കാക്കനാട്: ജില്ലയിലെ സർക്കാർ സ്കൂളുകളിലെ വിദ്യാർത്ഥികൾക്ക് വിവിധ സ്കോളർഷിപ്പ് പരീക്ഷകളിൽ മികച്ച വിജയം നേടിയെടുക്കുന്നതിനായി പരിശീലനം നൽകുന്ന പദ്ധതി പ്രത്യുഷ ജില്ലാ കളക്ടർ ജാഫർ മാലിക് ഓൺലൈനായി ഉദ്ഘാടനം ചെയ്തു. വിദ്യാഭ്യാസ വകുപ്പ് ജില്ലാ ഡപ്യൂട്ടി ഡയറക്ടർ ഹണി.ജെ. അലക്സാണ്ടർ അധ്യക്ഷത വഹിച്ചു.

വിദ്യാർത്ഥികളെ രാജ്യത്തെ വിവിധ മത്സരപരീക്ഷകൾക്കും പ്രാപ്തരാക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്. ജില്ലാഭരണകൂടം, ജില്ലാ വിദ്യാഭ്യാസ വകുപ്പ് എന്നിവയുടെ സംയുക്ത നേതൃത്വത്തിലാണ് പദ്ധതി നടപ്പിലാക്കുന്നത്. പെട്രോനെറ്റ് എൽ എൻ ജി യുടെ സാമ്പത്തിക സഹായത്തിൽ എൻസ്ക്കൂൾ ലേണിംഗ് ആണ് വിദ്യാർത്ഥികൾക്ക് പരിശീലനം നൽകുന്നത്.

ആദ്യഘട്ടത്തിൽ എട്ടാം ക്ലാസ്സിൽ പഠിക്കുന്ന വിദ്യാർത്ഥികൾക്കുള്ള നാഷണൽ മീൻസ് കം മെറിറ്റ് സ്കോളർഷിപ്പിന് (National means cum merit scholarship ) തയാറെടുക്കുന്നവർക്കാണ് പരിശീലനം നൽകുന്നത്. സ്ക്രീനിംഗ് ടെസ്റ്റ് നടത്തി തിരഞ്ഞെടുത്ത 323 വിദ്യാർത്ഥികൾക്കാണ് പരിശീലനം. എൻ സ്കൂൾ ലേണിംഗ് സി.ഇ. ഒ മുഹമ്മദ് യാസീൻ , പെട്രോനെറ്റ് എൽ.എൻ.ജി. പ്ലാന്റ് ഹെഡ് യോഗാനന്ദ റെഡ്ഡി, സീനിയർ മാനേജർ ആശിഷ് ഗുപ്ത, എൻസ്കൂൾ ലേണിംഗ് ഡയറക്ടർ അഹമ്മദ് സാജു പരിശീലനത്തിന് തിരെഞ്ഞെടുത്ത വിദ്യാർത്ഥികൾ ഡി.ഇ.ഒ മാർ എന്നിവരും യോഗത്തിൽ പങ്കെടുത്തു.