74 മത് സ്വാതന്ത്ര ദിനാഘോഷത്തോടനുബന്ധിച്ച് ഓഗസ്റ്റ് 15 ന് രാവിലെ ഒന്‍പതിന് പാലക്കാട് കോട്ടമൈതാനത്ത് നടക്കുന്ന പരേഡില്‍ വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടി പതാക ഉയര്‍ത്തി സല്യൂട്ട് സ്വീകരിക്കും. സ്വാതന്ത്ര്യ ദിനാഘോഷ പരിപാടികള്‍ പൂര്‍ണ്ണമായും കോവിഡ് മാനദണ്ഡങ്ങള്‍ പാലിച്ചാവും നടത്തുകയെന്ന് കളക്ടറേറ്റ് കോണ്‍ഫറന്‍സ് ഹാളില്‍ നടന്ന ആലോചനാ യോഗത്തില്‍ എ.ഡി.എം കെ.മണികണ്ഠന്‍ അറിയിച്ചു. സ്വാതന്ത്രദിനാഘോഷ വേളയില്‍ ശാരീരിക അകലം, മാസ്‌ക് ധരിക്കല്‍, സാനിട്ടൈസര്‍ ഉപയോഗം തുടങ്ങിയ സുരക്ഷാ മാനദണ്ഡങ്ങള്‍ പൂര്‍ണമായും പാലിക്കണമെന്ന് എ.ഡി.എം യോഗത്തില്‍ നിര്‍ദേശം നല്‍കി. കോവിഡ് പശ്ചാത്തലത്തില്‍ ആള്‍ക്കൂട്ടം പൂര്‍ണമായും ഒഴിവാക്കിയിട്ടുണ്ട്. പൊതുജനങ്ങളെ പരിപാടിയില്‍ പങ്കെടുപ്പിക്കില്ല. ജനപ്രതിനിധികള്‍, ഉദ്യോഗസ്ഥര്‍ ഉള്‍പ്പെടെ 100 പേരാണ് പരിപാടിയില്‍ പങ്കെടുക്കുക. ശാരീരിക അകലം ഉറപ്പുവരുത്തിയാണ് ഇരിപ്പിടങ്ങള്‍ ക്രമീകരിക്കുക.

പരേഡിന് മുമ്പ് രാവിലെ 7.30 ന് കോട്ടമൈതാനത്തെ രക്തസാക്ഷ്യമണ്ഡപത്തില്‍ റവന്യൂ ഡിവിഷണല്‍ ഓഫീസര്‍ ഡോ. ബല്‍പ്രീത് സിംഗ് പുഷ്പാര്‍ച്ചന നടത്തും. സ്വാതന്ത്ര ദിനാചരണവുമായി ബന്ധപ്പെട്ട് നടപടികള്‍ സ്വീകരിക്കാന്‍ വിവിധ വകുപ്പ് ഉദ്യോഗസ്ഥര്‍ക്ക് എ.ഡി.എം നിര്‍ദ്ദേശം നല്‍കി. കോവിഡ് സാഹചര്യത്തില്‍ എന്‍.സി.സി, സ്‌കൗട്ട് ആന്‍ഡ് ഗൈഡ് വിഭാഗക്കാരെ പരേഡില്‍ നിന്നും ഒഴിവാക്കാന്‍ തീരുമാനിച്ചു. ഓഗസ്റ്റ് 12 ന് വൈകിട്ട് മൂന്നിനും 13 ന് രാവിലെ ഒന്‍പതിനും കോട്ടമൈതാനത്ത് പരിശീലനം നടക്കും. കലക്ടറേറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ വിവിധ വകുപ്പ് ഉദ്യോഗസ്ഥര്‍ പങ്കെടുത്തു.