2025 നവംബർ 7, 8, 9, 10 തീയതികളിൽ പാലക്കാട് നടക്കുന്ന സംസ്ഥാന കേരള സ്‌കൂൾ ശാസ്‌ത്രോത്സവത്തിന് വേണ്ടി വിദ്യാർത്ഥികൾ, അദ്ധ്യാപകർ, പൊതുജനങ്ങൾ എന്നിവരിൽ നിന്നും പൊതുവിദ്യാഭ്യാസ വകുപ്പ് ലോഗോ ക്ഷണിച്ചു. ശാസ്ത്രം, ഗണിത ശാസ്ത്രം, സാമൂഹ്യ ശാസ്ത്രം, പ്രവർത്തി പരിചയം, ഇൻഫർമേഷൻ ടെക്‌നോളജി, തൊഴിലധിഷ്ഠിത എക്‌സ്‌പോ എന്നിവയുടെ പ്രതീകങ്ങൾ ഉൾപ്പെടുത്തിയാകണം ലോഗോ തയ്യാറാക്കേണ്ടത്. കേരള സ്‌കൂൾ ശാസ്‌ത്രോത്സവം 2025 നവംബർ 7, 8, 9, 10 എന്നുള്ള രേഖപ്പെടുത്തലുകൾ ഉണ്ടാകണം. പാലക്കാട് ജില്ലയുടേതായ പ്രതീകം അനുയോജ്യമാംവണ്ണം ഉൾപ്പെടുത്താം. എഡിറ്റ് ചെയ്യാൻ കഴിയുന്ന തരത്തിലെ ഫോർമാറ്റിൽ പെൻഡ്രൈവും ഒപ്പം എ4 സൈസ് പേപ്പറിൽ കളർ പ്രിന്റും നൽകണം. ലോഗോകൾ തയ്യാറാക്കി അയയ്ക്കുന്ന കവറിന് പുറത്ത് ‘കേരള സ്‌കൂൾ ശാസ്‌ത്രോത്സവം’ എന്ന് പ്രത്യേകം രേഖപ്പെടുത്തണം.

ലോഗോകൾ ആഗസ്റ്റ് 25ന് വൈകുന്നേരം 5ന് മുമ്പ് സന്തോഷ് സി എ, പൊതുവിദ്യാഭ്യാസ അഡീഷണൽ ഡയറക്ടർ (അക്കാദമിക്), പൊതുവിദ്യാഭ്യാസ ഡയറക്ടറുടെ കാര്യാലയം, ജഗതി, തിരുവനന്തപുരം 695014 എന്ന വിലാസത്തിൽ ലഭ്യമാക്കണം.