പെരുമ്പാവൂർ: വെങ്ങോല ഗ്രാമപഞ്ചായത്ത് ടാങ്ക് സിറ്റി പ്രദേശത്ത് നിർമ്മിക്കുന്ന കുടിവെള്ള പദ്ധതിയുടെ ഉദ്ഘാടനം എൽദോസ് കുന്നപ്പള്ളി എംഎൽഎ നിർവഹിച്ചു. കഴിഞ്ഞവർഷത്തെ ആസ്തി വികസന ഫണ്ടിൽ നിന്നും 17.10 ലക്ഷം രൂപ വിനിയോഗിച്ചാണ് പദ്ധതി നടപ്പിലാക്കുന്നത്. ആലിൻചുവട്, വളയൻചിറങ്ങര എൽപി സ്കൂളിന് സമീപമുള്ള പ്രദേശങ്ങളിലെ അറുപതോളം കുടുംബങ്ങൾക്ക് കുടിവെള്ള പദ്ധതിയുടെ പ്രയോജനം ലഭിക്കും. നിലവിലുള്ള ആലിൻചുവട് ചിറയിൽ നിന്നാണ് പദ്ധതിക്ക് ആവശ്യമായ ജലം ലഭ്യമാക്കുന്നത്.

മോട്ടർ പുരയും 26 ലിറ്റർ ശേഷിയുള്ള ജലസംഭരണിയും നിർമ്മിക്കും. 15 കുതിരശക്തിയുള്ള മോട്ടർ സ്ഥാപിക്കുന്നതിനും തുക അനുവദിച്ചിട്ടുണ്ട്. ജല വിതരണത്തിനായി ഒന്നര കിലോമീറ്റർ ദൈർഘ്യത്തിൽ പൈപ്പ് ലൈനുകൾ സ്ഥാപിക്കും. നിലവിലുള്ള ആലിൻചുവട് പട്ടികജാതി കുടിവെള്ള പദ്ധതിക്ക് സമീപമായാണ് പുതിയ പദ്ധതിയും നിർമ്മിക്കുന്നത്.

ഗ്രാമപഞ്ചായത്ത് പ്രസിഡൻ്റ് എൻ ബി ഹമീദ് അധ്യക്ഷത വഹിച്ച ചടങ്ങിൽ ബ്ലോക്ക് പഞ്ചായത്ത് പ്രസിഡൻ്റ് കെ എം അൻവർ അലി, പഞ്ചായത്ത് വൈസ് പ്രസിഡൻ്റ് ഷംന നാസർ, പഞ്ചായത്ത് അംഗം ശിഹാബ് പള്ളിക്കൽ, കെ എം സുകുമാരൻ, ജോജി ജേക്കബ്, ടിഎം കുര്യാക്കോസ്, പി എച്ച് മുഹമ്മദ്, എം പി ജോർജ്, പി എ ജോസ്, പി പി യാക്കോബ് എന്നിവർ സംസാരിച്ചു.