ഇടുക്കി: സാമൂഹ്യനീതി വകുപ്പ് പ്രൊബേഷന്‍ സംവിധാനത്തിലൂടെ നടപ്പിലാക്കുന്ന വിവിധ ധനസഹായ പദ്ധതികളിലേക്ക് അപേക്ഷ ക്ഷണിച്ചു. മുന്‍ കുറ്റവാളികള്‍, പ്രൊബേഷണര്‍, കുറ്റവാളികളുടെ ആശ്രിതര്‍ എന്നിവര്‍ക്ക് തിരിച്ചടവില്ലാത്ത 15,000 രൂപ സ്വയംതൊഴില്‍ ധനസഹായമായി അനുവദിക്കും.

അതിക്രമത്തിനിരയായി മരണപ്പെട്ടവരുടെ ആശ്രിതര്‍ക്കും ഗുരുതരപരിക്ക് പറ്റിയവര്‍ക്കും സ്വയംതൊഴില്‍ ധനസഹായമായി തിരിച്ചടവില്ലാത്ത 20,000 രൂപ നല്‍കും. അതിക്രമത്തിനിരയായി മരണപ്പെട്ടവരുടെയും ഗുരുതരപരിക്ക് പറ്റിയവരുടെയും മക്കള്‍ക്ക് വിദ്യാഭ്യാസ ധനസഹായവും ഉണ്ട്.

രണ്ടു വര്‍ഷമോ അതിലധികമോ ജയില്‍ശിക്ഷ അനുഭവിച്ചു വരുന്ന തടവുകാരുടെ പെണ്‍മക്കള്‍ക്ക് വിവാഹ ധനസഹായമായി 30,000 രൂപ അനുവദിക്കുന്നുണ്ട്. വിവാഹം കഴിഞ്ഞ് ആറു മാസത്തിനു ശേഷവും ഒരു വര്‍ഷത്തിനകവും അപേക്ഷ സമര്‍പ്പിക്കണം.

കൂടുതല്‍ വിവരങ്ങള്‍ക്ക് ഫോണ്‍-048622 20126, അപേക്ഷ ഫോറം നേരിട്ട് ആഫീസില്‍ നിന്നോ അല്ലെങ്കില്‍ www.sjd.kerala.gov.in എന്ന വെബ്‌സൈറ്റില്‍ social defence എന്ന ലിങ്കിലും ലഭ്യമാണ്. അപേക്ഷ ലഭിക്കേണ്ട അവസാന തീയതി ഓഗസ്റ്റ് 15.