തിരുവനന്തപുരം: സംസ്ഥാന സര്‍ക്കാരിന്റെ നൂറുദിന കര്‍മ്മ പദ്ധതിയുടെ ഭാഗമായുള്ള വാതില്‍പ്പടി സേവനം പരീക്ഷണാടിസ്ഥാനത്തില്‍ ജില്ലയില്‍ കാട്ടാക്കട നിയോജക മണ്ഡലത്തില്‍ നടപ്പാക്കും. പ്രയാധിക്യം, ഗുരുതരരോഗം, അതിദാരിദ്ര്യം തുടങ്ങിയ വിവിധ കാരണങ്ങളാല്‍ അവശത അനുഭവിക്കുന്നവര്‍ക്കും അറിവില്ലായ്മയും മറ്റു പ്രശ്നങ്ങളാലും അടിസ്ഥാന സര്‍ക്കാര്‍ സേവനങ്ങള്‍ യഥാസമയം ലഭ്യമാകാതെയുമിരിക്കുന്ന ജനവിഭാഗങ്ങള്‍ക്ക് വീട്ടുപടിക്കല്‍ സര്‍ക്കാര്‍ സേവനങ്ങളും ജീവന്‍രക്ഷാ മരുന്നുകളും എത്തിക്കാന്‍ ലക്ഷ്യമിടുന്ന പദ്ധതിയാണ് വാതില്‍പ്പടി സേവനം. പദ്ധതി സംസ്ഥാനതലത്തില്‍ സെപ്റ്റംബര്‍ 15ന് ആരംഭിക്കും.
സംസ്ഥാനത്ത് പരീക്ഷണാടിസ്ഥാനത്തില്‍ 38 ഗ്രാമപഞ്ചായത്തുകളിലാണ് പദ്ധതി ആരംഭിക്കുന്നത്. തിരുവനന്തപുരം ജില്ലയില്‍ ആദ്യഘട്ടത്തില്‍ കാട്ടാക്കട നിയോജക മണ്ഡലത്തിലെ കാട്ടാക്കട, മലയിന്‍കീഴ്, മാറനല്ലൂര്‍, പള്ളിച്ചല്‍, വിളപ്പില്‍, വിളവൂര്‍ക്കല്‍ എന്നീ ഗ്രാമപഞ്ചായത്തുകളില്‍ പദ്ധതി നടപ്പാക്കും. പദ്ധതിയുടെ ജില്ലാതല സമിതി യോഗം ജില്ലാ കളക്ടര്‍ ഡോ. നവ്ജ്യോത് ഖോസയുടെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്നു.ഐ.ബി. സതീഷ് എംഎല്‍എ, ജില്ലാ വികസന കമ്മിഷണര്‍ ഡോ. വിനയ് ഗോയല്‍, പഞ്ചായത്ത് ഡെപ്യൂട്ടി ഡയറക്ടര്‍ ത്രേസ്യാമ്മ ആന്റണി, ഗ്രാമപഞ്ചായത്ത് പ്രസിഡന്റ്മാര്‍-സെക്രട്ടറിമാര്‍,വാതില്‍പ്പടി സേവനം ജില്ലാതല സമിതി അംഗങ്ങള്‍ തുടങ്ങിയവര്‍ യോഗത്തില്‍ പങ്കെടുത്തു.
ജില്ലാ കളക്ടര്‍ യോഗത്തില്‍ പദ്ധതിയെക്കുറിച്ച് വിശദീകരിച്ചു. നിരവധി മാതൃകാ പദ്ധതികള്‍ നടപ്പാക്കുന്ന കാട്ടാക്കട നിയോജക മണ്ഡലത്തില്‍ ഇത്തരമൊരു മാതൃകാ പദ്ധതി ആദ്യമായി നടപ്പാക്കുന്നതില്‍ അഭിമാനമുണ്ടെന്ന് ഐ.ബി. സതീഷ് എംഎല്‍എ പറഞ്ഞു. തെരഞ്ഞെടുക്കപ്പെടുന്ന സന്നദ്ധപ്രവര്‍ത്തകര്‍ സേവനതല്പരരും സമര്‍പ്പണ മനോഭാവവുമുള്ളവരുമായിരിക്കണമെന്നും പദ്ധതിയുടെ ഗുണഭോക്താക്കളുടെ പട്ടിക സുതാര്യമായിരിക്കണമെന്നും എംഎല്‍എ പറഞ്ഞു. പദ്ധതി ആദ്യമായി നടപ്പാക്കുന്നതില്‍ നിന്നുള്ള അനുഭവത്തില്‍ നിന്ന് പഠിച്ച് മുന്നോട്ട് പോകാന്‍ സാധിക്കട്ടെയെന്നു കളക്ടര്‍ പറഞ്ഞു. പദ്ധതി പ്രവര്‍ത്തനങ്ങളുടെ നിലവിലെ സ്ഥിതി യോഗം വിലയിരുത്തി.
തദ്ദേശസ്വയംഭരണ വകുപ്പിന്റെ നേതൃത്വത്തില്‍ സാമൂഹ്യ നീതി വകുപ്പിന്റെയും സാമൂഹ്യ സന്നദ്ധസേന ഡയറക്ടറേറ്റിന്റെയും സംയുക്താഭിമുഖ്യത്തിലാണ് പദ്ധതി നടപ്പാക്കുന്നത്. ജില്ലാ ഭരണകൂടം പദ്ധതി പ്രവര്‍ത്തനങ്ങള്‍ ഏകോപിപ്പിക്കും. ആദ്യഘട്ടത്തില്‍ മസ്റ്ററിങ്, ലൈഫ് സര്‍ട്ടിഫിക്കറ്റ്, സാമൂഹ്യ സുരക്ഷാ പെന്‍ഷന്‍ അപേക്ഷ, മുഖ്യമന്ത്രിയുടെ ദുരിതാശ്വാസനിധിയില്‍ നിന്നുള്ള സഹായത്തിനുള്ള അപേക്ഷ, ജീവന്‍രക്ഷാ മരുന്നുകള്‍ എന്നീ സേവനങ്ങളാകും നല്‍കുക. സന്നദ്ധ പ്രവര്‍ത്തകരുടെ സഹായത്തോടെ തദ്ദേശ സ്വയംഭരണ സ്ഥാപനങ്ങള്‍ ഇതിനു നേതൃത്വം നല്‍കും. കൂടാതെ ജനപ്രതിനിധികള്‍, ആശാ വര്‍ക്കര്‍മാര്‍, കുടുംബശ്രീ-അക്ഷയ പ്രവര്‍ത്തകര്‍ എന്നിവര്‍ ഇതിന്റെ ഭാഗമായി പ്രവര്‍ത്തിക്കും.
സാമൂഹ്യനീതി വകുപ്പിന്റെ നേതൃത്വത്തില്‍ ആശാവര്‍ക്കര്‍മാരുടെ സഹായത്തോടെയാണ് ഈ പദ്ധതിയുടെ ഗുണഭോക്താക്കളുടെ ലിസ്റ്റ് തയ്യാറാക്കുന്നത്. ഓരോ വാര്‍ഡുകളില്‍ നിന്നും മൂന്നു സന്നദ്ധ പ്രവര്‍ത്തകര്‍ എന്ന നിലയില്‍ സന്നദ്ധസേനാ പോര്‍ട്ടലില്‍ രജിസ്റ്റര്‍ ചെയ്തു വരുന്നു. ഇവര്‍ക്ക് കിലയുടെ നേതൃത്വത്തില്‍ ഓണ്‍ലൈന്‍ പരിശീലനം നല്‍കും. അഭിമുഖം വഴി തെരഞ്ഞെടുക്കപ്പെടുന്ന സന്നദ്ധ പ്രവര്‍ത്തകരുടെ വിവരങ്ങള്‍ അതാത് തദ്ദേശ സ്വയംഭരണ സ്ഥാപനങ്ങളില്‍ പ്രസിദ്ധീകരിക്കും. തുടര്‍ന്ന് സെപ്റ്റംബര്‍ 15ന് പരീക്ഷണാടിസ്ഥാനത്തില്‍ പദ്ധതി നടപ്പാക്കും.