ആലപ്പുഴ: സംസ്ഥാനത്ത് സ്കൂളുകളിൽ ഓൺലൈനായി അധ്യയനം ആരംഭിക്കാനിരിക്കെ ജില്ലയിൽ പുതിയ അധ്യയന വര്‍ഷം ഒന്നാം ക്ലാസ്സിൽ പുതുതായി 9950 കുട്ടികൾ പ്രവേശനം നേടി. ഏറ്റവും കൂടുതൽ കുട്ടികൾ പുതുതായി ഒന്നാം ക്ലാസിൽ ചേർന്നത് സെന്റ് ജോസഫ് എൽ.പി.ജി.എസ്. ആലപ്പുഴയിലാണ്. 222 കുട്ടികളാണിവിടെ ചേർന്നത്. രണ്ടാം സ്ഥാനത്തുള്ളത് ഗവ.ടൗൺ.എൽ.പി.എസ്.ചേർത്തലയാണ്. 160 കുട്ടികളാണ് ഒന്നാം ക്ലാസ്സിൽ ചേർന്നത്.
രണ്ട് മുതൽ പത്ത് വരെയുള്ള ക്ലാസുകളിൽ 13,310 കുട്ടികൾ പുതുതായി ചേർന്നു. പ്രീപ്രൈമറി വിഭാഗത്തിൽ 2210 കുട്ടികൾ പ്രവേശനം നേടി.

പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി വിദ്യാഭ്യാസ വകുപ്പുമായി ചേർന്ന് ജില്ലയിലെ സമഗ്ര ശിക്ഷ കേരള, കൈറ്റ്, ഡയറ്റ് എന്നീ വിദ്യാഭ്യാസ ഏജൻസികൾ അക്കാദമിക് രംഗത്ത് നടത്തിയ ക്രീയാത്മകമായ ഇടപ്പെടലിലൂടെ 23260കുട്ടികൾ ജില്ലയിലെ വിവിധ സ്കൂളുകളിൽ പുതുതായി ചേർന്നതായി ജില്ല വിദ്യാഭ്യാസ ഉപഡയറക്ടര്‍ വി.ആര്‍.ഷൈല അറിയിച്ചു.
കൊവിഡ് വ്യാപന സാഹചര്യത്തിൽ കഴിഞ്ഞ അക്കാദമിക് വർഷം കൈറ്റ് വിക്ടേഴ്സ് ചാനലിലൂടെ കുട്ടികൾക്ക് ഓൺലൈനായായിരുന്നു ക്ലാസ്സുകൾ നൽകിയിരുന്നത്. വിദ്യാഭ്യാസ ഓഫീസർമാർ ഓൺലൈൻ ക്ലാസ്സുകൾ വിലയിരുത്തുകയും ചെയ്തു. പൊതു വിദ്യാലയങ്ങൾ മികവിന്റെ കേന്ദ്രങ്ങളായി മാറുകയും, അക്കാദമിക് നിലവാരം ഉയർന്നതിന്റെ ഫലമായി കുട്ടികളുടെ എണ്ണത്തിൽ വർദ്ധനവ് ഉണ്ടായി. അൺഎയ്ഡഡ് സ്കൂളുകളിൽ നിന്നും കൂടുതൽ കുട്ടികൾ പുതുതായി അഞ്ച്, എട്ട് ക്ലാസ്സുകളിൽ ചേർന്നു. ജൂൺ രണ്ടോടെ കുട്ടികളുടെ എണ്ണത്തിൽ വലിയ വർദ്ധനവ് ഉണ്ടാകുമെന്നും പൊതു വിദ്യാഭ്യാസ സംരക്ഷണ യജ്ഞം ജില്ലാ കോ-ഓർഡിനേറ്റർ എ.കെ. പ്രസന്നൻ അറിയിച്ചു.