എറണാകുളം: ജില്ലയിലെ വിവിധ സംരംഭകരുടെ പരാതികളിൽ അതിവേഗം പരിഹാരം കണ്ടെത്തി വ്യവസായവകുപ്പ് മന്ത്രി പി. രാജീവിന്റെ മീറ്റ് ദ മിനിസ്റ്റർ പരാതി പരിഹാര അദാലത്ത്. അദാലത്തിൽ ലഭിച്ച 130 പരാതികളിൽ 18 പരാതികളിൽ ഉടനടി പരിഹാരം കണ്ടെത്താൻ സാധിച്ചു. മറ്റ് പരാതികളിൽ സമയബന്ധിതമായി നടപടികൾ പൂർത്തിയാക്കും.
ജില്ലയിലെ വ്യവസായ രംഗത്തെ പരാതികൾ പരിഹരിക്കാൻ വ്യവസായ വകുപ്പ് പ്രിൻസിപ്പൽ സെക്രട്ടറി എ.പി.എം മുഹമ്മദ് ഹനീഷ് പ്രത്യേക ചുമതല വഹിക്കുമെന്ന് പറഞ്ഞ മന്ത്രി, റവന്യൂ സംബന്ധിച്ച പരാതികളിൽ പരിഹാരം കാണുന്നതിനായി ജില്ലാ കളക്ടറെ ചുമതലപ്പെടുത്തിയതായും അറിയിച്ചു. ജില്ലാ വ്യവസായ കേന്ദ്രം ജനറൽ മാനേജരുടെ ആഭിമുഖ്യത്തിൽ പരാതിപരിഹാര സംവിധാനം രൂപീകരിക്കും. റവന്യൂ, തദ്ദേശ സ്വയംഭരണം, മലിനീകരണ നിയന്ത്രണ ബോർഡ് തുടങ്ങിയ വകുപ്പുകളുമായി ബന്ധപ്പെട്ടാണ് ഭൂരിഭാഗം പരാതികൾ ലഭിച്ചത്. ഇത്തരം പരാതികളിൽ പരിഹാരം കാണുന്നതിനായി ഉന്നത ഉദ്യോഗസ്ഥരുടെ നേതൃത്വത്തിൽ തുടർ നടപടികൾക്ക് മന്ത്രി നിർദ്ദേശം നൽകി.