എറണാകുളം: കോടനാട് പ്രാഥമിക ആരോഗ്യ കേന്ദ്രത്തിൽ പാലിയേറ്റീവ് ബ്ലോക്ക് നിർമാണം എൽദോസ് കുന്നപ്പിള്ളി എം എൽ എ ഉദ്ഘാടനം ചെയ്തു.കൂവപ്പടി ബ്ലോക്ക് പഞ്ചായത്ത് 2020 – 21 വാർഷിക പദ്ധതിയിൽ 5 ലക്ഷം രൂപ വകയിരുത്തിയാണ് കോടനാട് ഗവണ്മെന്റ് ആശുപത്രിയിൽ പാലിയേറ്റീവ് ബ്ലോക്കിന് വേണ്ടിയുള്ള കെട്ടിട നിർമ്മാണം ആരംഭിച്ചത്. ജില്ലയിൽ ആദ്യമായാണ് പാലിയേറ്റീവ് ബ്ലോക്ക് നിർമ്മിക്കാൻ കുടുംബാരോഗ്യ കേന്ദ്രത്തിന് ബ്ലോക്ക് പഞ്ചായത്ത് പണം അനുവദിക്കുന്നത്. ബ്ലോക്ക് പഞ്ചായത്തുകൾ സി.എച്ച്.സികൾക്കാണ് ഇതു വരെ പണം അനുവദിച്ചിരുന്നത്.

കൂവപ്പടി ഗ്രാമ പഞ്ചായത്തിൽ 200 ൽ പരം കിടപ്പ് രോഗികളാണ് തീവ്ര പരിചരണം ആവശ്യമായിട്ടുള്ളവർ. ആഴ്ചയിൽ നാല് ദിവസം ഹോം കെയർ സൗകര്യമുണ്ട്. കൂടാതെ ബ്ലോക്ക് പഞ്ചായത്തിന്റെ സെക്കന്ററി പാലിയേറ്റീവ് ഹോം കെയറും നൽകുന്നുണ്ട്. ബ്ലോക്കിനും പഞ്ചായത്തിനും ഹോം കെയർ സൗകര്യത്തിന് എം.എൽ.എ ഫണ്ടിൽ നിന്നും തുക അനുവദിച്ച് വാഹനവും നൽകിയിട്ടുണ്ട്. പാലിയേറ്റീവ് വിഭാഗത്തിന്റെ പ്രവർത്തനങ്ങൾക്ക് ഓഫിസ് സൗകര്യം ഒരുക്കുകയാണ് കെട്ടിട നിർമ്മാണത്തിന്റെ ലക്ഷ്യം.

ഗ്രാമഞ്ചായത്ത് പ്രസിഡന്റ് കുഞ്ഞുമോൾ തങ്കപ്പൻ അദ്ധ്യക്ഷത വഹിച്ച യോഗത്തിൽ ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി ചെയർമാൻ എം .പി. പ്രകാശ് സ്വാഗതം പറഞ്ഞു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി ചെയർ പേഴ്സൻ ജാൻസി ജോർജ്ജ്, വൈസ് പ്രസിഡന്റ് മായാ കൃഷ്ണകുമാർ , മെമ്പർ സിന്ധു അരവിന്ദ്, ഡോക്ടർ വിക്ടർ ജെ. ഫെർണ്ണാണ്ടസ്, കോൺഗ്രസ്സ് മണ്ഡലം പ്രസിഡന്റ് പി.പി.എൽദോ , സുന്ദരൻ ചെട്ടിയാർ, ബിജു കോടനാട്, പാലിയേറ്റീവ് നഴ്സ് മേരി , എൽജി, സേവ്യർ എന്നിവർ പങ്കെടുത്തു.