ആലപ്പുഴ ജില്ലയിലെ എല്ലാ അങ്കണവാടികളിലും പുതിയ പോഷക സമൃദ്ധമായ ഭക്ഷണ മെനു നടപ്പാക്കുന്നതിന്റെയും പോഷണ മാസാചരണത്തിന്റെയും ജില്ലാതല ഉദ്ഘാടനം മാരിക്കുളം തെക്ക് പഞ്ചായത്തിലെ 75-ാം നമ്പർ അങ്കണവാടിയിൽ ജില്ലാ പഞ്ചായത്ത് പ്രസിഡൻ്റ് കെ.ജി. രാജേശ്വരി നിർവ്വഹിച്ചു. കുട്ടികളുടെ ആരോഗ്യ സംരക്ഷണത്തിലും സമഗ്ര വികസനത്തിലും അങ്കണവാടികൾക്ക് വലിയ പ്രാധാന്യമുണ്ടെന്നും പെൺകുട്ടികളുടെ വിദ്യാഭ്യാസം, പ്രതിഭ എന്നിവയുടെ വികസനം സമൂഹത്തിന്റെയും രാജ്യത്തിന്റെയും വളർച്ചക്ക് നിർണ്ണായകമാണെന്നും ജില്ലാ പഞ്ചായത്ത് പ്രസിഡൻ്റ് പറഞ്ഞു.

പരിഷ്‌ക്കരിച്ച ഭക്ഷണ മെനു അനുസരിച്ച് ഓരോ ദിവസവും വൈവിധ്യമായ ഭക്ഷണമാണ് കുട്ടികൾക്ക് നൽകുക. തിങ്കളാഴ്ച പ്രാതലിന് പാൽ, പിടി, കൊഴുക്കട്ട/ഇലയട, ഉച്ചഭക്ഷണമായി ചോറ്, ചെറുപയർ കറി, ഇലക്കറി, ഉപ്പേരി/തോരൻ, പൊതുഭക്ഷണമായി ധാന്യം, പരിപ്പ് പായസം. ചൊവ്വാഴ്ച പ്രാതലിന് ന്യൂട്രി ലഡു, ഉച്ചയ്ക്ക് മുട്ട ബിരിയാണി/മുട്ട പുലാവ്, ഫ്രൂട്ട് കപ്പ്, പൊതുഭക്ഷണമായി റാഗി അട. ബുധനാഴ്ച പ്രാതലിന് പാൽ, പിടി, കൊഴുക്കട്ട/ഇലയട, കടല മിഠായി, ഉച്ചയ്ക്ക് പയർ കഞ്ഞി, വെജ് കിഴങ്ങ് കൂട്ട് കറി, സോയ ഡ്രൈ ഫ്രൈ, പൊതുഭക്ഷണം ഇഡ്ഢലി, സാമ്പാർ, പുട്ട്, ഗ്രീൻപീസ് കറി. വ്യാഴാഴ്ച രാവിലെ റാഗി, അരി-അട/ഇലയപ്പം, ഉച്ചയ്ക്ക് ചോറ്, മുളപ്പിച്ച ചെറുപയർ, ചീരത്തോരൻ, സാമ്പാർ, മുട്ട, ഓംലറ്റ്, പൊതുഭക്ഷണമായി അവൽ, ശർക്കര, പഴം മിക്‌സ്. വെള്ളിയാഴ്ച പ്രാതലായി പാൽ, കൊഴുക്കട്ട, ഉച്ചഭക്ഷണമായി ചോറ്, ചെറുപയർ കറി, അവിയൽ, ഇലക്കറി, തോരൻ, പൊതുഭക്ഷണമായി ഗോതമ്പ് നുറുക്ക് പുലാവ്. ശനിയാഴ്ച രാവിലെ ന്യൂട്രി ലഡു, ഉച്ചയ്ക്ക് വെജിറ്റബിൾ പുലാവ്, മുട്ട, റൈത്ത, പൊതു ഭക്ഷണമായി ധാന്യ പായസം എന്നിവയാണ് നൽകുക.
ഓരോ വിഭവങ്ങളും തയ്യാറാക്കുന്നതിനുള്ള ചേരുവകളും അവയിൽ അടങ്ങിയിരിക്കുന്ന പോഷകമൂല്യവും ഉൾപ്പെടെയുള്ള വിവരങ്ങളും ഭക്ഷണ മെനുവിൽ ഉൾപ്പെടുത്തിയിട്ടുണ്ട്.

ചടങ്ങിൽ മാരിക്കുളം തെക്ക് പഞ്ചായത്ത് പ്രസിഡൻ്റ് പി പി സംഗീത അധ്യക്ഷയായി. എൻഎൻഎം ഡിപിഎ ആർ അഞ്ജന പ്രീ സ്കൂൾ കുട്ടികളുടെ പോഷണ നിലവാര സ്ക്രീനിംഗ് നടത്തി. ആര്യാട് ബ്ലോക്ക് പഞ്ചായത്ത് വൈസ് പ്രസിഡൻ്റ് ഇന്ദിര തിലകന്‍, ആര്യാട് ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ ടി എസ് സുയമോൾ, ബ്ലോക്ക് പഞ്ചായത്തംഗം ടി കെ ശരവണൻ, പഞ്ചായത്ത് വൈസ് പ്രസിഡൻ്റ് ടി പി ഷാജി, പഞ്ചായത്തംഗങ്ങളായ രജിമോൾ ശിവദാസ്, പി എസ് ശിഖി വാഹനൻ, എസ് ജയചന്ദ്രൻ, ഐസിഡിഎസ് ജില്ലാ പ്രോഗ്രാം ഓഫീസർ ജെ മായാലക്ഷ്മി, ആര്യാട് സിഡിപിഒ പ്രവ്ദ പീറ്റർ, ഐസിഡിഎസ് സൂപ്പർവൈസർ ലിനി, മറ്റ് ഉദ്യോഗസ്ഥർ തുടങ്ങിയവർ പങ്കെടുത്തു.