ്രതിബദ്ധതയോടെയാണ് ടൂറിസം രംഗത്ത് കെ ടി ഡി സി പ്രവര്ത്തിക്കുന്നത്. സാമൂഹിക പ്രതിബദ്ധതയുടെ അടിസ്ഥാനത്തില് കെ ടി ഡി സി മുന്കൈ എടുത്ത് ഒരുപാട് കാര്യങ്ങള് ചെയ്തിട്ടുണ്ട്. ആളുകള്ക്കുള്ള ക്വാറന്റൈന് സൗകര്യം ഉള്പ്പെടെ കെ ടി ഡി സി ചെയ്തു വരുന്നു. ഓണ്ലൈന് പഠന സൗകര്യം ഇല്ലാത്ത കുട്ടികള്ക്കായി നൂറിലധികം ടി വി കളാണ് കെ ടി ഡി സി സൗജന്യമായി എത്തിച്ചു നല്കിയത്. ഈ ഹോട്ടല് ഇത്തരത്തില് നവീകരിക്കുന്നതിനായി കായംകുളം എം എല് എ യുടെയും നഗരസഭയുടെയും പൂര്ണ പിന്തുണ ലഭിച്ചിട്ടുണ്ടന്നും അദ്ദേഹം പറഞ്ഞു.
കായംകുളം എംഎല്എ അഡ്വ. യു പ്രതിഭ അധ്യക്ഷത വഹിച്ചു.
ആലപ്പുഴ ജില്ലയുടെയും കായംകുളം മണ്ഡലത്തിന്റെയും പ്രവേശന കവാടത്തില് സ്ഥിതി ചെയ്യുന്ന ഹോട്ടല് ദീര്ഘദൂര യാത്രക്കാരെ വളരെയധികം ആകര്ഷിക്കുന്ന രീതിയിലാണ് നവീകരിച്ചിരിക്കുന്നതെന്നും കൃഷ്ണപുരം സാംസ്കാരിക കേന്ദ്രത്തില് ആരംഭിക്കുന്ന സാഹസിക ടൂറിസം പദ്ധതിക്ക് ഹോട്ടലിന്റെ നവീകരണം വളരെയേറെ പ്രയോജനകരമാകുമെന്നും അവര് പറഞ്ഞു.
കുറഞ്ഞ സമയത്തിനുള്ളില് ചെറിയ മുതല്മുടക്കിലാണ് ഹോട്ടലിന്റെ നവീകരണ പ്രവര്ത്തനങ്ങള് നടത്തിയത്. വിശ്രമത്തിനായുള്ള മുറികള്, ശീതീകരിച്ചതും അല്ലാത്തതുമായ റസ്റ്റ്റന്റുകള്, കിച്ചണുകള്, വൃത്തിയുള്ള ശുചിമുറികള്, വിശാലമായ പാര്ക്കിംഗ് സൗകര്യം എന്നിവ കൂടാതെ ഹോട്ടല് രാത്രിസഞ്ചാരികള്ക്കും കാണാന് എളുപ്പത്തിനായി മുന്വശത്തെ മതിലുകള് നീക്കം ചെയ്യുകയും ഇന്റര് ലോക്ക് റ്റൈലുകള് പാകി ഭംഗിയാക്കുകയും ലൈറ്റ്കള് സജ്ജീകരിക്കുകയും ചെയ്തു. ജില്ലയുടെ ടൂറിസം രംഗത്തും നവീകരിച്ച ഹോട്ടല് പ്രയോജനകരമാകും. കൃഷ്ണപുരം കൊട്ടാരം, അഴീക്കല് ബീച്ച്, അമൃതപുരി, ഓച്ചിറ പരബ്രഹ്മക്ഷേത്രം എന്നിവ ഇതിനടുത്താന് സ്ഥിതിചെയ്യുന്നത്. രാജ്യത്തിന്റെ വടക്ക്- കിഴക്ക് സംസ്ഥാനത്ത് നിന്നുള്ളവരെ കൂടി ആകര്ഷിക്കുകയെന്ന ലക്ഷ്യത്തോടെയാണ് ഹോട്ടലിന് ആഹാര് എന്ന പേര് നല്കിയതെന്ന് കെ ടി ഡി സി എംഡി വി.ആര് കൃഷ്ണതേജ പറഞ്ഞു. വെജിറ്റേറിയന്- നോണ് വെജിറ്റേറിയന് ഭക്ഷണ വിഭവങ്ങളും ഇവിടെ ലഭ്യമാണ്.
കോവിഡ് മാനദണ്ഡങ്ങള് പാലിച്ചുകൊണ്ട് ലളിതമായി സംഘടിപ്പിച്ച ചടങ്ങില് നഗരസഭാ ചെയര്മാന് എന് ശിവദാസന്, മുനിസിപ്പല് കൗണ്സിലര് കെ കെ അനില്കുമാര്, കെ ടി ടി സി ബോര്ഡ് അംഗം കെ പി കൃഷ്ണകുമാര് എന്നിവര് പങ്കെടുത്തു.