ആലപ്പുഴ: കോവിഷീല്‍ഡ് വാക്‌സിന്‍ ഒന്നാം ഡോസ് സ്വീകരിച്ചവര്‍ 85-ാം ദിവസവും കോവാക്‌സിന്‍ എടുത്തവര്‍ 29-ാം ദിവസവും രണ്ടാം ഡോസ് സ്വീകരിക്കണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. രണ്ടാം ഡോസ് എടുക്കുന്നതിനുള്ള അവസാന സമയപരിധി വരെ കാത്തിരിക്കുന്നത് ഒഴിവാക്കണം.

ഓണ്‍ലൈനില്‍ സ്ലോട്ടുകള്‍ ബുക്ക് ചെയ്‌തോ സമീപത്തെ ആരോഗ്യ കേന്ദ്രത്തിലെത്തിയോ വാക്‌സിനെടുക്കാം. ഇതുവരെ ഒന്നാം ഡോസ് സ്വീകരിക്കാത്തവര്‍ എത്രയും വേഗം കുത്തിവെയ്പ്പ് എടുക്കണം.

ആലപ്പുഴ ജില്ലയില്‍ ഇതുവരെ 2229713 ഡോസ് കോവിഡ് വാക്സിന്‍ നല്‍കി. 1501495 പേര്‍ ഒന്നാം ഡോസും 728218 പേര്‍ രണ്ടാം ഡോസും സ്വീകരിച്ചു. ഇന്നലത്തെ (ഒക്ടോബര്‍ 11) കണക്കനുസരിച്ച് ജില്ലയില്‍ 121055 ഡോസ് വാക്‌സിന് സ്‌റ്റോക്കുണ്ട്.