ജനകീയ പങ്കാളിത്തത്തോടെയുള്ള കോവിഡ് പ്രതിരോധ പ്രവര്‍ത്തനങ്ങള്‍ മലപ്പുറം ജില്ലയ്ക്ക് പ്രതീക്ഷ പകരുന്നു. ശനിയാഴ്ച (2021 ഒക്ടോബര്‍ 16) 438 പേര്‍ക്ക് മാത്രമാണ് ജില്ലയില്‍ കോവിഡ് 19 വൈറസ്ബാധ സ്ഥിരീകരിച്ചതെന്ന് ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു. ടെസ്റ്റ് പോസിറ്റീവിറ്റി നിരക്ക് 5.6 ശതമാനമായി കുറഞ്ഞു. അതേസമയം 681 പേര്‍ വിദഗ്ധ പരിചരണത്തിനു ശേഷം ശനിയാഴ്ച മാത്രം വൈറസ് വിമുക്തരായി. ഇതോടെ ജില്ലയില്‍ കോവിഡ് വിമുക്തരായവരുടെ എണ്ണം 5,51,975 പേരായതായും ജില്ലാ മെഡിക്കല്‍ ഓഫീസര്‍ വ്യക്തമാക്കി.

രോഗികളുമായി സമ്പര്‍ക്കത്തിലേര്‍പ്പെട്ട് 423 പേര്‍ക്കാണ് വൈറസ് ബാധ സ്ഥിരീകരിച്ചത്. ആരോഗ്യ പ്രവര്‍ത്തകര്‍ക്കാര്‍ക്കും കോവിഡ്ബാധയുണ്ടായിട്ടില്ല. ആറ് പേര്‍ക്ക് വൈറസ് ബാധയുണ്ടായതിന്റെ ഉറവിടം കണ്ടെത്താനായിട്ടില്ല. വിദേശത്ത് നിന്നെത്തിയ ഒരാളും ഇതര സംസ്ഥാനങ്ങളില്‍ നിന്നെത്തിയ എട്ട് പേര്‍ക്കും വൈറസ്ബാധ തിരിച്ചറിഞ്ഞു. 30,488 പേരാണ് ജില്ലയില്‍ ഇപ്പോള്‍ നിരീക്ഷണത്തില്‍ കഴിയുന്നത്.

6,925 പേര്‍ ജില്ലയില്‍ നിലവില്‍ ചികിത്സയിലുണ്ട്. ഇവരില്‍ 646 പേര്‍ കോവിഡ് പ്രത്യേക ചികിത്സാ കേന്ദ്രങ്ങളായ ആശുപത്രികളിലും 29 പേര്‍ കോവിഡ് ഫസ്റ്റ് ലൈന്‍ ട്രീറ്റ്‌മെന്റ് സെന്ററുകളിലും 39 പേര്‍ കോവിഡ് സെക്കന്‍ഡ് ലൈന്‍ ട്രീറ്റ്‌മെന്റ് സെന്ററുകളിലുമാണ്. തദ്ദേശഭരണ സ്ഥാപനങ്ങള്‍ക്കു കീഴിലുള്ള പ്രത്യേക താമസ കേന്ദ്രങ്ങളായ ഡൊമിസിലിയറി കെയര്‍ സെന്ററുളില്‍ ഇപ്പള്‍ ആരും നിരീക്ഷണത്തിലില്ല. ശേഷിക്കുന്ന കോവിഡ് ബാധിതര്‍ വീടുകളിലും മറ്റുമായാണ് നിരീക്ഷണത്തില്‍ കഴിയുന്നത്.